ЧЫМЫ JОДЭДЭ МАНДЭJОН - 8

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 28 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

8

 

            Пемандим бәчәј мәслоһати, мандим. Нојабрә манги 10-дә чымы хыјзонән омәј бә Москвә. Чымы быјә гыләј кәш гәтәбе бә кирә, жијејдәбимон әјо. Февралә манги 23-дә шәви и нимәдә Акиф һәрәсон омәј бә кә дештә ды-сеглә дусти бә иҹо. Гәнҹәвыжә зоонбин, чок зынејдәбим әвони. Вотышоне ки, “Лјублиноәдә ныштәбимон  кафеәдә, гыләј чәмә авлод омәј Бокујо. Милисионере. Ныштимон, вотемон, хәј быбу, омәш? Гыләј сијоһиш нишо дој бәмә. 180 кәси ном һестбе әјо. Воте, и дастәмон, омәмон ки, ым одәмон быгәтәмон, быбәмон бә Боку. Бә сијоһијәдә ышты ном-фәмилијән һестбе. Әве рәјрә пәјдомон карде Акиф, вотымоне ки, Миәллими нијо лозиме карде”!

            Де шәви нышандышоне мы бә ғатәр, шим бә Твери вилојәти рәјон Балагој ғәсәбә Березајкә. Товыстонәдә и кәрә быәбим әјо. Акифи ханбозә гырҹистоныжә тыркә әғылон дукон ијән шәви бар око дојдәбин әјо. Маштәнәј омәјм чәвон тоно. Тикәј бәпештә хыјзонән омәј.  Жыгонә, мандимон әјо. Москвәдә әғылон һежо гушбәвангбин, гыләј тожә хәбә мәсенҹән, ја занг әкәјн бәмы, әвотин, јаанки чымы ә бебәхтә быјә ыштән әвој, әвоти! Де минволи, детобә 1999-нә сори һежо ловә-мыннәт кардејдәбе ки, һәлә вахт омәни, ерәд быжән сијоси коонку.

            1998-нә сори декабрә мангәдә кучымон карде бә һәмон вилојәти шәһр Вышниј-Волочек. 1999-нә сори позәдә фәғырә быјәм ижән омәј бәчәмә кә. Вотыме бәј ки, “һәни ловә-мыннәти хәјыш ни, зәмонә дәгиш быә, вахте, аз ижән бино кардејдәм бәштә навконә коон”! Фәғыр рози бе.

            Омәјм бә Москвә. Әјо таныш бим де Исмоил Шабанови. Деәј бә иврә 1999-нә сори нојабри 9-дә шимон Ајаз Мутәллибови тоно. Бочи чәј тоно? Чумчыко Вышниј-Волочекәдә дастәј гәнҹәвыж жијејдәбе. Әвон дустәти кардејдәбин де Ајази, рә-рә ше-омә кардејдәбин чәј тоно. Әвон чандә кәрә вотәшонбе бәмы ки, “ышты һәхәдә вотәмоне бо Ајази, хаһиш кардејдә ки, и кәрә бо, бывиндым әј”.

            Чәјо хәбә омәј ки, че Боку навконә прокурор, ағдамыж Мәммәд Гулијеви виндеш пијејдә мы. Хыдо рәһмәт быкә әј (бы незони – 2016-нә сори ғурбәтәдә бә рәһмәт ше!), чокә мердбе. Бәштә быјә вотыме ки, әмәни быбә бә гыләј чокә ресторан, соһбәт быкәмон әјо. Москвә мәркәзәдә гыләј боһојнә ресторанәдә ныштимон, хәјли гәпымон жәј. Акифән гуш дојдәбе.

Ымони нывыштејәдән мәғсәдым һесте. Чумчыко пеш чәмә виндемони, Акифи вотыше бәмы: “Зә, аз ыштән һәфтоғи бардејдәм ки, бочи детобә ымружнә ружи һаштәмни ки, ты ыштә кој быкәј! Есә дијә кардејдәм бә Озорбојҹони јолә вәзифәсојбон, виндејдәм ки, әвон ыштыку мәслоһатышон пијејдә, чәвон һичику сәшонән бешејдәни! Вәссәлом, сәм карде! Чы ружнәку жыгошә ышты быјә мандә ышты пештәдә, ғәләт кардејдән әвон һәммәј. Тосә охој быши!”

            Пешы мәсәме ки, әј веј выронәдә вотәшебән ым сыханон! Нәтиҹәш ымбе ки, 2002-нә сори сентјабрә манги 7-дә де Озорбојҹони һукмәти сифориши Акифышон бә гуллә жәј Москвә мијонәдә (38 сини дыләдәбе)! Чәј семангә ханымә кинә Фатимә манде сәғыр! Ым чымы толыши роәдә доә дыминә шәһидбе! Ә ружи ки аз дәрәсәјм ыштә хәлғи дарди, ғәссәмым һарде ки, тосә охој ҹанг бәкам! Чәј бәпештә чымы пыә дард омәј хәлғи дарди сәпе, Акифи дард һәммәјсә гон бе бомы, чәј ды сори бәпештә чымы хосә Инә дыли товыш ныварде, и тәрәфо Акифи дард, чә тәрәфоән чымы дард гон омәјн бәј. 2004-нә сори вотыше бәчымы һовон ки, “Балә, ыштә чәшым гырдыку карде, һәни Фәхрәддини  нибәвиндем!”, олхарте вәбәғыбилә, асбардыше! Коми бывотым, коми огәтым! Дардым бәгәм ије, дыје, даје? Дардым гыләј јолә банде! Шәһид бәгәм иглә чымы пыә, моә, быјәје? Хәлғи шәһидон һәммәј чымы шәһид нин бәгәм?!

            Ыштә пыә мардеәдә бәмәныбим, вотем гыноје! Дуст-таныш һәммәј ловә-мыннәтышон карде ки, аз нышум бочәј дәфн карде. Быјә мардышон бебәмы барде бә ди! Акифи мардеәдән ныбәмәјм! Әмма чә ружику жыгошә веј вахти иглә боәј бәмејдәм! Чумчыко чәј мардә шәви зынәме ки, пештым ғат бе! Мыныш наһаште бышум, ыштән ғырбон ше! Чымы дыглә тифил бы ғәрибә мәһоләдә һежо чәш әкәј иглә чәј рој! Әв һар сәфә омеәдә, вәјәванд әби чәмә кәдә! Есә әвон һәни һички рој чәш кардејдәнин...

            Ым сәтрон нывыштеәдән огәтем нызнәј ыштә чәшәарсон, зо-зо бәмәјм! Һәлә чан гылә шәһидон чәш кардејдәбин мыни, әмәни һәммәј, Хыдо бәзне! Һәлә чанә шәһидон доәнинимон, чанә һәлә бәмәнинимон ки, бә озоди бешу чәмә хәлғ?!

            Сиҹони бәмәјм, шыштыме ыштә дим-чәш, шим бә парк ки, тикәј фәхә быгыным. Бәнем не, огәте зынејдәним ыштә чәшәарсон. Мәхлоғику ајбым омәј. Бәме-бәме огардим ижән бә кә. Ныштим, нывыштыме ым ғәзәл: Озодкәмон Вәтәни!

 

  Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|