ГИН БЫБУ ОЗОРБОJЧОН! РОМОН БЭ ТОЛЫШСТОНЕ! - ВИДЕО

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 21 голосов)
Изменить размер шрифта Decrease font Enlarge font
image

ГИН БЫБУ ОЗОРБОЈҸОН! РОМОН БӘ ТОЛЫШСТОНЕ!

Тожә семон – тожә вәзифон

ТМВ-26.08.2016 с.

                Чымы хосә быјон ијән һовон!

                Шык быбу бә Хыдо ки, ижән бә хосә виндемон омәм дешмә! Шымәни әзыним воте, әмма мы бәрк пәшим гәтәбе бошмә ијән боштә азизгирамијә кој! Бовә быкән бәмы, ыштә ружон ашмардедәбим ки, кејнә тәтил сә бәбе, ижән шин-шини сыхан бәкам дешмә!

                Чәмә хосә хәлғ! Чымы ымружнә гәп програми характерәдәј. Јәне, бы бәрномәдә аз бошмә гәп бәжем ымружнә ружику бино быә тожә телевизијә семонәдә чәмә кардә сыханон умуми сәмтон ијән һәдәфон һәхәдә. Сыхани рости, чымы есә бәшмә вотәјон чымы ыштә фикирон нин.  Ым – Толыши Милли һәрәкоти рәһбәрәти ијән Толышстони Милли телевизијә бәшмә оварде. Әжом әве ки, быдә һар гылә тәмшокор де дығғәти гуш быдә бәмы, чок-чоки ыштә јодәдә огәты чымы вотәјон.

                Чәмә азизә һәмвәтәнон, азизә быјон ијән һовон!

                Чәмә бардә озоди ҹанги есә тожә мәрһәлә бино бедә. Әве бы бәрномәдә әмә бәшмә кырт-кырти мәлумот дојдәмон десә есә ыштә кардә коон һәхәдә. Мәғсәд ыме ки, әмә һәммәј бызнәмон ки, чичымон бә даст вардә, кон овандымон быә, кон нырәсәјонымон бешән бә мәјдон? Мылхәс, әмә зынәнинимон ки, бо ымружнә ружи чичымон һесте, һәмән сәмтымон бә коврә быәнине. Бә нәзә быстәнән ки, чәмә ијо бардә тәһлил гырд објективе, јәне әмә бәштә синә жәј, шәнбозәти карде, ыштә пәтә-питә пекырније, һәм ыштәни, һәмән шымәни бә даст дәној, бә хәлғи сәј кәжәлә пор дәжәне, ныбыә чијон һәхәдә гәп жәј фикәдә нимон. Чандә кәрә вотәмоне бәшмә ки, бо жыго мәләнгујә чијон һич вахти вырә быәни чәмә һәрәкотәдә, иншаллаһ, жыгошән әбыни, чумчыко әвон зәрәр бәван бәчәмә озоди ҹанги!

                Есән боән, дијәкәмон, чичымон һесте? Шымә чок зынедәшон ки, чәмә һәрәкот ыштә сәвә формал пегәтедә Толыши-Мығони Республикәку. Бы висты се сори дыләдә чәмә шә ро һежо һәмо быәни. Бы роәдә һәзо-һәзо гардышон, дә-дукон, етатон ијән петатон быән. Чандә сорон дыләдә чәмә ҹанг нијони шә, кали вахтон һич бә нәзән гынијәни, жыбызын, ни быә. Бы мәноәдә, чәмә ҹанги бә фајә рәсејәдә, чәј бә умумхәлғи ҹанг бејәдә, чәмә хәлғи милли руфи овҹәдә Ды һәзо пенҹминә сори Јереванәдә дәвардә Иминә Бејнәлхәлғә Толышшыносәти конфранси хыдмәтыш јол бе. Һәғиғәт жыгоје ки, мәһз де ә конфранси чандә сорон бәпештә дынјо иминә кәрә виндыше ки, толыши озоди руф мардәни, әв бәјжије, сәпоје. Тәсодуфи ни ки, дынјо бә конфранси реаксијә веј зуманд бе, чәмә хәлғән жыбызын һытәбе, әште, де тожә һәвәси ијән һәкәми идомәш карде ыштә озоди ҹанг. Һәлбәттә, чыми мәно ым ни ки, тосә ды һәзо пенҹминә сори әмә һичимон кардәныбе. Сыхани рости, чә конфранси дәвонијә ыштән һич мымкун нәби, гирәм әмә лозим быә коонымон кардәнәбәј. Әмә бә ҹангбимон, дынјоәдән виндышоне әмә, әве хариҹо реаксијә омәј.   Еһанә әмә ныштәбәјмон, бәвәдә бә һички јодән нәвојмон! Әмә ыштә зувышкә коон кардедәбимон, ыштә хәлғи сәдо роснедәбимон бә дынјо. Һәмән дыләтонәдә – дештә хәлғи ко кардедәбимон. Вәјәкуш гәтә детобә јаси, һар вырәдә дештә хәлғибимон, деәј ко кардедәбимон. Озорбојҹони шәјтони органон чанә рымуз быконән әмәни, репрессијә быконән, әмә гәдә-гәдә ыштә хәлғи милли руфи пеловнедәбимон, ыштә толышәти мәно ијән молјәти роснедәбимон бәштә хәлғи. Ән јолә комонән әвбе ки, толыши зывони нығо дој, әј умуте, тәдғығ карде саһонәдә хәјли коонымон кардәбе. Бә вахти, јәне ды һәзо дыминә сорику чәмә толышон Санкт-Петербергәдә “Толыш” номәдә ружномә дәрҹ кардедәбин. Әјо чымы пијо пеһандә проблемон һәммәј һәхәдә гешә дискуссијон шедәбин. Чәмә алимон толыши зывони луғәтон, чәј грәматикә нывыштедәбин. Пиједәше Толышстонәдә быбу, пиједәше дынјо ҹо мәмләкәтонәдә толышон вырәбәвырә әштин сәпо, биношон карде ыштә хәлғи һәхон тәләб карде. Мәһз бәвәдә иминә толышә маһнејон һанде бә дәб егыније. Толышә зывонәдә иминә маһне дискон бешин бә мәјдон.   Мәсәлән, чәмә толышә былбыл Исраил МәммәдовиБаһанд, Толышә былбыл” номәдә манһе диски шәһр Минскәдә дәвардә едаште мәросимәдә һафт гылә довләти сәфир иштирок кардедәбе!  Чәјо вејнә толышон дәмандин бо ыштә вәјонәдә толышә маһнејон һандовније, бо толышә вәјон дәвоније. Чандә гылә толышә муғәннијон, ансаблон бешин бә мијон ки, әвон һәммәј чәмә хәлғи мусиғи мәдәнијәти бә нав бардедәбин. Ымон һәммәј чәмә хәлғи милли руфи рост кардедәбин, хәлғи бәштә ыштәни огордынедәбин. Озорбојҹони һукмәт гырд оҹизбе толышон навәдә. Әв һич ҹурә чы просеси нави гәте зынедәныбе. Чанә гонән быбо, әмә бәштә вәтәни, зывони ијән фәрһәнги меһиббәт тәрбијә кардедәбимон хысусән ҹывонон дыләдә. Бовә быкән, әмә һәммәј бахтәвәрбимон ки, жыго гыләј кыртә мыддәтәдә чәмә кардә коон ыштә бәһрә дојдәбин! Һәғиғәтән, бә вахтон һәм әмә ыштән бовәмандбимон ки, толыши озоди ҹанг ижән певәшедә, һәмән дынјоәдә ыми тәсдығ кардедәбин. Әве ә конфранс чәмә бардә ҹанги објектив гыләј нәтиҹә, чәј нышонәбе. 

                Толышә хәлғи иҹтимои-сијоси фикири камиләти гыләј нышонән әв бе ки, ды һәзо чоминә сори чәмә информасијә әгентәти Толышпресс обәј, чәјоән Толыши Миллијјә Академијә бинош карде бәштә кој. Ымружнә ружи Толышпресс чәмә озоди ҹанги әсос трибунәје, ҹанги мәјдоне. Мәһз ым сајт чә вахтику жыго һәм бә дынјо роснедә чәмә хәлғи ҹанги һәмә мәсәлон, һәмән сәбәро кардедә чәмә ҹывонон бә ҹанг.

                Әве аз вотедәм ки, детобә ды һәзо пенҹминә сори чәмә һәрәкоти бә актив фазә дәвардә вахти әмә камә комон кардәныбе. Чәмә кардә һәмон коон зәминәшон сохте ки, һәрәкот овашты бәштә актив фазә. Әмә де тови шимон бә нав. Пешы дыминә толышшыносәти конфранс бе, “Толышистони  сәдо” рәдио омәј бә мәјдон, чәјоән әмә сохтымоне чәмә ым Милли телевизијә. Ә телевизијә ки, әв ымруж дынјо һар мәһолонәдә жијә, бә ҹурбәҹурә сијоси идеологијон мәнсубә толышон һәммәј гыләј воһид дастә ғәзинә мыборизә бардејро бә трибунә огардә.

                Ды сорисә камиши веј гыләј вахтәдә чәмә Милли телевизијә бә жәго јолә нәтиҹон ноил быә ки, бә ҹо хәлғон бәмиро дасорон лозим әбин. Милли телевизијә һәм вејнә толышоныш сәфәрбәр карде, һәмән һәзо-һәзо толышонәдә ијәти мәдәнијәтыш тәрбијә карде. Чыми нәтиҹә әве ки, есә әвон һәммәј һәм бә толышә хәлғи мәнсубәти мәсәләдә, чәмә нәнә зывони овҹи мәсәләдә и ҹур фикир кардедән. Тарыхәдә иминә кәрәје ки, ым телевизијә чәмә әдәби зывони, толыши зывонәдә журналистәти зывони бә дәрһәл рәсе саһәдә навко нывиндә коон кардедә. Ҹәми толышон шојд бин ки, чәмә зывон ҹо зывононсә һич бә пешо мандедәни. Әксинә, де дынјо овҹ кардә зывонон и рестәдә тәмсил бе һынәш һесте. Әмә шојд бимон ки, чәмә зывон тырки зывонисә һич бә думо мандедәни. Әмма жыго шәбәј, тырки зывони ебардәшбе чәмә зывон, бәчәј охој бешәбе!  

                       Толышстони Милли телевизијә чәмә толышонәдә меһиббәтыш пеловније бәчәмә фәрһәнги. Толыши ән дијәроә дијонәдә, есә толышон жимон кардә дынјо чандә мәмләкәтонәдә һәмәкәси имконыш пәјдо карде ки, ыштә нәнә зывонәдә бә телевизијә бәрномон дијә быкән. Сыбут бе ки, чәмә хәлғ чанә јолебу, чәј зывонән анә јоле! Кырт гыләј мыддәтәдә чәмә зывон ади мәишәти зывонику пегарде бе барзә мәдәнијәти, елми, журналистикә ијән информасијә зывон. Чыми чәмә хәлғи милли ыштәнифамәдә веј јолә хыдмәтыш һесте. Нәтиҹәдә, һәлә бы незони бәштә толыш воте ајб зынә, ыштә нәнә зывонәдә гәп ныжәнә толышон есә де фәхри толыш вотедән бәштә, бы зывонәдә гәп жәјдән, ыштә әғылон толышә руфәдә тәрбијә кардедән! Ым чәмә јолә ғәләбәје, чәмә азизә хәлғ! Ым ғәләбәје ки, әмә огәтымоне толышон ассимилјасијә просес, чәј навымон гәте. Әксинә, чәмә хәлғ дәманде бо тәрәғғи карде!

                Бә кали ҹо мәсәлонән чәмә мыносибәт дәгиш бе. Сәбәсожәти ијән сәбәсожә толышә довләти сохте идејә есә һаким быријә бә вејнә толышон. Озорбојҹони һкмәти тарс бешә вејнә толышон ҹоно. Есә әвон һәммәј ғәбул кардедән ки, чәмә иглә ромон һесте, әвән ыштә сәбәсожә довләти сохтеје! Толышон вејни есә чок сәрәсејдән ки, һәм Озорбојҹони довләт, һәмән чәј һукмәт чәмә хәлғи дышменин. Чумчыко чәвон мәғсәд чәмә хәлғи, чәј зывони ијән мәдәнијәти мәһв кардеје! Есә Озорбојҹони һукмәт чанән бывото ки, һичмәсә, әмә быјәмон, толышон һәни бовә кардедәнин бәј. Әвон чок зынедән ки, толыш быјә әзыни бе де тырки! Чумчыко быјә жәго мәһв әкәни ыштә быјә! Әнҹәх дышмен жәго кардедә! 

                       Ым һәғиғәт апрелә манги сыфтәдә быә чоружнә Хәрәбоғи ҹанги вахти ыштәныш һәнијән әјони нишош дој. Шымә тәсәввур быкән ки, мәсәлән, се-чо сор чыми бәнав жыго мәнзәрә һич бә ағылән вардә нәби. Бәвәдә жыго ҹанг быәбәј, бәвәдә Озорбојҹони һукмәт бә нав әдәј толышә рушинфикон, вәзифәсојбон, иҹтимои ходимон, мәҹбур әкәј әвони, әвонән гәвбәгәв әдәјн ки, толышон, мәвотбән, бә “ҹиһод” рост быәнинин тыркон роәдә, ҹанг кардәнинин бә Арсахи вәјнә! Һа дәмәдә ҹар әжәнин ки, гуја толышон быјән де тыркон, толышон ыштә ҹони ғырбон доәнинин Озорбојҹони роәдә! Бә гиј быгәтәмон ки, боштә хәлғи һич гылә перспектив, ајәндә нывиндә кали толышон бә вахти һәғиғәтән ым коон әкәјн! Кали толышон лап бә кәлләчәх беәшин! Әмма есә жәго ныбе! Һич гылә толышә рушинфик ја иҹтимои ходим, һукмәти вәдә дум чадоә һич гылә толыш беныше бә нав, иглә сыханышән нывоте бә ермәнијон вәјнә! Әмма чыми мәно ым ныбе ки, һукмәти тәзјығыш ныкарде бә толышон! Һәлбәттә, кардыше! Бәмәку мәлумот һесте ки, чандә гылә толышышон мәҹбур карде ки, әвон гәви сыхан бывотын! Интаси толышон нышин бы ко!   Толышстони ыштәнәдә ја Бокујәдә, јаанки толыши диаспорәдә и кәсән пәјдо ныбе ки, һукмәти һәвари быкәшы! Ҹәми и кәс Елмон Академијә ковон, гыләј пијәмерд беше бә гыләј маргиналә интернет телевизијә канал, чәјән һич хәбәш ныбе ки, бочи сәдошон кардә әв!

                Һа, чок бәчымы јод омәј. Озорбојҹони һукмәти и кәсышән сәдо кардәбе. Гыләј Хәрәбоғи иминә ҹанги ветеранышон сәдо кардәбе ки, әв дештә ныфузи бәлкәм тәсир быкә бә толышә ҹывонон. Һәлбәттә, һәмон ветеран әзни карде ныво. Әмма, мәвужи, әв тарсәбе ки, һукмәт жычиј бәзне карде бәчәј ов-авлоди. Әве омәбе. Әмма әјән хәјонәтыш ныкарде бәштә хәлғи. Әј вотыше ки, аз толыш ним, бә толышонән һич аидијотым ни. Демијән, һукмәти ым кәләкијән сәш ныгәты! 

                Чиче чымон һәммәј мәно, чәмә хосә хәлғ? Јәне ым чәмә толышон бә ермәнијон рәғбәти, бә тырконән нифрәти нышонәбе? Һәлбәттә, не! Чыми мәно ыме ки, чәмә хәлғ есә һәни чок сәрәседә ки, чәмә ыштә милли мәнофемон һесте, һәмән чәј һич ангыләтиш ни бә тыркон ја ҹо хәлғон милли мәрағон. Милли мәрағ быә вырәдә симпатијә ја антипатијәку гәп жәј мәнош ни. Хәлғи мәрағон де жыго чијон памједәнин! Чәмә хәлғ сәрәсәј ки, Озорбојҹони һукмәти бә Арсахи жә зәрбә һәғиғәтәдә бә толышон ыштәни зәрбәје! Чумчыко һукмәт Арсахи мәһв быко, чәј думо әв мәһв бәкарде толышонән! Чәмә сәбәсожә Толышстони орзу чәмә дыләдә бәманде! Әмә сәрәсәјмон ки, Озорбојҹони довләт ғојм быбо, әмә анән әрәснимон бәштә ноҹә! Әксинә, чәмә хәлғи мәрағон тәләб кардедән ки, ым песохтә довләт куфәнәкуф быбу, мәһв быбу ки, чәмә хәлғ озод быбу!   Ымијән сәрәсәјмон ки, чанә Арсах һестебу, анән Озорбојҹони һукмәти гирәвәш әбыни ки, толышон гырд мәһв быкә! Әве әмә вотедәмон ки, чанә Арсах һестебу, анән чәмә гирәвәмон һесте ки, бысохтәмон ыштә сәбәсожә довләти, озод быкәмон ыштә хәлғи! Әмә ве шо бедәмон ки, есә веј толышон һәни бовә кардедән ки, Озорбојҹони довләти нише ајәндә, ым песохтә довләт гин бәбе бәше! Мадәм ки чы довләти ајәндәш ни, бәпе толышон чәј һәвари быкәшын? Охо ым довләт чанә бымандо, анән чы зәмини бумијә хәлғон мәһв бәка! Охојәдә ымијән бывотом ки, толышон иглә чијән сәрәсәјн: Әвон шојд бин ки, есә дынјо димәдә һич гылә довләт һәни Озорбојҹони һәвари кәшедәни! Чумчыко есә дынјо һар вырәдә зынедән ки, ым довләт иглә хыјзони диктатурәје, чәј мәғсәдән ым хәлғон кисиб кардеје, әвони мәһв кардеје! Әве бочи бәпе толышон әј мыдофиә быкән, ыштәни шәһид быкән чәј роәдә, демијән дынјо һәммәј песыры бә толышон? Әве әмә вотедәмон ки, Озорбојҹони довләти есә иглә әвомон ијән ахмәхон мыдофиә бәзнен карде!

                Арсахи хәлғ һәни перәхә чы гәтымкорә довләти чанго. Есә нубә чәмәне, чәмә хосә толышон! Шык быбу бә Хыдо ки, есә чәмә вејнә толышон сәрәседән ыми! Чанә веј толыш сәрәсы ыми, анән чәмә бә озоди шә ро кырт бәбе! Бә Толышстони Милли телевизијә һәмон ҹанги вахти доә бәрномон детобә и милјон ним одәми дијә кардәше. Ым ыштән гыләј референдуме! Демијән толышон “не!” вотышоне бә Озорбојҹони довләти ијән бәчәј есәтнә һукмәти! Демијән толышон “һа!” вотышоне бә сәбәсожә Толышстони!

                Чымы азизә быјон ијән һовон! Чок-чоки дығғәт сәғандән бәчәмә регионәдә шә просесон. Жыго бышо, рә гылә мыддәтәдә региони хәритә гырд дәгиш бәбе. Һајми Ғафғазәдә ијән Гәдә Асијәдә һәм довләтон марзон дәгиш бәбен, һәмән ғыввон нисбәт гырдычып ҹо бәбе.  

                Ымон һәммәј әсос дојдән бәмә бывотәмон ки, жыго гыләј вахтәдә чәмә вәзифә хәлғи һәмә ғыввон сәфәрбәр кардеје! Әмә һәммәјәво дастбәдаст быдәмон ки, ыштә сәбәсожә довләти бысохтәмон! Толышстони Милли телевизијә жыгошә бәрномон вејни мәһз бы мывзујәдә бәбен. Рангрисинә гәпон вахт дәварде ше! Есә ҹидди мәсәлон һәхәдә ҹидди гәпон жәј лозиме! Есә ко карде вахте, гәп жәј вахт ни! Вәсе һәни һар выро әштә бесәводә одәмон чајхононәдә мәхлоғи сәшон хәроб карде дештә бесәводә гәпон!

                Тожә семонәдә әмә ожә ефир едаштедәмон бә һар гылә толыши! Чики бо воте сыханыш һесте, ым мәјдон, ымән шәјтон, бо бешу бә ефир! Интаси чәмә телевизијә ефир бо чајхонә бесәводә гәпон ни! Ијо сәводсојбә одәмон, мытәхәссисон, алимон быдә сыхан бывотын! Мәтарсән полемикәку, тәнғыдику! Ыштә фикирон бәрмалә бывотән! Быдә ҹо толышонән тәнғыд быкән әвони, әмма тәһғир ныкән! Де елми дәлилон исбат быкән ыштә мовғе! Әнҹәх де рој әмә бә нав бәзнемон ше! Жәләвон ҹывонә лидерән бәзне бе, рушинфикән бәзне бе, мәдәнијәти ходимән бәзне бе, мылхәс, ки чәмә хәлғи һәвари кәше фикәдәбу, бо бешу бә мәјдон! Вәсе һәни куләбынонәдә ҹурбәҹурә ајбләкәшон ној бә ијәнды! Есә актив диалоги вахте! Мәғсәдән мәлуме: чәмә хәлғи иглә идејә гырдо сәфәрбәр карде! Ым идејән сәбәсожә Толышстоне!

                Сәломәт бымандән, чымы азизгирамијон! Хыдо һәнијән зијод быкә шымә бә ијәнды меһиббәти! Хыдо һәнијән меһрибон быкә толышон! Һич вахти јодо бемәкән: Әмә һәммәј иглә мерди пешто омәмон, иглә нәнә зандәше әмә, әмә иглә хәлғимон! Жыгоән озод бәбемон иншаллаһ! Һежо ыштә јодәдә огәтән чәмә јолә дәдә Бобоки ым сыханон: Чыл сор нокә бенҹән, и руж озод жије чоке! Бәшмә һәммәј озоди орзу кардедәм, чымы хосә быјон ијән һовон!

                Быжијы сәбәсожә Толышстон!

         Быжијы чәмә хосә хәлғ!

   Быжијы Толышстони Милли телевизијә!

 

Толышпресс ТВ : Talyshistan Tv - 26 08 2016 : РОМОН БӘ ТОЛЫШСТОНЕ

  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|