ВЕ hЫТИШ, ЗИJОН БЭКЭШЕШ

ВЕ ҺЫТИШ, ЗИЈОН БӘКӘШЕШ

Бәһмән Салеһ

Выләноз ве һанәлоғонбе. Мерзо Нәсир ве танә әжәни бәј ки, ве һытејдә. Выләнози ружи де әрки вотыше бә Мерзо Нәсири:

      -Де һар кәси шинә гәп жәјдәш, чокә сыханон вотејдәш. Бәмынән гыләј шинә сыхан бывот, быбуме хәј.

 -Ве һытиш, зијон бәкәшеш!

Выләноз петове нызнәј бә Мерзо Нәсири бы сыхани, ләвәрә вардыше:

      -Ижән бәмы пепушијејдәш! Ыштә сәј тикәј нојдәм ки, чәши һани быстәным, әвән ешејдә бәшты чәш.

Жыго пыт-пыт карде-карде вардыше тешт ноше мијонәдә, де ғыјзи пур кардыше, окардыше чәј сәпе ғәндә хокә, ов, ноше електрикә пичи сәпе ки, мурәббә быпаты. Арәо чиј дәныварде, Выләнози ноше ыштә сә бо һыте. Ве һыте, кам һыте, нызнәме. Кејнәсә електрикә ҹәрәјон обыријәбе. Пичән, тештән сардынбин. Нәвә мужнәә рост бе дәше бә тешти дылә, дәкырнише ыштә “биоложијә антенон”, вығандыше сигнал бо әмандә мужнон. Мужнон де һәзо омәјн бә ванг, һәммәј пур бин бә тешт.

Выләноз бәвәдә хәбәдо бе ки, һәни тештәдә мурәббә ныбе, и кујә мужнә мәстонә һытәбин. Выләнози жәше зиккә, жәше бәштә сәј. Ыштә мәнзыләдә де һанде-нывыште дастко быә Мерзо Нәсир ваште бә сәдо. Һамсијон жыго зынәшоне ки, кә сутејдә, әве ечыријәјн омәјн.

Мерзо Нәсири дылванди доше бәштә жени:

-Мангә маши ә нимән дојдәм, сәнибәтон бәпатеш. Әнҹәх огәт ыштә гушонәдә: “Ве быһытош, зијон бәкәшеш”!