СЭНИБЭТОН ВЭJУ БОJ

СӘНИБӘТОН ВӘЈУ БОЈ

Бәһмән Салеһ

            Выләноз һијәдә де каште-пәле дасткобе. Даст-почоныш тулин-хокинбин. Рост кардыше ыштә сә, сәдо кардыше:

            -Вәјуле, вәшиме, тәшиме.

Мерзо Нәсир едјәсәј бәчәј сәј-по, зевылә сырә кардыше, вотыше:

            -Женә, ымружнә руж чы руже, зынејдәш?

-Ысәт чымы номән јодо бешә!

            -Ышты бәчымы кә вәју омә руж, чәмә вәјә чылминә сори тәмом быә руж!

            Выләнози жилыбути: -“Сығ егынијәбәј бә ружи, аз ијо вәју омәјм”, - вотыше, чәјо рост кардыше ыштә сәдо:

            -Һарчи быбо, ысәт бочи хәбә сәјдәш?

-Вотејдәм, јәни ымружнә ружи ышты лырдин-чыркин манде чок әбыни. Дәши бә һәмом, де татә ови бышышт ыштә дастопочә, чәш-гуши, чәјо бој быныштәмон, һарды-һәш быкәмон.

            -Вуј, мердә, ты зынејдәниш чымы вәрдыши? Әве де вәју омеәдә дәдә кәдә шыштәме ыштә даст-почә, и кәрән бә гур шеәдә мыни бәшыштен. Мердә, аз даст-дым бышышт ним!

            Мерзо Нәсири виндыше ки, вәју, нәвә, кәј хыјзон һәммәј гуш дојдән бәвон, ҹидди-ҹидди вотыше бә Выләнози:

            -Әризә быдә, зәхсо беши мәһкәмәдә, мәлоку тәлоғи быстән, быши бәштә дәдә кә. Ружи аз бомем, тыни бәгәм бәкардем, ыштә сипиришон бәвғандем. Тыни гирәм бәмы быдон, сәнибәтон тыни вәју бәдом карде. Вәјә бәкардемон. Ты дасты-дими, чәш-гуши бәшыштеш, чәмә кәј вәју бомеш. Сәнибәтон бәбеш чымы жен. Бәшт, бәшт, быши бәштә дәдә кә!

            Мерзо Нәсири ын сыханон вотыше де рыки, чәшыш пеғандыше бәштә нәвә-нәтиҹон, огарде дәше бә кә, дәманде бо сыре…

            Выләнози бә ҹиддиәти пегәтыше Мерзо Нәсири сыханон, де сати екујәше ыштән бә сој хоки, дыроз кардыше ыштә лынгон, бәмә-шивән кардыше бәштә шывәкон кује-кује:

            -Мерзо, аз чич кардәме бәты, ты бекардејдәш мыни, кәјку тожнејдәш?!..