ЧЫМЫ JОДЭДЭ МАНДЭJОН -19

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 24 голосов)
Изменить размер шрифта Decrease font Enlarge font
image

 
 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

19

 

            Бы вырәдә ижән ды-се кәлимә бынывыштым озорбојҹоныжон хосјәти һәхәдә. Валлаһ, ҹо ҹурә сәмәрәсән мыни, чымы һич дышменәтым ни де һич гылә хәлғи, әксинә, һурмәтым һесте бә һар хәлғи. Ымијән чок зынејдәм ки, бә и кәси, да, һәтто, са кәси горәнә гыләј хәлғи һәхәдә чоки ја бевәҹи әбыни воте. Интаси анәдә сорон дыләдә жијәмон бы мәмәләкәтәдә, әве әмә ҹо хәлғонсә чок зынејдәмон ыштә “һәмвәтәнон”. Ҹо мәсәлонәдә бәлкәмән дејәвон бәбе нышт-әшт карде, ше-омә карде, әмма һакимијәти мәсәләдә бәчәвон һич гыләјни етибо ни!

            Кали чијон бывотым Ајази һәхәдә. Јодәдәм мандәни кејнә, әмма ружи Бокујо чәмә һәмрон нывыштәбе ки, гыләј тожә тырки-толыш бешә бә мәјдон, һај гәпон жәјдә һа! Ым одәм вотејдә, “бәжемон, бәкыштемон, ғыјом рост бәкамон, толыши озод бәкамон”.  Мылхәс, гәвомәј вотејдәбе. Вотем, “и кәрән нез мәшән бә одәми, хәтоје әв бошмә!” жәгоән кардышоне. Интаси пешы чәмә ҹо гыләј һәмро зангыш карде ки, ә одәм боме бә Москвә, ты виндемон быкә деәј. Рози бим.

            Мајә мангәдә Ајаз Мутәллибови мовардә ружбе. Идыш кардәбе. Бәмәныш вотәныбе. Ҹоныш сәғбу, ыштән бәзне. Интаси әмә умутымоне ки, чәмә һәмрон вотә ә одәмән быә бә идәдә, һәтто дыбәды сыханыш кардә де Ајази.

            Ды-се ружи бәпештә омәјмон Ајази тоно. Тикәј гәпымон жәј. Ибердәмә парсәм чәјку ки, “фылон номәдә гыләј одәм омә бә Москвә, шымә зынејдәшон әј?” Ғәссәмыш һарде ки, “һич вахти нә виндәмни, нәән мәсәмни жәго одәми һәхәдә”. Һичим нывоте, бешимон шимон. Ды-се ружи бәдигә умутымоне ки, Бокујәдә һәм бо Ајази одәмон, һәмән әјо шә чәмә һәмронро јолә хәто һесте, фылон ружи фылон саатәдә һәбс бәкан әвони.

            Омәјмон ижән Ајази тоно. Әлбәһол дәмандим бә гәп. Вотем, “Ајаз миәллим, охо әмә иҹо ко кардејдәмон, һәммәј бә һәрәкәтимон ки, боты жычи быкәмон. Чәмә арәдә етибо ныбо, чокнә ко бәкамон иврәдә?” Воте, “чич быә?” Вотем, “пәјнә хәбәм сәј шымәку и кәси ном, ғәссәмон һарде ки, зынејдәнишон әј. Әмма аз чок зынејдәм ки, шымә зынејдәшон әј, шымә мовардә ружи ијо быә, сыханыш кардә дешмә. Пијејдәоне, лап шымә жә гәпон протоколи бијәм быдәм бәшмә. Әмма чымы мәғсәд шымә сырон умуте ни. Жыгоон ко кардә ки, шымә тәрәфдоронышон һежо һәбс кардә. Аз чок зынејдәм ки, һәмон одәм Озорбојҹони Милли бетәһлукәти вәзарәти одәме, мәғсәдышән әмәни мәһв кардеје! Әве, бызнән ыми, ымруж саат 15.00-дә Бокујәдә шымә офиси дәбәбастен, шымә одәмонән һәбс бәкан. Бошмә одәмоным бәболи омејдәни, чәмә һәмронән әјо бејдән. Аз ијо омеәдә, зангым карде, вотыме бәштә һәмрон. Шымә ыштән бәзнешон!” Ајаз сипипуш бе. “Ә одәми демы таныш кардәкәси кә хәробә быбу, чәј балон бымардын, гыләј бокужә “дызди” вардәшбе чымы тоно! Тыны Хыдо, быбахш мыни, ым чы ғәләтбе, мы кардыме?! Есә аз чич быкәм?” Вотыме чич карде лозиме. Зангыш карде бә Шых Әбдули, воте, “һајди әғылон һәммәј бекә офисо, дәбаст чәј бәј. Бәјышән тикәј сә-сыхан карде ки, ә одәм кибе, шымә вығандәонбе чымы тоно?..” Бешимон шимон.

            Пијо вотыме ки, де Илјаси ыштә кәсимотымон кардәбе. Әнәһој дәныварде, и кәрән бәмы хәбәшон дој ки, Илјас омә бә Москвә, ыштән шә Ајази тоно, чы гәпонышон жә, зынејдәним, әмма чәјоән бешә шә бә Боку.

            Әлбәһол зангым карде бә Боку. Вотыме бәчәмә һәмрон гыләјни ки, “есә быши Илјаси тоно, бәј бывот, Миләллими вотыше, “Илјас фаһишәје!”” Хонәхо керахт бе, хәјли мыз-мызыш карде ки, “чок ни, сипирише, аз чокнә бывотым бәј жәго сыхани?” Вотем, “һукман шәниниш! Ту быкәм бәчәј риши!” Бә коврә бәрәсе, чәмә фәғырә дуст де ҹо гыләј толыши иҹо шәбин Илјаси тоно, чымы сыханонышон жәгоән роснијәбе бәј!

            Әнәһој дәныварде, занг омәј бә Исмоили телефон. Илјасбе. Исмоил воте, “Миәллим чымы тоно ни!” Илјас де бәмә-шивәни ловә кардејдәбе ки, “Миәллим быбахшы мыни, һәни гәләј ко бе, гәтыме”, чыбызным һәни чич...

            Гыләјән мәсәлә. Августә мангәдә чы Москвә озорбојҹоныжә олигархон гыләјни вәјәш карде боштә зоә Бокујәдә. Бә вәјә Русијәдә быә озорбојҹоныжә олигархон вејни омәбе. Илһам Әлијевшонән сәдо кардәбе. Һәмон ә Илһам Рәһимовән әјо быәбе. Әјо әвон ыштә гәпышон жәбе де Илһами, бә ғәрор омәбин ки, Ваһид Әләкбәрови бывғандын Путини тоно бә мыннәт, әв быросны бәј ки, Илһам Әлијев розије ғәбул быкә ышты һәмә шәртон, ты комәг быкә бәј, быдә әв президент быбу!

            Чы һодисәку камиши дәвардәбе, Илјаси ижән зангыш карде бә Исмоили телефон. Воте, “пулым орәхә, бә Миәллими бывот, пул пәјдо быкә бомы!” Исмоил воте, “ым чы гәпе? Миәллими пулыш һесте? Детымон гәп жәбе ки, пули ыштән нојдәшон! Ышты авлод Рәһимовијән вотәшбе ки, 50 милјон доллар һозыје. Бәс кывин ә пулон?” Воте, “Илһами һәватәше мы, дәвардә бә ҹо кәси тәрәф. Чымы 30 һәзо доларым һестбе, харҹым кардә, мандәм бепул. Әмоне, Миәллим, пул пәјдо быкә!” Аз гуш дојдәбим. Исмоил воте, “чәмә пулымон ни, ыштән чорә быкә боштә сәј!

            Ым чәвон мәнәвијот, имон, тәғва, әхлоғ, мердәти, авлодәти! Хыдо ту быкә бәвон!

            Ымијән бывотым ки, анә вахти дыләдә чәмәһон һич кәсику пул бејдәныбе. Исмоили гыләј шындырә Москвичыш һестбе, һа ружбәмијон огәтејдәбе әмәни Москвә гыләј ҹадәдә. Копуг-копуг гырдә кардејдәбимон ки, бензин быжәнәмон бә машини! Һәмон ә тырконән нимәзәрәфт, нимәҹидди вотејдәбин бәјәнды: “Зә, ым толышон гыләј шындырә Москвичәдә нәвејдән, ҹифәдәшонән и копуг пул ни, әмма чәвон вотә сыханон һәммәј рост бешејдән! Әмә боһојнә машинонәдә нәвејдәмон, чанә лозиме пулымонән һесте, әмма чәмә һич гылә сыхан рост бешејдәни!

            Де коон паралел, ружномән јодо бекардејдәныбим. Арәдә шејдәбим бә Колпино, ружномә вадојдәбим, ижән омејдәбим бә Москвә. Москвәдән ки нә пул ныбе ки, меһмонхонәдә бымандым, нәәнки чәмә һәмрон гыләјни жәго кәш ныбе ки, әјо бымандым. Һа шәв гыләј вырәдә де тәһәри шәви руж әкәјм. Нә роһатимон ныбе, нәәнки һарды-һәш.  Әмма бә һарчи тов вардејдәбимон ки, һич ныбо гыләј руж быбәмәмон боштә хәлғи!  Чымон һич гылә пучә гәп ја шәнбозәти ни, ымон һәммәј һәғиғәтин!

            Ымони вотејдәм ки, быдә чәмә толышон и кәрән чок-чоки но-пегәт быкән, бызнын ыштә кој чәми. Ә толышон ки, ымружнә ружәдән ыштәни шәһид кардејдән бо Озорбојҹони, бо тыркон, быјә вотејдән бәвон, быдә чок-чоки баһандын ым сыханон, ыштә јодәдә огәтын ки, дујә гәпин ымон һәммәј, толышон ыштән бәпе чорә быкән боштә сәј! Чә одәмонку быјә не, һич һәмроән әбыни бо толыши!  

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|