КИНЭ

КИНӘ

Деғыж

Ыштә дылым бәты дој, ты әвы канде, кинә,

Нәзним анә ношим аз, чы рә мы “һанде”, кинә?!
 

Аз бәты бә ловәбим, окә јашмәғи бомы,

Нывоте “һа” бәмы ты, чанәм еһанде, кинә!
 

Бомы ты Зулејха биш, дустәғы карде Јусиф,

Хәбә ныстәј кыве әв, марде ја манде, кинә?!

Аз ешғи дивонәбим, мәвотбән, ты савдогор,

Есә һәни зынедәм ешғы бә чанде, кинә! 

Тобәномә бе бомы, ешғи јол кардыше мы,

Ты ыштә ғәјди быбә, ым бомы панде, кинә!

Һич гыном ныкарде мы, гынокор иглә тыбиш,

Тыниш ым ешғи быкышт, ым гыно банде, кинә! 

Деғыж умуј бә Хыдо, Әв бәдо ышты ҹәзо,

Јодо бекарде Ғырон? Бочи наһанде, кинә?!