ЧОКНЭ ГЭТЫМ БЭБЕ КАРДЕ ХЭРЭБОFИ ? / Толышпресс ТВ

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 15 голосов)
Изменить размер шрифта Decrease font Enlarge font
image
 
 

ЧОКНӘ ГӘТЫМ БӘБЕ КАРДЕ ХӘРӘБОҒИ?

ТМВ_05.09.2016_

                Чымы азизә быјон ијән һовон!

                Бәштә гиј гәтедәм ки, бәшмә гыләј сыхани вотеәдә, аз һежо һәјәҹон дәвонедәм, чумчыко һәтто чәмә толышон дыләдән жәго одәмон һестин ки, ыштә шәрһонәдә чымы сыханон бә ермәнијон ном бекардејдән јаанки бо ермәнијон ризи нәведән бәвонәдә. Мәсәлән, аз гәп жәјдәм толышонку архаикә һынди-Авропә чандә елементон ыштәнәдә огәтә ән ғәдимә авлодәти терминон һәхәдә. Әлбәһол комментаријонәдә нывыштедән ки, “ым чы ермәнијон кәләконин”. Аз гәп жәјдәм ки, ғәдимијәдә, лап ғәдимә Һынди-Ирони ҹәмјәти вахтонәдә толышон чич вотедәбин бә Хыдо, һәмән пучә гәпон жәјдәнимхо, де дәлилон исбот кардедәм ыштә вотә сыханон, әмма ижән кали одәмон ермәни зырно жәјдән, нывыштедән ки, һичмәсә, аз толышон де тыркон дышмен карде фикәдәм. Жыгоән ҹо чијон һәхәдә бәзнем воте. Интаси пијејдәмни ки, шымә вахти быстәным де жыго гәпон.

                Әмма гыләј чиј һәхәдә пиједәме бывотым. Гыләј камсәр һар вырәдә нывыштедә ки, мәвотбән, Толышстони Милли телевизијәдә и кәсән толыш ни, әјо ко кардәкәсон һәммәј ермәнин. Әлбәһол кали ҹо одәмон пәрчәм кардедән чәј ым сыханон, ҹурбәҹурә бемәноә сыханон нывыштедән. Аз ыштән бәштә мот мандедәм, чымы азизгирамијон! Чок, бывотәмон ки, аз ермәним, әмма толыши зывонәдә гәп жәјдәм, Толыши телевизијәдә шымә Инә зывонәдә бәрномон һандедәм. Ијо чы јавә ко һесте ки, гыләј ҹо хәлғи кинә шымә Инә зывонәдә һандедә. Охо чыми сәбәб бәвәдәј ки, толышон ыштә Инә Вәтәнәдә мәһрумин жыго чијонку. Әвон әјо ыштә Инә зывонәдә гәп жәј зынедәнин, чумчыко һукмәт ғәдәғән кардедә ыми. Гәп жәкәсонән бә ләғ нојдән, песыредән бәвон, әвонән пәшимон бедән бәштә жә гәпи! Есә шымә ыштән бывотән бәмы, нишо дој бәзнешон иглә тыркә кинә ки, әв толыши гәп быжәны јаанки бә толышә зоә бә шу оме бәпештә, толышә зывони умуты? Охо аз са фаиз зынедәм ки, нибәзнешон нишо дој! Чумчыко жәләвон ни зәмини димисә! Тыркә кинә ки вәју омәј бә толыши кә, чәј кәј одәмон һәммәј тырки гәп жәјдән, охојәдә ыштә зывонијән јодо бекардедән. Демијән пиједәшоне ки, хош бон бә тыркә вәју! Ғасбу аз ду вотедәм?

                Бәмы нишо быдән һич ныбо иглә тырк ки, әв гәп быжәны бә толыши, аз әлбәһол узрхаһи бәкам шымә вәдә! Әмма зынедәм ки, ни жәго тырк! Әве һаканә бәмы жыго омедә ки, кали толышон һурмәт нојдәнин бәштә хәлғи, бәчәј зывони! Һежо бывотәмон ки, Толышстони Милли телевизијәдә ко кардәкәсон һәммәј ермәнин. Ым телевизијән һежо ермәни нахшәје, чокнә ки чымы пијо вотә һәмон ә камсәр иддо кардедә. Бымәдә чы јавә ко һесте ки бо толышон, һәлә бывотән бәмы?! Охо ијо бәрномон дојдәмон толыши зывонәдә, һар гәпымон толышә хәлғи, чәј тарыхи, фәрһәнги, зывони, әдәбијоти, адәт-әнәнон, дини ијән мәзһәби һәхәдәј!

                Шымә бовә быкән бәмы, аз иминә кәрә толышә зывонәдә гәп жә Марсел Базени дештә чәшон виндеәдә, бахтәвәрым зынәј ыштән! Охо чокнә бахтәвәр ныбум ки, франсызә јолә алим, толышон һәхәдә бә јоли китоби мыәллиф чәмә Инә зывонәдә гәп жәјдәбе!

                Бә һәмон камсәрә толыши мәнтығи ујғун һәрәкәт быкомон, бәпе бәвәдә толышон һәммәј дымжон быдән бә Марсел Базени ки, әв толыши гәп жәјдә, толышон һәхәдә китоб нывыштедә! Бәлкәм ымијән ду вотедәм?

                Ермәнијонән бәнә Марсел Базени. Ым һәғиғәте ки, Ермәнистонәдә ҹидди мышғолин де толышон, Ғафғази-Каспи региони бынәјнә хәлғон институт номәдә хысуси али мәктәб һесте ијо. Ијо веј чијон зынедән толышон һәхәдә! Аз чокнә фәхр ныкәм деми?!

                Быдә ә камсәр нишо быдә бәмы Озорбојҹонәдә иглә мыркәз ки, әјо умутедән толышон? Ај нишо доше һа! Әјо толышонку зәһләшон шедә, мандә әвони умутын!

                Чымы азизон! Һәлбәттә, аз дәрәседәм ки, бәчымы унвон жәго тәһғирон нывыштәкәсон вејни Озорбојҹони бетәһлукәти хыдмәти коәконин, әвон де толышон номи нывыштедән ә сыханон. Ым чәвон које.  Әмма виндеәдә ки, кали толышонән чәвон вотәјон вотедән, аз авси-кифир бедәм! Һич ҹурә ғәбул зынедәним карде ки, жәго дәмәрәсә толыш бәзне бе зәмини димисә! Охо бәпе одәм чанә дышмен быбу бәштә хәлғи ки, жәго чијон бынывышты?! 

                Әве вотедәм бәшмә, чәмә хосә тәмшокорә толышон! Гирәм Толышстони Милли телевизијә сәросәр ермәнијонку иборәт бәбәјән, ижән бәпе толышон бәпе быпијошоне әв, дастәк быдән бәмә, чумчыко ијо толыши зывонәдә ијән толышон һәхәдә гәп жәјдән! Дынјо һәни һич вырәдә жыго гыләј телевизијә ни ки, толыши гәп быжәнын әјо!  

                Бы вырәдә ыштә сыхани сә кардедәм. Быбахшән ки, тикәј де емосијәм гәп жәј. Тикәј ыштә дылым тәј карде бошмә.

                Есән гәп быжәным бошмә ыштә әсос мывзу һәхәдә.

                Һар толыш, мәвужи, зынәнине ки, ком мәмләкәтәдә жиједә. Јодәдәонбу, бы незони Илһамә хаными воте ки, Озорбојҹон есә гыләј ҹындоон мәрәнгоје! Жыбызын, дынјо һар вырәо выжнијәшоне ијәндысә ахмәхә одәмон, вардәшоне бә Озорбојҹон. Һәни чы гәпон жәјдәнин чәврәј шәһрвандон, һәмән чы песохтә довләти сијоси елитә нымојондон?

                Чәврәј мәхлоғ һәни пемужијә бә жыго ахмәхә гәпон. Чәвон Елмон академијә ыштән гыләј ахмхон мәрәнгоје. Әјо ко кардәкәсон гәвомәј нывыштедән, ҹурбәҹурә чијон песохтедән ыштәку, бәвон пулән дојдән! Јодәдәон бәбе, бы незони гыләј физик иддо кардедәбе ки, мәвотбән, Зәмин гырдедәнијбән Һәши гырдо, мандәјбән ыштә вырәдә! Бы ружонәдә “Мыосир Мусават” партијә јол Һафиз Һоҹијев де шогирдон виндемонәдә вотыше ки, Мәһәммәд пејғәмбәр һичмәсә әрәб ни, гурејши ни, озорбојҹоныже! Бунән әв чичи әсосәдә ыми иддо кардедә: Мәвотбән, Пејғәмбәри либос, чәј заһири винлемон, чәј һәрәкәтон мандедән бә озорбојҹоныжон, јәне тыркон! Ым һәмон Һафизе ки, вотедә, пеш Илһами әв бәбе президент. Јәне вотеш пиједә ки, Илһам Әлијев Озорбојҹони охонә президенте, чәј бәпештә Озорбојҹони песохтә довләтән ни бәбе!

                Быми чы ном ној бәбе? Жыго рысвојәти һәни конҹо бәбе? Һәлбәттә иглә Озорбојҹонәдә! Иглә Озорбојҹонәдә Шејхулислам Аллаһшукур Пашазодә бәзне воте ки, чәмә зәмонә Һәзрәти Фатимә Меһрибон Әлијевәје! Әстәғфуруллаһ! Чымон шејх быбу ја сијосәткорон, һәммәј һежо и ағыләдән!

                Һәммәјсән мәрағин әве ки, чымы азизон, аз ымони вотеәдә, жыго мәләнгујә чијон нишо дојәдә, дәлилон бәрмалә нишо дојәдә, Озорбојҹони ҹәми елитә – муғәннијонкуш гәтә детобә Президенти гырдоәдә быә одәмон, әлбәһол вотедән ки, ымон һәммәј ермәнијон кәләконин! Жыго бызын, ермәнијон вотедән ым ахмәхә сыханон! Һәлә вотедән ки, мәвотбән, ермәнијон иддо крадедән ки, Иса пејғәмбәр ермәни бә! Сыхани рости, аз мәсәмни һич гылә ермәнику жәго сыхан, лап бымәсомән, бәчәј ыштәнијән ләнәт бәвотем! 

                Фактон бәчәвон чәш дәнојдәш, вотедәш ки, зә, толышон Хәрәбоғи ҹанги семинә тәрәфин, Хәрәбоғи тале гырд ангыле бә толышон еғволи, һа вотедәш ки, толышон жимон әзынин карде бы песохтә довләтәдә, ијо чәвон нишоне һич гылә ајәндә, Озорбојҹони һукмәти одәмон бә дастпочә дәшедән ки, толышон рост быкән бә ермәнијон вәјнә! Дијә быкән бәчәм бәрномон жијәдә нывыштә быә комментон, ыштән шојд бәбешон быми! Тыркон шыв-руж бә додин ки, ермәнијон һичмәсә һәлләм-ғәлләмә хәлғин, һич вахти нә ермәнијон жијәнин Ғафғазәдә, нәәнки толыш номәдә гыләј хәлғән быәни ијо!

                Иҹозә быдән, хәбә быстәным чы бекорә одәмонку: Охо ермәнијон чы гыношон һесте ки, толышон ҹанг кардедән, пиједәшоне озод быбун?! Әмә вотеәдә ки, тыркон быјә нин бо толыши, әлбәһол вотедән ки, ермәнијон омутедән толышон! Чиче, толышон ыштән фәросат рәседәни ки, бызнын ыми? Һәлбәттә, толышон һәм фәросат, һәм сәвод рәседә ки, бызнын һар чиј! Толышон бәнә тыркон бесәвод нин охо! Быдә тыркон сыбут быкән ки, дејәмә быјән! Бәлкәм бәвотен ки, Ланконәдә бә Һәзи Әсланови ном университет һесте, толыши зывонәдә дәрс дәвонедән әјо? Быдә бывотонәни! Бәлкәм толыши телевизијә ја рәдио һесте әјо? Бәлкәм толышә мәктәбон һестин әјо? Бәлкәм толыши зывонышон ғәдәғән кардәни әјо? Бәлкәм бәчәмә вәтәни Толышстон вотедән? Охо Ҹәнуб болгәси вотедән! Бәлкәм толышон гыләј фраксијәшон һесте парламентәдә? Бывотән, ај беғырјәтон!   Бывотән, быдә әмә бызнәмон, чиче чәмә быјәти? Һәмән ермәни чы гынош һесте бымәдә?  

                Һәмән ым кәхоби зоон огынедәнинән! Әвон бәштә тикәј кәноо дијә быкон, бәвинден ки, бә дәнгули мандедән, әмма ыштәнән хәбәшон ни! Дынјо һәммәј сыредә бәвон, әвон есә бој пијәдәшоне песырын бә толышон ијән ермәнијон! Һынәон һесте, бысырән! Даст быкәшән жыго бемәноә коонку! Чумчыко шымә вотәјон гыләј музә выззән чәмә гушәдә, толышә хәлғ рә-ди бебәше бә озоди, шымәнән сијодим бәбешон!

                Чәмә ә хосә Вәтәни һәмә номонышон нывыштә бә тырки. Варғәдизышон кардә Јардымли. Бочи? Гуја әмә зынедәнимон, чиче тыркон мәғсәд? Әвон толыши ризијән пәледән чы зәмино!

                Бәштә јод бијән, чандә толышон анә норынык кардышоне апрелә мангәдә. Бочи? Чумчыко Озорбојҹони һукмәти ду-ду елоныш карде ки, гуја Хәрәбоғәдә быә ди Толышышон гәтә! Чәмә хәлғ гырд нороһат бе ки, есә чә диј номијән дәгиш бәкан! Әве толышон һәммәј роһат нәфәсышон сәј, мәсеәдә ки, дујебән ә хәбә! Охо әвон зынедән ки, ермәнијон һич вахти дәгиш әкәнин чә диј номи. Охо ә ди чәмә хәлғи гыләј нышонәје бы зәминәдә! Чок бе ки, ермәнијә ҹывонә сәрбозон выртивылошон карде Озорбојҹони хысуси һозыәти виндә ләшғәр һәммәј!

                Әве ижән вотедәмон бәшмә: Јодо бекән ермәнијон! Әмә толышимон, ыштә кој чок зынедәмон! Әмә чок зынедәмон ки, чәмә дуст кије, быјә кије, дышмен кије! Чәмә мәрағонән мәлумин бәмә, мәтсәдән мәлуме бә ҹәми дынјо! Чәмә мәғсәд сәбәсожә Толышстон сохтеје! Һынәјон һесте, быгәтән чәсә нави! Бы коәдә бәмә даст гәтә һар гылә хәлғән чәмә дусте, чәмә быјәје! Ыми әбәди ыштә јодәдә огәтән!

                Охојәдә гыләј воҹибә мәсәлән бывотым бәшмә.

                Августи пенҹәдә moderator.az сајтәдә гыләј тыркә мијоннангырә алими нывыштәшбе ки, гуја әв ғәдимә дастинывыштәјон мытәхәссисе. Номышән Фирудин Гирал бәге! Чәј пучә гәпон һич де сыхани воте бедәни! Әмма бәпе тәһәри быкәм. Мәвотбән, Гирал бәги ғәдимә дастинывыштәјонәдә пәјдош кардә ки, озорбојҹоныжон ғалиб омән бә ермәнијон, сәшоне Хәрәбоғ. Чокнәшон кардә ым? Мәвотбән, әвон вотәшоне бә ермәнијон ки, шымә ғулишон! Ғулијән һичмәсә де ғырмоҹи комәги һәмул бәбе карде. Әве әв тәклиф кардедә ки, тыркон де ғырмоҹи бышон ермәнијон сәпе, бәвон бывотон ки, шымә ғулишон, бәвәдә Хәрәбоғи бәзнен сәј.

                Ым бемәноә вәрсәғе чап быә Озорбојҹони һукмәти сајтон гыләјнијәдә, аз бәшмә сә чавом! Чы мәмләкәтику һәни чич чәш кардедәшон? Охо чәмә толышон чок зынедән ки, тыркон иглә ермәнијон не, әмәнијән ғул һисоб кардедән! Әве бәпе чәмә хәлғ нишо быдә бә тыркон ки, ғыл кије, әғә кије бы зәминәдә?! Толыш һич вахти ғул быәни ыштә зәминәдә, ермәнијән ыштә зәминәдә! Ғул һежо ә тыркон ыштәнин ки, дасти вәши омән бәчәмә зәминон!

                Шымә бәзнешон воте ки, бы ахмәхон мәмләкәтәдә бә жыго чијон тәәҹҹуб карде лозим ни! Һәлбәттә, жәгоје! Әмма ыштә јодәдә огәтән ки, ә ахмәх ыштәни едаштедә алими ғәзинә! Әј вотеш пиједә ки, бы зәминәдә әғә иглә тырке, мандәјон һәммәј ғулин!

                Ыштә гәпи сә жәјдәм де гыләј зәрфәти. Бәштә чәшим варде ә сәһнә ки, тыркон де ғырмоҹи омән ермәнијон ја толышон сәпе. Ыштән тәсәввур быкән ки, чич бәбе чыми нәтиҹә! Тәсәввур быкән, бысырән!

                Сәломәт бымандән!

                Быжијы сәбәсожә Толышстон!

                Быжијы толышә хәлғ! Быжијы Толышстони Милли телевизијә!

 Толышпресс ТВ : ТМВ_05.09.2016_ЧОКНӘ ГӘТЫМ БӘБЕ КАРДЕ ХӘРӘБОҒИ?  
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|