ЧЫМЫ JОДЭДЭ МАНДЭJОН - 4

Разделы

Архив

Пн Вт Ср Чт Пт Сб Вс
12
3456789
10111213141516
17181920212223
24252627282930
31

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 9 голосов)
Изменить размер шрифта Decrease font Enlarge font
image

 

Фәрмони Фәхрәддин Әбосзодә

ЧЫМЫ ЈОДӘДӘ МАНДӘЈОН

4

Бешим омәјм бә кә. Шанго саат 11-дә чымы гыләј јеразә дусти – Һејдәри администрасијәдә ко кардејдәбе, һәмән ҹо институтәдә политологијә кафедрә мудирбе,  (пијејдәмни чәјән номи бынывыштым) зангыш карде бәмы. Рости, һич чәш нәкәјм. Һол-әһволыш гәте. Пешы воте, “мәсәме, Муртуз ижән ахмәхәти кардејдә. Бәты тәклифым әве ки, бој чымы кафедрәдә ко быкә!” Вотем, “зангы кардә, веј сәғби! Интаси дим дәмәнә, әзыним оме. Чумчыко аз чә кафедрәо мәғлуб әзыним ше. Һәлә бунәмон чич бејдә?”. Воте, “зә, әвом мәби, чич быәнине ки? Һич бәштә ејнән мәстән, ыштән занг бәкам бә Муртузи. Еһанә гуш ныдо бәчымы сыхани, бәшем бәвотем бә “Пијәмерди” (Һејдәри нәзәрәдә гәтејдәбе). Сыхани рости, аз ки есә бы креслоәдә ныштәм, ым ышты вырәје, ајбым омејдә бәштә. Чумчыко ты вахтәдә чәмә һәммәјсә вејә кооны кардә бо Пијәмерди”. Ижән сәғбим воте бәј. Вотем, “чымы Билә, сәғби ки, зангы кардә. Әмма бәты зијоныш бәзне бе, занг мәкәјш. Ышты иглә занг бомы вәсе. Чумчыко чымы анә канә дустон һестин, тосә есә зангышонән кардәни бәмы, гыләј сәбәсәломәтишон доәни ки, Хыдо рәһмәт быкә ышты Пыә!”

Маштәнәј, тәғрибән саат 10-дә Һәсән миәллими зангыш карде бә кә. Бәнем мерди кәш окардә, пәрејдә! Воте, “һа Биләма, ым чы које? Зинә Муртузи мыныш беабру карде, әмма есә бәмы зангыш кардә ки, Һәсән, бој һәлә чымы тоно, бунәмон Фәхрәддини кој чич кардејдәмон? Ым чы меҹузәје, ышты хәбә һесте чымику? Бышум ја нышум?”.

Зынәме ки, Дусти зангыш кардә бә Муртузи, әјән мәсәше чәј сыхан! Вотем, “бышән, һич нороһат мәбән! Һарчи, иншаллаһ, чок бәбе!”

Саат донзәдә омәјм бә кафедрә. Тикәј бәпештә мудир сыре-сыре омәј. Әлбәһол сәдош карде мы бәштә кабинет. Воте, “зә, Муртуз гырд дәгиш быәбе! Бәмы вотыше ки, Һәсән, быбахш мыни, һозијәтим карде зинә! Ым јеразон жыго отәшышон бә гәв гәтә ки, чәвон навәдә манде мымкун ни! Әмма әмә чәвон һар вотәј кардәкәс нимон, бәчәвон һар һәво рахс кардәкәс нимон! Аз ыштән Фәхрәддини чок зынејдәм, һич сыханым ни бәчәј сәводи ијән инсонәти! Чы мәслоһат зынејдәш, чич быкәмон? Бәлкәм әј овоштынәмон бә ҹо институт? (Зынәме ки, ым тәклиф бәј чымы шангонә Дусти вотәше. – Ф.Ә.) Һәсән миәллим воте, “бәнем Муртуз жыго нам быә, гәвым обәј, чич обәј! Чымы дыләдә чич һестбе, вотыме бәј! Вотыме ки, әј овоштыномон бә ҹо институт, бәс чәмә тожә факултә (Фәлсәфә, политологијә  ијән сосиал елмон факултә) ко чокнә бәбе, ки дәрс бәдо әјо?” Муртузи вотыше, “Зә, ты чич вотејдәш, ышты кафедрәдә 27 гылә миәллим һесте, јәне әвон әзынин әјо дәрс дој?” Вотыме ки, “һәлбәттә әзынин! Аз ә факултәм бә Фәхрәддини ном окардә, чәј сәнәдон, китобон, мыһозиронән вејни әј нывыштәше. Әв ныбо, ә дәрсон доәкәс нибәбе, университетән рысво бәбе республикәдә!” Муртузи вотыше, “бәс чокнә быкәмон? Ышты зынәјку, чә тожә факултә декан профессор Ҹәмил Әһмәдли рози бәбе, пегәты әј бәштә факултә?”. Вотем ки, “чымыку бочи парсејдәш? Ректориш, занг быкә бә Ҹәмили, быдә бо ијо, гәп быжән деәј!”. Зангыш карде, әнәһој дәныварде, Ҹәмил омәј. Муртузи ки вотыше бәј ым тәклиф, сыхани рости, Ҹәмил тикәј бәчымы хото гыније, әмма бәшты хото дамә ныбим...”. Вотем, “Ҹәмил миәллими чы гонә сыханыш воте бәшмә?”. Воте, “Ҹәмил огарде бәчымы тәрәф, вотыше: “Һәсән миәллим, бәшты хото ныгыны, аз Фәхрәддини бәшты кафедрә 27 гылә миәллими дәгиш әкәним! Һәлбәттә, аз де јолә хошәхоши розим ки, әв ко быкә чымы факултәдә!”. Чәјо Муртузи вотыше бәмы: “Һәсән, әмә ыми ыштә арәдә һәлл кардејдәмон. Әмма Фәхрәддин ыштән рози бәбе овашты бә Ҹәмили кафедрә?”. Ијо Һәсән миәллими ыштә синәш пекырније, чәјо вотыше бәмы: “Чымы балә, бы вырәдә гыләј ком гәтә, әмма зынејдәним, бәшты хош боме, рози бәбеш ја не?” Вотем, бывот! –“Вотыме бә Муртузи ки, “Фәхрәддин жәго зоә ни ки, чымы сыхано бешу. Аз вотејдәм бәшмә ки, әв рози бәбе! Есә ты чич вотејдәш быми?”

Вотем, “Һәсән миәллим, Хыдо шојде ки, аз һежо шымәным сипириш зынә боштә, һичән сәбәжим кардәни шымә. Ым чы сыхане, мадәм шымә жыго мәслоһатон зынә, аз һозы!”

Рәһмәтманд, есә ныбу, әште сәпо, мачәш карде чымы тәвил, вотыше: “Әһсән бәшты валидејни! Аз сәһвым кардәни тыни бә кафедрә ғәбул кардеәдә! Һәлол быбу! Чич бәка, быши тикәј ко быкә әјо, бунәмон чич бејдә. Әсос ыме ки, иглә бинадәмон, чәмә арәдә дыглә мәртәбә фәрғ һесте, рә-рә бәвиндемон ијәнды. Чы әжоән бе, димы ныдәжы, бој бывот бәмы. Хыдо хәј быдә бәты!”

Жыгонә, аз оваштим бә профессор Ҹәмил Әһмәдли кафедрә. Мәвотбән, јеразон шән бә факултә миәллимон тоно ки, шымә рози мәбән ки, Фәхрәддин бо ијо! Әвонән һәммәј бә и гәв дәрошон кардә ә јеразон бәчәвон омә вырә! Вотәшоне ки, бә Фәхрәддини чәмә ҹон ғыбон! Де минволи 1993-нә сори декабрә мангику детобә 1995-нә сори ијунә манги 25-и ком карде тожә факултәдә. 1995-нә сори ијуни 26-дә пәрәјм бә Москвә!

Идомәш һесте

 
  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (1 добавлено)

  • Опубликовано Ulduz Həşimov., 27 Авуст, 2016 11:20:54
    Mı ba vaxti tələbəbim Fəxi diyəsən bə kitabxanaçılıği fakultə ovaşdəde politalögiya kitobl müəllif əvbe bəmə dərs doə müəllimi şəxsən mı votme boçı bəs kitobo dərs dəvondəj, əmma müəllifı bəqəm kardənij- nıznəje cəvob doy . Amma dımınci kərə bə Boku omyə də Fəxi çəmə çaşön vədə ödəm kardə Anariku Kulətonoj xəbəm səy-Fəxrəddini kəj həvatə mıkrorəyonədə ni? bəlkə çəy vırəy zındəj? Bəmı vote jəqo odəm az zındənim. Tarsiku çəy nomı bə qəv vardej nidənıjbe. Tikəy bə peşt bəyjon doktorəi dojone .Fəxi votə proseson çəməçaçon vadə davardən.

Главные новости

|