ХИЛГЭТ ЭБЫНИ!

ХИЛГӘТ ӘБЫНИ!

Деғыж

Веј бәбе одәми имон синисә син оме-оме,

Бә одәми һоли бысут, дин-имоныш ғәт әбыни!

Пејғәмбәри вотәше ки, имоне Вәтәни пије,

Јодо беко хәлғи момин, чәј һич кәромәт әбыни!

Бә Хыдо имон вардәкәс ҹанг ныко хәлғи роәдә,

Жәләвони сәдә ағыл, чәј һич фәросәт әбыни!

Моминә толышон һестин, шәјтони думонә лынгин,

Хыдмәт кардедән бә тыркон, бы зори дәһшәт әбыни!

Даме беәдә, вотедән Имом Һусејни сәрбозим,

Куфә әһлин әвон һәммәј, чәвон ҹәсорәт әбыни!

Һестин ҹури моминонән, шәвы-руж бә аһу-зорин,

Онибәкан гәви бә хәј, жәго ғәромәт әбыни!

Һежо моминә мысылмон камил бәкарде имони,

Һар одәм бәзне бе момин, Фумәныж Беһҹәт әбыни!

Деғыж, мәжән бәштә синә дештә нывыштә ғәзәлон,

Веј бәбенһа ғәзәлханон, һар гыләш Хилгәт әбыни!