Тарсику

Тарсику

Маис Тәмкин

Нодузон дуз бедән, дузон гардедән,
Сыхан бардәкәсон сыхан вардедән.
Бә зылми табемон, һыкм кардедән,
Мәҹбур пегәтдәмон шәлә тарсику.

Ҹо кај зындәнимон шәјтони ҹыно,
Жәјәдә жәјдәмон тәвә дој быно.
Де чәши виндәмон номерди гыно,
Воте зындәнимон чолә тарсику.

Рывосон де һилә сә епотедән,
Вакон шини-шини сыпә патедән.
Зандәго бә балә “бе рә” вотедә,
Дамә бе зындәни кәлә тарсику.

Шыти дим сипије, хомә зардранге,
Мост чәш кардедә һа, нијә бә ванге!
Мост бәсә рујәни де дуј бә ҹанге,
Дылыш гыппә кардә сәлә тарсику.

Ын дардон виндедәм, дылым тәведә,
Мәвотән дард кәше бомы рәвједә.
Морә кәно һардә, кәно нәведә,
Нез оме зындәни тәлә тарсику.

Маисән ве бандон, тәпон зынедә,
Сәрһәдон зынедә, чәпон зынедә.
Ве сырон, сыханон, гәпон зынедә,
Ошко кардедәни һәлә тарсику.

“Шәвнышт” №4 –ијул, 2006 с.