БЫhЫТЭН

БЫҺЫТӘН

Вуғар Һәмати

Жыго зындән һежо, га бә нав егындә һытәкәс?

Һежо һар бәндәку ве бә думо мандә һытәкәс,

Ыштәни зындәни, әнҹәх һыте зындә һытәкәс,

Ыштә умри бәнә шатә, путә кындә һытәкәс,

Охој и руж бедә пәшмон, быһытән, чок быһытән!

Бәшмә чашон һани ғырбон, быһытән, чок быһытән! 

Әнә роһат быһытән ки, шымә руфән быбу шат,

Марде бәјсә чоке, Валла, шымәни кардә дығат,

Ысә Овшумдә әҹәб, боштәро кеф кардә ҹәмат,

Дијә кардән шымә бә Овшуми кәшдән сәләват,

Шымә дылдәј һәлә шәјтон, быһытән, чок быһытән!

Бәшмә чашон һани ғырбон, быһытән, чок быһытән! 

Ысә милләт һесе ки, бә Јупитер, Марсе шедә,

Дыштә ағли зунә ды һарчи бә ҹанге дәшедә,

Ысә чы әҹнәбијон космосәдәј чо вәшедә,

Овшуми нәвдә ҹәмат, ды Һәши шикил кәшедә,

Бошмә әнҹәх һыте һостон, быһытән, чок быһытән!

Бәшмә чашон һани ғырбон, быһытән, чок быһытән! 

Ныбо дасти зу әгәм, кардедә ве ко зывонән,

Ды сыханон бәмәнән дојдә нышон ро зывонән,

Шымә чандә быһытон, гин бәбе чы мо зывонән,

Быһытән, зу боме бәшмә зывони ҹо зывонән,

Виндәшон ки пуре мәјдон, быһытән, чок быһытән!

Бәшмә чашон һани ғырбон, быһытән, чок быһытән!

Чики гуш мәсдә сыхан, бә гуши памбә дәжәно,

Одәми сә бәбе сәғ, ыштәсә јол гәп ныжәно,

Һар сыхани мәмәсән, чумки бымандән бә кәно,

Шымә сәјку бә пе мәло маму лајла быжәно,

Пуре шәјтон ысә һар тон, быһытән, чок быһытән!

Бәшмә чашон һани ғырбон, быһытән, чок быһытән!