БЭТЫ FЫБОН КЫШТЕ ВОДжИБ НИ…

БӘТЫ ҒЫБОН КЫШТЕ ВОҸИБ НИ…

Бәһмән Салеһ
МИНИАТУРӘ СЫРӘҺУЈОН
  

         Маги гәтә нохәшини шанго һанәдә виндыше, әммомә бә сә, пештәдәш кавујә кышти и кәс бәј вотејдә:

         -Пијејдә хәш быби, быкышт гыләј ғыбон, бахш быкә бә чыл кәј.

         Нохәшин әште һытә вырәо. Ғәһәри гәтыше чәј хыртә, вотыше ыштән-бәштә:

         -Кәјбәсә ниме мол-мәлә ки, ғыбон быкыштым. Ниме пул-микнәт. Ниме чокә ғәзәнҹ. Да сорон нохәшиним. Кәдә пијәмерд, пијәженимон, вист мәнот пенсијә сәјдәмон, әвән һич бәчәмә чај-ғәнди рәсејдәни…

         Нохәши екырә гәтыше әв, һа дыроз бе. Пијәженыш нороһат бе:

         -Мердә, бочи һытејдәниш? Ыштәни быдә бә һан, чәшон викә, екырән обәкырије. Дәво сә быә, машки рәбәдә бәшем бә јолә әптек, бәһыријем бәвардем.

         Нохәшини гәп жәше боштә жени ыштә һан, дыкәсән бәрк тарсәјн. Һынәшон һестышоне, гир нишоне. Хофи пегәтыше жены-мерд: Бә һан дәшә мерд, ҹоным бәј ғыбон, донзәминә имом бәбе һа! Чокнә быкәмон чәј вотәј?  Бышум бо печыне? Бәлкәм и кәрә бә Мерзо Нәсири овардәмон, мәслоһати быкәмон деәј…

         Субәдәли пијәжен ше Мерзо Нәсири кәј. Вотыше бәј һоли-ғәзијә. Мерзо Нәсири һырише мер-мивә, ләл-гыл, шини, бырз, чај-ғәнд, омәј нохәшини палијо. Нохәшини гәп жәше боәј ыштә виндә һан. Мерзо Нәсири вотыше:

         -Коон һәммәј бандин бә Хыдо! Ышты болә нун, ғәзәнҹ-бырынҹ ныбо, Хыдо әпинише ыштыку бә ҹәмати дојро ғыбон, еһсон, фытрә-сәдәғә, хумс-зәкот дој. Әслән ә чијон бәпе бәшмә доә быбун. “Ғырон” бәмә жыго вотејдә.  “Ғырон” че Хыдо һыкме. Пејғәмбәрән (сәәс), имомонән (ә) бә Хыдо табен.  Имомән чок зынејдә ышты ружгори. Нә имом, нән пејғәмбәр бе әзыни һанәдә ышты виндә одәм. Ғавәр бә либос дәшә шәјтонебу. Ышты бә Хыдо быә шукри, итоәт ијән ибодәти, әнәдә сәбри-тәһәммули виндә шәјтони пијејдәше ки, ты тикәјән бә зәлоләт дәши!

         Бәшты һан бочи дәшејдә ки, быдә дәшу бә әрбобон һан ки, һаруж гыләј него кыште бәзнен! Бәвон бывоты ки, ғыбон быкыштын, бахшә быдән бә бечизон, тынијән јодо беныкән.

         Бәты ғыбон кыште егынејдәни, пијәмерд!

         Мерзо Нәсири чы гәпи бәпештә нохәшини аһ кәшәше, нызнәме тохтә бе, ја не? Әнҹәх дырыст зыне бејдәбе ки, Мерзо Нәсирику ве рози манде…