ШИНЭ МО

Шинә мо

Забил Мәдож

Бәшты дыли дарди ғыбон,
Лынги житон гарди ғыбон,
Чандә кәшә сарди ғыбон,
Чымы кәшон зу, шинә мо!

Ғыбон бәшты дылы сырон,
Бәшты кәши, лынги, гырон.
Бәшты лынги гынјә вырон,
Һежо жә  јаһу, шинә мо!

Чанд әзобы кәшә, додо,
Бәдә ружы чәшә,додо.
Бә ҹони жә һәшә, додо.
Чымы чәшон ру, шинә мо!

Ышты ғарзи ки бәзне дој?
Шәјә екардә бәнә мој,
Ыштә чәшон зу бәмә дој.
Ғыбон бәшты му, шинә мо!

Һәм дәдә биш, ты һәм нәнә,
Ыштә сәјсә отәш сәнә,
Ғырјәтәдә мерди һынә,
Че вәнәшә бу, шинә мо!

Кәфшәни әгардиш бә руж,
Де шәви әгәтиш бәрдуж,
Дастон әбин ышты колдуж,
Чәјо әбин лу, шинә мо!

Бә јодыме әв мы һәлә,
Чәстә әнәјш сәјсә шәлә,
- Педә, һајди, шинә балә,
Дастдә гыләј чу, шинә мо!

Мердәти панд тыкум гәтә,
Де сыхани мыны ватә,
Гәпи әкәјш һосто, сатә,
Нәвотиш һич ду, шинә мо !

Чичон кәшә, зындә Хыдо,
Һа чымы речинә додо,
Забил бәты ғыбон, фидо,
Һәни бедәм ку, шинә мо!