ТОЛЫШОН ИJЭН ХЭРЭБОF : Tolishpress TV

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 27 голосов)
Изменить размер шрифта Decrease font Enlarge font
image

ТОЛЫШОН ИЈӘН ХӘРӘБОҒ : Tolishpress TV

ТМВ_02_09_2016_

                Чәмә азизә хәлғ!

                Сыхани рости, ымруж пиједәмбе ешғи, хыјзони, әғылон һәхәдә кали гәпон быжәным бошмә. Әмма бы сәфән чәмә сипириши дәгишыш карде чымы нијәт. Регионәдә пешынә вахтонәдә вағе быә кали ғәзијон фонәдә, әв омәј бә студијә, пеманде чымы отағи бәрәсимисә, парсәј чымыку: -“Лејла, маштә чичи һәхәдә гәп жәј фикәдәш?”. Аз керахт бим, мынг-мынг карде-карде вотыме бәј ки, ешғи ијән ҹо һиссон һәхәдә гәп жәј фикәдәм. Сипириш вынијәфышнәш карде, чәјо рыки-рыкини печығәј бәмы: “Ым чы гәпе ты жәјдәш, чымы азизә балә? Есә жәго гәпон вахте бәгәм? Бәгәм ты чәшәвәно кардедәниш бәштә гырдо-кәно, фик дојдәниш чичон бедән дынјоәдә? Әфа, әве Бокујәдә ижән вотедән ки, һичмәсә, ермәнијон һозын ки, ды-сеглә рәјони быдән бә тыркон, әвон ыштәнән шәв-руж, бәштә адәти мывофиғ, бә шојвојин ки, мәвотбән, Хәрәбоғ һәммәјәво чәвон быәнине!”.

                “Мамуле, - аз дамә бим, - охо ҹиддијә гәпон нин ымон, ки бәзне бовә карде бәвон? Охо ермәнијон һич вахти әдәнин бәвон Хәрәбоғи! Һич чә рәјононән һич гыләј әдәнин!” “Рост вотедәш, чымы балә, әмма јодо бемәкә ки, Хәрәбоғи гырдо актив геосијоси һәнәкон шедән. Әве ијо мәсәлә тыркон ја ермәнијон рози бе-ныбе һәхәдә шедәни. Семинә тәрәф һесте ки, пиједәше ым мәсәлә һәлл быкә бәштә мәнофе мывофиғ! Чыми һәхәдә гәп жәј лозиме! Чыми һәхәдә фикир карде лозиме! Вәзјәт һәјәҹонине, әве әмә чок-чоки рымуз кардәнинимон шә просесон!

                “Сыхани рости бывотом, - ижән аз дамә бим, - шинә маму, аз сәрәседәним шымә бы мәсәләдә нороһатәти ијән жыго бә хышм оме. Охо Хәрәбоғ бәке, әмә бәке, буни чанә дијәроје әв бәмә. Әмә иминә нубәдә фикир кардәнинимон ыштә хәлғи һәхәдә. Бә һәхәдә ки, чокнә быкәмон чәмә хәлғ перәхы тыркон зылмику. Хәрәбоғ, есә бој, озоде, ермәнијон рәсән бәштә мәғсәди!

                “Ышты сәһв һежо бымәдәј, чымы балә, - де хышми етирозыш карде бәмы сипириши. – Хәрәбоғ ышты зынәј ғәдәр дијәро ни чәмәку. Хәрәбоғи мәсәлә чәмә толыши мәсәлә гыләј поәје. Хәрәбоғи тале чәмә хәлғи талеје. Гирәм Хәрәбоғ тосә охој озод бызны манде, ермәнијон огәтон ыштә сәбәсожә довләти, Хәрәбоғ ыштәни мыдофиә бызно карде, бызын, Толышстонән озод бәбе! Ыштә јодәдә огәт, Хәрәбоғ чанә ғымәтинбу бо ермәнијон, анән бочәмә толышон ғыјмәтине!”, - сәш карде ыштә гәп сипириши ыштәку рози-рози.

                Чәјо әј вошнише ыштә пәпруз, роһат-роһати ныште креслоәдә, чәшоныш сәрутәј бәмы, вотыше: “Хәрәбоғ боәмә анә ғымәтине ки, гирәм ермәнијон ыштән рози быбон ки, әј быдән бә Озорбојҹони, әмә бәпе имкон ныдәмон быми! Чумчыко бы песохтә довләти хәј быә һар гылә просес зијонине бә толышон! Чумчыко, ым һәнијән ғојм бәка тыркон мовғе, әвон әлбәһол мәһв бәкан толышон, дәбәканден чәмә сәбәсожә Толышстони идејә! Әве толышон жәго һәмрәғин ки, Арсахи довләт һәнијән ғојм быбу! Әве бәты вотедәм ки, Хәрәбоғи мәсәлә – чәмә мәсәләје, толыши мәсәләје, ә мәсәлә Толышстони мәсәлә и поәје!

                Чәјо әј вотыше: “Де һәјфи ки, веј одәмон ијән чәмә чандә толышон сәрәседәнин ыми. Дыглә бәјәнды әкс нәзәр һесте бы мәсәләдә. Тыркон жыго фикир кардедән ки, толышон мыдофиә кардәнинин чәвон мәнофејон, чәвон гәрдәни кәшәнинин. Чәвон пијәј ыме ки, толышон ҹанг быкән песохтә Озорбојҹони әрози битовәти роәдә бә Арсахи вәјнә чәвон бардә ҹангәдә! Ермәнијон, есә бој, жыго фикирәдән ки, толышон бәпе нејтрал мовғе быгәтын бы ҹангәдә, иштирок ныкән бы ҹангәдә. Шәк ни ки, һәм тыркон, һәмән ермәнијон ыштә мәнофејон гәрдәни кәшедән. Әмма әмә бәпе нәзәрәдә быгәтәмон ки, толышон ыштә мәнофешон һесте бы мәсәләдә. Чәмә мәнофе ым ни ки, әмә әкс бешәмон бә тыркон, бә ермәнијонән хош боәмон дештә нејтрал мовғе. Нејтрал манде, һәлбәттә, мывофиғе бәчәмә хәлғи мәнофејон. Әмма һәнијән чок әв әби ки, әмә дештә иштироки дәгыш кардемон зынәбәј һодисон шемон. Јәне комәгымон кардәбәј бә Арсахи ки, быдә һәнијән ғојм быбу ым довләт. Охо чыми нәтиҹә әв бәбе ки, песохтә Озорбојҹон сәнибәтон формат бәбе, чәј вырәдә ды-сеглә ҹо довләт, һәмчинин сәбәсожә Толышстон бә әмәл боме! Нә ермәнијон, нәән тыркон иддон боәмә мәрағин нин! Чәмә де гыләј хәлғи дышменәти карде, дә иглә хәлғи дуст бе нијәтымон ни. Һәмә толышон, һәмән ә хәлғон ыштән сәрәсәнинин ыми! Чәмә һестымоне ыштә сијосәт. Чәј мәғсәд чәмә хәлғи тырки зылмику озод карде, ыштә сәбәсожә довләти сохтеје!

                Сипириши пәпрузыш чы пәпрузи думо вошнише, дујәвули бәштә синә пекәше-пекәше, идомәш карде: “Пешынә вахтонәдә бәмы жыго омедә ки, Озорбојҹони кали маргинал мәронәдә, веј чочинә које ки, һаканә һәтто Ермәнистони ыштәнәдән жыго гәпон шедән ки, толышонку жычиј бенибәше, бәвон вахт сәрф карде мәнош ни, толыши мәсәлән песохтә мәсәләје, чәј ајәндәш ни, кали ғыввон песохтәшоне толыши мәсәлә ки, чәјку истифодә быкән боштә мәғсәди. Де кон әсоси вотејдән ә ахмәхон жыго гәпон? Чәвон кали гылон вотедән ки, апрелә манги сыфтәдә ҹанг беәдә, мәвотбән, толышә лидерон хыјәшон карде, толышә хәлғикујән һич сәдо беныше. Жыго гәпон гырд ту-тәлбис бе исбот карде фикирәдән ним аз! Иглә ыми бывотым ки, әмә һич вахти ыштәни бә чәш дәфырсыније мәғсәди ко кардедәнимон! Чәмә хәлғән бәнә тыркон песохтә хәлғ ни ки, әмә бемәноә коон быкәмон, чәјоән чајхононәдә бәштә синә быжәнәмон ки, ымһа, виндыоне, фылон комон карде! Чәмә мәғсәд ыштә хәлғи иглә идејә гырдо сәфәрбәр кардеје. Кејнә вахтыш боме, бәвәдә әмә сыбут бәкамон ки, толышон чанә һозын бәштә озоди ҹанги! Әммә деми шәнбозәти әкәнимон! Ыми бәкамон ки, бырәсәмон бәштә мәғсәди!

                Һа чымы азизон! Сипириши бомы жә чы гәпон бәпештә, аз һәғиғәтән бә жыго гыләј фикир омәјм ки, есә ешғику, меһиббәтику гәп жәј вахт ни! Есә дынјоәдә ијән регионәдә шә просесон ҹидди тәһлил карде, есә мыборизә барде, мәғсәдинә һәрәкәт карде вахте! Иглә Хәрәбоғ не, Озорбојҹони кобәсонәдә, Русијә һајмәдә, Иронәдә, һәтто Суријәдә шә просесон һәммәј боәмә мәрағинин!  Чумчыко есә дынјо мәмләкәтон һәммәј сәросәр бандин бә ијәнды! Толыши тале есә иглә Озорбојҹонәдә јаанки Толыши ыштәнәдә не, һәмән Суријәдә, Тыркијәдә, Иронәдә, Ермәнистонәдә, Гырҹистонәдә ијән ҹо мәмләкәтонәдә һәлл бедә! Әмә бәпе һозы быбәмон бы просесон һәммәј, ыштә мовғемон быбу чәвон һәммәј һәхәдә! Әв ки манде бә Хәрәбоғи, һәлбәттә, чәвон һәммәјсән бә Толышстони нез ым довләте, әве бы мәсәләдә әмә нејтрал әзынимон манде!

                Охо әмә дәвардә семони висты һафтминә бәрномәдә вотәмонбе бәшмә ки, толышон һәғиғәтән Хәрәбоғи ҹангәдә семинә тәрәфин! Чумчыко һич гылә хәлғи тале бәнә толышон тале һәлл бедәни бы ҹангәдә! Әве әмә сәрһисобимон бы мәсәләдә, һежо тәһлил кардедәмон ым просесон, чәмә бы мәсәлонәдә иштирок иншаллаһ бәчије бә чәши. Һежо есәтән чәмә бы ҹангәдә иштирок чәшәчијә које!

                Быжијы чәмә азизә толышә хәлғ!

Быжијы сәбәсожә Толышстон!

                Быжијы Толышстони Милли телевизијә!

 

Толышпресс ТВ : ТОЛЫШОН ИЈӘН ХӘРӘБОҒ
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|