ВОТЫШЕ - ВОТЫМЕ

ВОТЫШЕ - ВОТЫМЕ

Деғыж

Воте, чокнәјиш, һа Боли?

Вотем, нохәшим, һолым ни!

Воте, бәс ғәзәл нывышдәш,

Шери бә шери онојдәш!

Аз бә додим бо мәғалә,

Ты бәмы ғәзәл вығандәш!

Вәсф кардедәш ыштә ешғи,

Ым хәшије ја нохәши?!

Чиче, ты бәмы кәп омдәш?!

Ја мыни әвом зынедәш?

Вотем, шест синәдә мерди

шер нывыште нохәши ни?

Воте, ышты вотәј чиче,

Шаирәти нохәшије?

Ым чы сыхан, чы вотемон?

Бә шаирон танә-быһтон!

Вотем, ты рост сәрәс мыни,

Тәһриф мәкә ым сыхани!

Шаирәти Хыдо бахшәј,

Хәлләғи-Аләми нахшәј!

Кам одәм шаир бәзне бе,

Чокнә бәзнем аз шаир бе?

Де ғәзәл нывыште ни ки,

Хилгәт бе әзыни һички!

Аз дәсу-песу кардедәм,

Ғәзәлханон пеловнедәм!

Мотим аз, бочи шаирон

Овышон гәтә бә гәвон?

Кывин бәс чәмә шаирон,

Конҹон чәвон нывыштәјон?

Воте, бәс һандедәниш ты?

Һаруж вығандедәм боты

Чан гылә шаири шерон,

Јәндысә речинә шерон!

Әвон бәс шер нин, чичин?

Ым вотә сыханон бочин?

Ышты нывыштәјон ти-тин,

Чәвон шерон һәммәј пучин?

Вотем, нәјнорәти мәкә,

Бој шаирон авси мәкә!

Быдә ныкән мыку гырәј,

Гуш быдә бәчымы вотәј!

Ыштә хәлғи зоәј шаир,

Чәј дыли доже һа шеир!

Шаир хәлғи вәсф бәкарде,

Бәчәј дарди вәс бәкарде!

Воте, чок, коврә дәжедә?

Вотем ки, дылым дәжедә!

Воте, чич быә, сард гынијә?

Вотем, не, зә, дард гынијә!

Воте, чиче чә дарди ном?

Вотем, Толыше чәј унвон!

Воте, чокнә дарде ки ым?

Бывот, быдә аз бызыным!

Толыш бочи дарде бото?

Бә Толыши чич быә охо?!

Вотем, һәни чич быәнине?

Һәммәјәво ғыр быәнине?!

Дардон анбој Толышыстон,

Чы дардон нишоне сә-бын!

Есә ҹо дард јодо бешә,

Мир Насири сәдош ешә!

Ым дард боты гәдә дарде?

Хәлғи дарди ки бәвоте?

Кыве дардон вотә шаир?

Кије ә дыминә Насир?

Кыве озоди ҹанги ванг?

Вотеку быәм аз һәни данг!

Чандә мангонин бә ловәм,

Бо Насири дыво быкән!

Быкәшән Насири дарди,

Дарди сәпе омә дарди!

Шаири дарди бынвыштән,

Һәммәј бә Хыдо ловәкән!

Чәј ын мәрәз бышу, Хыдо!

Ижән баһанды “Гиләво”!

Әве чәмә озоди чо,

Маһаштән әв окышијо!

Конҹон бәс чәмә шаирон,

Ләғләғә карде маһирон?!

Бочи бәчәвон нәзә ни?

Толыши дард “мыһи” дард ни!

Чан соре бә ловәм бәвон,

Мандәм авәрә-вијәвон!

Бешедәни чәвон сәдо,

Ым чы дарде, ым чы бәло?!

Һа чәмә хосә шаирон,

Пијә, ҹывонә шаирон!

Овардедәм бәшмә ижән,

Гушәләхә мәкән мәшән!

Бызнән сыхани ғыјмәти,

Шодән бә кәно ғыјбәти!

Ијәнды ғәди бызынән,

Ҹон бывотән, ҹон бымәсән!

Есә ләғләғә кај вахт ни,

Толыш бә чәше әмәни!

Һәммәј дастбәдаст быдәмон,

Ыштә хәлғи перохнәмон!

Гырдәбән бә Насири сә,

Быдән дејәнды сәбәсә!

Бынывыштән ҹанги шерон,

Деғыж бәшмә һәммәј ғыбон!