ЧЫМЫ JОДЭДЭ МАНДЭJОН -18

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 32 голосов)
Изменить размер шрифта Decrease font Enlarge font
image

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

18

 

            Мыддәти бәпештә Бокујо хәбәшон дој бәмы ки, Илјас Исмоилов омә бә Москвә. Зангышон карде бәмы. Шим чәј тоно. “Президент отел”әдә мандејдәбе. Дәшим бә дылә, бәнем и дастә одәм ныштә ијо. Сәломым дој. Вотем, чымы ном фылонкәсе. Илјаси вотыше бәштә одәмон, әвон һәммәј бешин, и кәс манде. Вотем, “әмә дыбәды гәп жәнинимон! Воте, “ым чымы веј незә одәме, быдә әв быманды!” Бәнем, ижән нызнәше, аз ким. Гәдә-гәдә вотем, “аз Әбосзодәм”. Ыми мәсенҹән, рәјрә пекардыше ә мерд, воте беши тынән.  Әште сәпо, и кәрән хәшомәш дој бәмы, чајыш варде ноше чымы вәдә. Дәмандимон бо гәп жәј. Мәсәлку хәбәш һестбе. Веј гәпымон жәј. Чәвон һәммәј нывыште воҹиб зынејдәним ијо. Иглә чиј нывыштејдәм. Воте, “шымә чок зынејдәшон ки, чымы незә авлод ијән дуст Илһам Рәһимов Владимир Путини незә дусте. Бәмы чочин омејдә ки, чымы мәсәлә урусон бочи бәјышон вотәни, бәтышон вотә?” Сырәјм. Вотем, “бәты чочин омејдә ки, толыш һәлл кардејдә Озорбојҹони тале? Быдә бо! Әмма бәшты бы парси аз ҹәвоб нибәдом, һәрчәнд ки, ҹәвобым һесте. Сәдо быкә ыштә авлоди, чәјку быпарс ыми”. Ымијән бывотым ки, хәбәм һестбе ки, Илһам Рәһимови лап сыфтәо пијәшбе “дәшу” бы кампанијә, әмма бәјышон вотәбе ки, “дештә коон мышғол быби, дәмәши бы ко!” Әвән мандәбе бә кәно.

Илјаси зангыш карде бә Рәһимови, әјән вотыше, “маштә фылон саатәдә, фылон вырәдә молағат быкәмон”.

            Маштәнәј һәмон вахти де Исмоили омәјмон бәчәј вотә вырә. Гыләј боһојнә ресторанәдә ныштәбимон. Чәј одәмон һәммәј дијәро бин, ныштин ҹо вырәдә. Таныш бимон, чәјо вотыше: “Чымы авлод ијән дуст Илјас чочинә одәме, валлаһ! Хәбә сәјдә ки, бочи бәмышон асбардәни ым мәсәлә, бә толышишон асбардә? Жыбызын, корпә әғыле, жыго парс дојдә! Ым довләти мәсәләје, довләти сәдә ныштәкәсон ыштән мыәјјән кардејдән, бәки ком кој басбардын! Әве, ты фик мәдә бәчәј сыхани. Әмма, бәзнеш карде, иглә чиј бывот бәмы: Аз Кремләдә ныштәкәсон чок зынејдәм. Бәмы бәзнеш воте ки, ки асбардәше бәты ым ко?” Вотем, “чә одәмон ки бе әзыним воте, чумчыко жәго иҹозәм ни. Әмма иглә чиј бәзнем воте ки, әвон конҹо ныштејдән”. Воте, “розим, бывот, аз дәбәрәсем”. Вотыме. Мерди раг камиши дәгиш бе, ҹидди-ҹидди вотыше: “Һарчи мәлуме. Ыштә гәпи быжәнәмон”. Гәпымон жәј. Воте, “чәвон иминә шәрт чиче бо Илјаси президент бе?” Вотем, “сыфтә шымә ыштән ҹәвоб быдән бәчымы гыләј парси: Шымә һәғиғәтән бовәмандишон ки, Илјас бәзне быбу президент?” Воте, “гирәм аз зынәмбәј ки, Илјас бәштә гыләј ҹәһәти горәнә мандә номижонку зәифе, әвотим, не! Интаси азән виндејдәм ки, Илјас  һәмә иддокорон дыләдә һәм ән сәводине, һәмән ән амохтәје. Әве, аз бовәмандим ки, әв бәзне бе президент!” Вотем, “әла! Есә вотејдәм бәшмә чәвон шәрти: Илјас боштә кампанијә пули ыштән пәјдо кардәнине. Зуш бәвышкије бы кој? Илјаси бәмы вотыше ки, де кој шымә мышғолишон”. Воте, “чәмә ијо быә одәмон гырдәшон кардә 50 милјон доллар. Чымы зынәј, вәс бәка!” Вотем, жәгобу, дастон бә пе кардејдәмон, дәгынејдәмон бә ко.

            Жыгонә, дәмандимон бә ко. Ејни вахтәдә рә-рә молағатым бејдәбе де Ајаз Мутәллибови. Сәлјоныжон гыләј “Кур” номәдә кафе һесте, әјо ныштејдәбе. Навко һукмәти офисыш доәбе бәј дипломатик корпусәдә. Интаси бы президентә сәчыни кампанијә тикәј бәнав сәшонбе чәјку ә офис. Сәбәбышән, чымы зынәјку әвбе ки, урусон бәј вотәшонбе ки, “есә Сәвети вахт ни ки, әмә президент тәјин быкәмон тыни. Пијејдәбу президент быби, быши бә Озорбојҹон”. Вотәшбе ки, “бышом, бәгәтен мыни”. Вотәшонбе ки, “бәгәтен, ајбыш ни, әмә комәг бәкамон, вабәдон тыни”. Рози быәныбе, әве ријәшон кәшәбе чәј сәпе.

            Ајазијән фикыш һестбе ки, ыштә номижәти быдә бә нав. Аз дырыст зынејдәбим ки, умумән Озорбојҹонику кәноәдә жијә һич кәси Боку нез ванибәдо бә сәчынон. Интаси ым сыхани бә одәмон воте бејдәныбе! Сәбәбән ымбе ки, әвон һәммәј пештыпурбин бә Москвә!

            Ајазән жәго. Әзыним воте, конкрет бәки пештыпурбе, әмма зынејдәбим ки, умуш һесте. Ружи бәј вотыме Илјаси һәхәдә. Воте, “бә вахти Илјасым коо бекарде, әве рынҹијә чымыку. Әв сәрәсејдәни ки, мы бекардәмни әв, чымы вәзифә бекардәше. Чымы ыштәни бәј һич бевәҹим ни, дышменәтимән ни”. Аз вотем, “әмә бәпе мәхлоғи сәфәрбәр быкәмон и кәси гырдо ки, әв ғалиб бызны оме. Әве, боән жыго быкәмон: Шымәнән быдән ыштә номижәти, Илјасән быдә. Шымәнышон бә ғејдијот сәј, бәвәдә Илјас бәбе шымә мыовин, ыштә номижәти бә пеы пебәгәте. Ја шымәнышон ғејдијото дәнывоније, бәвәдә әв бәбе президент, шымәнән чәј мыовин”. Рози бе демы. Хаһишыш карде чымыку ки, “Илјас бә Москвә омејәдә, әј бијәјш чымы тоно, дуст быкәјш демы, чәјо ко бәкамон”. Вотем чок.

Чәмә Бокујәдә быә һәмрон чә вахтику һәм Илјаси тоно гырдә бејдәбин, һәмән Ајази тәрәфдорон тоно – Шых Әбдули офисәдә.

            Пешы Илјас и кәрән омәј бә Москвә. Бә Вашингтон шејдәбе, гыләј конгрессмени дәвәтыш кардәбе әв. Зангыш карде, шим чәј тоно. Хәјли мәсәлонымон но-пегәт карде. Пешы Ајази мәсәләм воте бәј. Вотем, “огардәсә бомеш бә Москвә, бәшемон чәј тоно, мандә гәпон һәммәј аз жәме деәј”. Воте, “вахт каме, әве чымы план жыгобе ки, Истамбуло быпәрым бә Боку, һәни ијо нывом”. Вотем, “ым воҹибә мәсәләје. Һичи әкәни, и руж бомеш, ыштә гәпи бәжемон, бәшеш”. Рози бе.

Идомәш һесте

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|