ЧЫМЫ JОДЭДЭ МАНДЭJОН -17

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 27 голосов)
Изменить размер шрифта Decrease font Enlarge font
image

 
 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

17

 

            Де минволи, омәјмон бешимон бә 2003-нә сори! Навәдә јолә коон бә чәшбин әмәни!    Февралә мангәдә омәјм бә Москвә. Исмоилым винде. Бәмы вотыше ки, “ијо һозыәти шејдә бә Озорбојҹони президенти сәчынон. Бәмынән доәшоне гыләј сијоһи ки, толышон дијә быкән, бывотын ки, ки быбо президент, чок бәбе? Чокнә быкәмон?” Вотем, “сәдо быкә ә одәмон, гәп быжәнәмон”. Омәјн. Ды кәс әвон, ды кәсән әмә, ныштимон гыләј мәнзыләдә. Гыләј сијоһишон ној бә мијон. Чымы зынәјку, 27 кәси ном һестбе әјо. Сијоһи бино бејдәбе Һејдәр Әлијевику, чәјо омејдәбе Илһам Әлијев, чәјо мыхолифәти лидерон, кали ҹо кәсон, охојәдән Русијәдә жијә кали “озорбојҹоныжон”. Вотен, “киј мәслоһат зынејдән толышон?” Аз аштә ангыштәм ној Илһам Әлијеви номи сәпе. Вотыме ки, “һәлә мәлум ни, Һејдәр бәманде ја бәмарде, фәрғыш ни, бымандоән, жыго зынејдәм, Илһам бәбе президент. Әве, боән дејә ко быкәмон!” Омәкәсон јаһушон рост карде ки, “чәвон һич гыләјни әбыни – нә пыә, нә зоә!” Вотем, “чымы билон, шымә бәвиндешон, охој чымы вотәј бәбе, әмма әмә һәдәр-һәдәри ыштә вахти ијән енержи сәрф бәкардемон бә ҹо кәсон! Ыштән бәзнешон!” Вотен, “чок-чоки дијә быкән бә сијоһи, ыштә сыхани бывотән”. Вотем, “әмә һич вахти де пантыркистә мыхолифәти ко әкәнимон! Бәчәвон президент бејән рози әбынимон, чумчыко әвон толыши дышменин! Росте, Әлијевонән дышменин! Әмма ијо гыләј мәсәлә һесте. Һејдәр бышо, Илһами еһтијоҹыш бәбе ки, Русијә дастәк быбу бәј. Чымы хәбәм һесте ки, хәјли вахте Илһам гирәвә нәвејдә ки, ро пәјдо быкә бә Кремли. Чәј одәмон шәв-руж бә кон бы сәмтәдә. Әве, әмә бәзнемон ыштә кали шәртон бәј едаште, рози ебәғандемон ки, бочәмә хәлғи кали коон быкә. Ғәбул быко чәмә шәртон, комәг бәкамон бәј, нибәка, ҹон чәј, ҹәһәнным че Хыдо!” Бә коврә бәрәсе, хонәхон вотен, “ым мымкун быә ко ни!” Һандыме ҹо номон, ыштә ангыштәм ној Илјас Исмоилови сәпе! Вотем, “чәвон дыләдә ым һәммәјсә зумандән ныбо, һич ныбо һәм сәводине, һуғуғшыносе, һәмән ҹо мәсәлон һестин ки, бәвонәдә хәтош каме. Әве, боән деәј ко быкәмон!” Вотен, “чок, әмма бәпе ыштә нәзәри бынывышти ки, һандәкәсон бовә быкән бәты, әмәнән ко быкәмон де Исмоили”. Вотем чок.

            Жыгонә, умуж гынимон бә Озорбојҹони президенти сәчыни кампанијә! Шанго нывыштыме ыштә нәзәр, вығандыме боәвон. Чокышон ғәбул карде, бә һәмәкәси хош омәј (бәмәшон жыго воте!).

            Тәғрибән һежо бә ружонәдә хәбә омәј ки, Москвәдә жијә “сипиришон” сәдо кардејдән әмәни бә мәшвәрәт. Де Исмоили шимон. И дастә гырдә быәбин. Хәјли гәпымон жәј. Бәнем, ы мердон вејни пијејдәшоне президент быбун, президентәти иддоәдән. Интаси ыштәни жыго бардејдән ки, быдә һички шәкбәлу ныбу чәвонку. Әве вотејдәбин ки, “ыштә номижә охојәдә мыәјјән бәкамон, ыштә дыләдә бәвыжнемон”. Чәј бәпештә вејә молағатонымон бин де һәмон одәмон. Чәвон һар гыләјни пијејдәшбе ки, әмәни окырны бәштә тәрәф. Иҹо молағат карде бәпештә, оәкырнин әмәни бә кәно, әвотин: “Әмә таныш бәкамон дешмә ыштә ијо быә одәми, шымәнән таныш быкән дејәмә ыштә одәми”. Әвотим ки, “чәмә жәго хаһишымон ни ки, шымә одәмон бызнәмон, ыштә одәмон дешмә таныш карде фикәдән нимон. Ыштән бәзнешон!

            Ым гыләј дырозә гәпи мывзује, де гәп жәј сә быә ко ни! Тикәјән дырыст бывотом, ым гыләј дәһшәтбе! Вахтәдә Озорбојҹонәдә јолә вәзифонәдә ко кардә, вәс ғәдәрәдә тәнхо гырдә кардә, әмма есә бәштә вәтән ше имконику мәһрум быә ым одәмон вотә сыханон мәсеәдә, дечәвон елми-сијоси сәвијјә таныш беәдә, одәми мујон биз-биз бејдәбин! Нә гыләј сијоси сәводи, нә нормал дынјовиндемони сојб ныбыә ым шәхсон һар гыләјни президентәти иддоәдәбе! И кәрә вотыме бәвон: “Шымә һа бывотән ки, президентәти иддоәдә нишон! Аз жыго сәрәсејдәм ки, бы мәҹлисәдә ҹәми и кәси президентәти иддош ни, әвән азим, ымијән ошко вотејдәм! Әмма чымы дешмә иддо һич ком ни, ым шымә ыштә које! Интаси ыми вотејдәм ки, ыштә арәдә и кәси быдән бә нав, деәј ко быкәмон, пешы ди бәбе!” Интаси осјо ыштә коәдәбе, чыхчыхәнә сә дожнејдәбе!    Жыго сыханон бәчәвон сә дәшејдәныбин. Әвон һәммәј жыго зынејдәбин ки, пулышон һестебу, ым вәс кардејдә бо президент бе! Һар гыләјнијән Русијә һакимијәтәдә ныштә, веј вахти хысуси хыдмәти органонәдә ко кардә гыләј танышышон һестбе. Әвон ымони нам-нами “душејдәбин”, чәјоән сыхан дојдәбин ки, “тыни президент бәкамон!” Ружи чәвон гыләјни дәвәтыш карде мы шәһри кәноәдә быә бә гыләј боһојнә ресторан. Гыләј полковник омәј. Ым президентә иддоәдә быә озорбојҹоныжи пијәше таныш быкә әј демы. Интаси ә мерди чәј сыханыш чәј гәвәдә огәте, вотыше: “Еһтијоҹ ни, аз Әбосзодә детобә ымружнә ружи виндәмни, әмма чок зынејдәм әј! Сори бәнав Боку тәләбыш кардәбе Москвәку ки, әј тәһвил быдән бәмә. Де президенти сәрәнҹоми мы нывыштыме бәвон ҹәвоб, бәвон вотымоне ки, бышән ыштә бызон бычовнән!” Мерди чәшон бә һәдәғә бешин! Ныштимон, ғычи нунымон һарде. Озорбојҹоныжи мәғсәди сәрәсәјм. Урус дәманде мыни бә зывон гәте ки, “шымә әлбәһол Толыши довләти ја мухаријәти мәсәлә мәнән. Мыборизә гәдә-гәдә, лынгә-лынгә быәнине. Һәлә ки кали мәдәни тәләбон бынән”. Аз рози ныбим деәј, веј сахтым гәп жәј, вотем, ки Озорбојҹони президент бејдә быбу, чәмә хәлғи һич ныбо мухтаријәтыш быәнине! Де ҹо шәрти әмә бә һички дастәк әбынимон!

            Мылхәс, хәјли гәпымон жәј. Әмма озорбојҹоныжи орзу чәј дыләдә манде. Әштимон. Бешеәдә бәнем гыләј конвертыш дәној бә уруси ҹиф! Бәдбәхтон! (Мыддәти бәпештә һәмон ә озорбојҹоныжи ахмәхәти нәтиҹәдә Русијә президенти тожније коо ә урус).

            Гыләјән мәсәлә. Ым камсәрон Озорбојҹони президентәти иддоәдәбин. Әмма чәвон һич гыләјни чә хәлғи һәхәдә һич фикирән кардејдәныбе. Жыбызын, жәго гыләј хәлғ ни! Әвон һәммәј бовәмандбин ки, Москвә президент бәка әвони. Сывој ымијән, ыштә президентәти мәсәлә де Москвә ермәни олигархон но-пегәт кардејдәбин! Ым чәвон озорбојҹоныжәти!

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|