ТОЛЫШ hЭНИ Э ХЭЛF НИ!

ТОЛЫШ ҺӘНИ Ә ХӘЛҒ НИ!

Де Әли Насири дарды-дыл

Деғыж

I вәслә

...Беше ше охон меһмон,

Воте хәј быбу шәвон!

Шаир воте: “Хәј бә вә,

Хәј бешу бәштынән вә!”

Мандимон әмә секәс,

Ты, ышты дард ијән аз.

Јодо бекарде ты дард,

Ты шодој бә гәпи пард.

Вотеш, аз жыго нәзним,

Ыштәни ҹојли әзним.

Дардон лонә чымы дыл

Дардику быәбе һыл-һыл!

Жыго әзним, чы хәлғи

Һолыш мандәни һәни!

Чы хәлғи тәпәрыш ни,

Озод бејро һынәш ни!

Сыханым бәј рәсдәни,

Милләт мыни мәсдәни!

Һежо бә но-гырәјбим,

Толышон конҹо мандин?

Бәј һич окардәкәс ни,

Шаири зынәкәс ни!

Де һәјфи бә зәһмәти,

Анә нывыштә шери!

Сыханон мәсәкәс ни,

Бәмы һај доәкәс ни!

Вотем бәмардем бәшем,

Һич бә јод дәнибәшем!

Чәмә хәлғән бәмарде,

Номышән нибәманде!

Чымы нывыштә шерон

Бәнә вој бардә порон

Гин бәбен даштонәдә,

Даштон ҹо дастонәдә!

Ҹо хәлғ, ҹо зывон бәбе,

Толыши ном ни бәбе!

Ым дарди пиш карде мы,

Ипыллоғыш карде мы!

Шинә ҹоным бе һыл-һыл,

Бы дарди тов бәва дыл?!

Сәдомән еше һәни,

Бомы һиҹо чорә ни!

Әве, һа чымы Билә,

Ғәдырбызынә Билә!

Аз номәјм ки, чок быбум,

Ијо мыолиҹә быбум!

Аз омәјм ки шымәку

Һәлол-һиммәт быстәным!

Әмма чәмә толышон

Ношоне мы һәдәјон!

Бәнем, һәни ә хәлғ ни,

Ије бәнә мырхути!

Чанәшон пиједә мы,

Чанә ашығин бәмы!

Шәв-руж демы бә иҹон,

Һәммәј демы быән и ҹон!

Дастә-дастә омејдән,

Бәчымы сә чамејдән!

Бочиме һәни лығмон?

Толышон  – чымы лығмон!

Һәни мардеј фикым ни,

Бо мардеј һич һәхым ни!

Хәлғым мыни бә чәше,

Сыхани әләтәше!

Зу бәдом бә ғәләми,

Ја Мәһәммәд, ја Әли!