Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
БО МАШТӘНӘ ОМӘГӘТ
Бәһмән Салеһ
МИНИАТУРӘ СЫРӘҺУЈОН
Кәблә Шири чынығәти бә номбе. Тожәбәтожә де Мерзо Нәсири хышәванд быәбе. Ружи Мерзо Нәсир омәј дештә хыјзони бә хышәванди кә. Кәблә Шири кәхыванди де шој-вој ғәбул кардыше ыштә хышәвандон: беше бәчәвон нав, сә-зывон, һол-әһвол… сәғандыше тожә былындә нимдар-болышнә, вырәбәвырә кардыше меһмонон. Әнәһој дәныварде, обәј чајә сурфә, бә арә омәј ҹурбәҹурә мер-мивә, ләл-гыл: сеф, һулә, сујә кырчә и.ҹ.ч.
Кәблә Шири һар сәфә бә сурфә чији омеәдә едјәсејдәбе бәштә кәхыванди, јәни “чич кардејдәш, һәни вәсе, кәјән очынејдәш нојдәш бә сурфә”?
Кәхыванди ноәшбе ыштән бә әнәвиндәти, сурфә дәвоштејдәбе, һар сәфә де еһанди бә хышәванди вотеш пијејдәбе ки, «ым һәлә чәрәзе, бо һарде һозы быбән, ыштәни си мәкән. Сукләбозбаш, мојәләвәнги, дәпарзәпыло патејдәм. Бәшмә омә роон ғыбон, шымә ве-ве хәш омәшон»!
Кәблә Шири вош екардәшбе бәштә, ныштәбе пенә сәдә, кам-кам гәп жәјдәбе, һаканә “һа”, “не” вотејдәбе. Жыбызын, кыләкортдәноәшонбе бәчәј ләвә, бырҹи-бырҹи һардејдәбе…
Мылхәс, сәдријә әтринә бырзо патә быә пыло омәј бә сурфә. Бисмиллаһ вотә бе. Хышәвандон едјәсәјн бә Кәблә Шири ки, әв дәманды бо һарде, әвонән бино быкән. Бәнен Кәблә Шири бә думот шә. Вотышоне:
-Кәблә, бисмиллаһ!
-Аз зинә һардәме, ижән маштә баһардем. Шымә коон ныбу демы, шин-шини бәһән. Нуш быбу!
Фикыш ымбе ки, меһмонон пәрт быбун, ја кам бәһән, јаан һич нәһән. Патәјон бымандын. Кәхывандән быманды танә жијәдә.
Мерзо Нәсир чок бәләдбе бә Кәблә Шири. Чок һандејдәбе чәј фикри:
-Хосә хышәванд, әмәнән ыштә кәдә һардәмонбе сујәмој де дизәпыло, омәбимон. Әмә һежо чај пебәшомемон, чәрәз баһамон. Зәһмәт ныбо, ыштә ын ләзизә патәјон екән бәчәмә ғабон, бәбардемон шеәдә, баһамон ыштә кәдә! Кәблә Шири бахшән огәт бо маштәнә, маштә баһа!
Мәвужи пучкинә жәшоне бә Кәблә Шири! Ваште ыштә ныштә вырәо, рәјрә вотыше:
-Не, не, чымы бахшә омәгәт бо маштәнә! Вәши гәтыме, ысәт баһардем!Хышәвандон ғабонән пур карде лозим ни! Һардејдән, бәһән, һардејдәнин, ыштән бәзнен! Бисмиллаһ!