БЭ ВАНГИН ЭМЭНИ БАНДОН!

БӘ ВАНГИН ӘМӘНИ БАНДОН!

Деғыж

Чокнә роһат бәбе инсон, гирәм вырәш быбо зиндон?

Чокнә роһат быбәмон ки, вырәмон быә сијо зиндон?!

Сығ егыны бә ружи ки, фырсәтымон дасто вадој,

Нызнәмоне довләти ғәд, чәмә хәлғ манде бә дастон!

Дәношоне бәнә пәси бә гыләј ҹо гәлә дылә,

Номышон ној Озорбојҹон, тырконән довләти сундон!

Ым чы довләтехо жыго, мәлум ни чәј нијә-моә,

Номәдә тырки довләте, ныштедән чәј сәдә кырдон!

Подшош ыштәнән чочине, гыләј сәмәје, корәфам,

Чәј иглә номе президент, кәхывандыш дојдә фәрмон!

Дучо бән бә хәлғи ҹони, чандә соре бәнә зәлы

Песпынедән чәмә хуни, налә рост бедә бә осмон!

Ружи осәмәј чәмә хәлғ, ыштә һәхон номыш гәте,

Мухтарыш бе пијәј хәлғи, вотен камсәрин толышон!

Деғыжим, сыханым ыме, Толышстони сохте вахте,

Перохнәмон ыштә хәлғи, бә вангин әмәни бандон!