22 ијун

22 ијун

Забил Мәдож

Бәдә хәбә певыло беј ҹанг омәј,

Кахти омәј даве бино ванг омәј,

Бә сәрзәмин че фашистон чанг омәј,

Дәро гынин бә ҹанг  һәмә толышон,

Сәрбоз бин бо ҹанги чәмә толышон.

 

Ҹанги хәбә омәј рәсәј маштони,

Мердон һәмә сәбәро бин чәспони,

Ҹәр кәшәбе бә Деғи бә Мығони:

-“Һитлер һуррәҹ кардә бәмә, толышон!”

Сәрбоз бин бо ҹанги чәмә толышон.

 

Һәзи, Мерзо, Балоғлани ном беше,

Фашистон кә хобе, чәвон ҹон беше,

Толыши пәрчәм ше бә Берлин беше,

Шоткомәшон карде әнә толышон.

Сәрбоз бин бо ҹанги чәмә толышон.

 

Чылыиминә сор вистыды ијун,

Чандә хыјзон манде, бе отәш бе нун,

Овәјзи ғәзинә рубе  зоон хун!,

Бә јас ныштин чәмә нәнә толышон,

Сәрбоз бин бо ҹанги чәмә толышон.

 

Бәвәдә – бә  ҹанги ружи и бимон,

Де и јәнды һежо дастбәгибимон,

Чич беј бәмә  ијәндыку  си бимон?,

Дәвилә бән ысәт һәмә толышон,

Сәрбоз бин бо ҹанги чәмә толышон.