ДЭДЭШ JОЛЭ ЗЭРДУСТ, НЭВЭШЭН НАСИР!

Чәмә чәшрушни : Әли Насир - 61

ДӘДӘШ ЈОЛӘ ЗӘРДУСТ, НӘВӘШӘН НАСИР!

            Редактори бәмы вотыше ки, Әли Насири 61 син дамејдә.
            Вотем, хосе-мыборәке, Чәј са сини хәбә бо!
            Воте, тәбрикномә лозиме нывыштеј, шесты и сори тәбрикномә!
            Вотем, ијо рози ним деты.
             – Бочи?
            Вотем, әмә мајә манги 1-дә Әли Насири И СИНИ ид бәкамон Хыдованди, тәбрикномән бы һәхәдә бәбе.
            – Ымән тожә бешә?
            – Тожә бочи бешә?
            Вотыме: – Һич тожә-канәш ни, һежо жыгоән быәнине!
            – Гушым бәтыкује – әј вотыше. – Бывот, быдә азән дәрәсым.
            Вотем, чымы Билә, бә јодебу, дәвардә сори бы ружәдә әмә идымон карде Насири 60 сорнә јубилеј. Росте?
            Воте, бәле!
            Вотем, бәле бә шәкә! Чыми мәно әвбе ки, әмә ријәкәшымон ној, гыләј марзымон кәшәј Насири жимони ријәсә. Бахшымон карде чәј жимон бә “иминә 60 сори” ијән бә “мандә сорон”.  
            Воте, “60 сори” дәрәсәјм, бәс ым “мандә сорон чичин?”
            Вотем, һа Биләма, одәм һесте, лап 150 сор бәжије, әмма чә сорон һич гыләјни бә чәшрушни нибәгыне! Одәмејәни, жимон бәкарде боштә, чәј гырдо-кәноәдә быәкәсонән һич нибәзнен, һестбе, ја ныбе жәләвон. Бәвотен, чәј бе чичбе ки, ныбејән чич быбу? Росте, ја не?
            Воте, мәвужи, росте. “Есә-есә дәрәсејдәм, чичы пијејдә вотеј”, - зијодыш карде.
            Вотем, Әли Насири ыштә жимони иминә 60 сорәдә боштә ыштәни һичи ныкоән, әмма бочәмә хәлғи анә јолә кооныш кардә ки, әвон вәс бәкан бә һәзо-һәзо ҹо одәмон һәммәј умри! Вотәјым ыме ки, Насир ыштә умри иминә поә жијә боштә хәлғи. Чәј һар гылә шер не, чә шери иглә бәнд не, чә бәнди иглә мисроән не, бә мисроәдә быә һар сыхан, бә сыханон мијонәдә ноә быә һар нохтә ијән виргул бәробәре бә гыләј мерди умри! Ышты һовсәлә рәсејдәбу, есә бынышт, һисоб быкә, бини Насири ым 60 сор чан кәс мерди умре! Һисоб карде бәпештән нәзәр сәғанд бә жыго гыләј мәсәлә: Ә одәмон һар гыләјни умрәдә шојән быә, вајән, хәјән быә, шәрән, шојвоән быә, аһ-зорән, сырән быә, бәмән быә. Әмма Әли Насири ым 60 сорыш дәвардә ҹангәдә, дардәдә, ғәмәдә, вајәдә, шәрәдә, мылхәс, бо инсони чанәә дардон-ғәмон омәбун, әвон һәммәј быән иглә Насири бә дардонку овыкијә ҹонәдә! Ымонијән бој чә сорон сәпе, бәвәдә лап дырыст мыәјјән бәкардеш Насири 60 сини бә чанд син бәробәр бе! Ым одәми ыштәнышән јодо бекардә, ыштә хыјзонән, әғылонән, ов-авлодән, әнҹәх дастбәғәләм быә чәмә хәлғи роәдә! Шәв-руж сәдош кардә ым милләт, бә озодиш сәдо кардә әв!

            Әве, чымы Билә, бој деты бә иҹо ғат быкәмон ә 60 сори, бынәмон бә кәно, чокнә бәвотен, тожә сәтро, абзасо бино быкәмон Насири жимони сорон!

            -Һа Бојлима, ымони сәрәсәјме, рост вотејдәш, жәгоән һесте! Интаси бәмы тәбрикномә лозиме, чәј сәрловһәдән нывыштәниниш ки, Насири шесты и син дамејдә! Ышты вотәјку жыго сәрәсәјм ки, ты пијејдә бынывышти “2016-нә сори мајә манги ијәдә Әли Насири и син дамејдә?” Бочи ымони һәммәј пеһандејдәш бомы?

            -Воте ыштә парс? Есән гуш быдә, азән быдәм ыштә ҹәвоби. Не, нибәнывыштем ки, Әли Насири и син дамејдә. Жәгоән бәнывыштем: “Әли Насири 61 син дамејдә!” Чымы мәтләб ҹоје...

            -Чичехо ышты мәтләб?

            -Ныможәбыриш, һаштәниш ыштә гәви окәм, еһырнејдәш парсон бәмы! Вотејдәм, һовсәлә быкә, куләтоныжон вотәјнә, бә һәј шох омәгордын чәмә гәпи! (Мәвужи, ым сыханон хош омәјн бәчәмә редактори, хындәјыш жәј). Чымы вотәј ыме ки, Әли Насир ыштә умри иминә 60 сори ыштән жијә. Чокнә жијә, чичоныш кәшә, чымон кали гылон зынејдәмон, һәммәјсә чоки, есә бој, әв ыштән зынејдә! Иглә ыми бывотым ки, чы 60 сори вејнә поә әв һежо бә јаһу быә ки, “милләт мыни мәсејдәни!”. Бочи вотејдәм ки, “и сини тәбрикномә” бәнывыштем? Чумчыко есә-есә милләт сәдо дојдә бәштә Шаири! Ты фик дојдәш ки һа, бы охон и сорәдә Насири сосиал шәбәконәдә нывыштә һар гылә һырдә ғејд, тәһлил әлбәсаат зывонон әзбәр быә! Бы и сорәдә аз чандә кәрә виндәме ки, бә Шаири нывыштә һар оварди, бәчәј һар кардә мәслоһати, бәчәј доә һар панди чандә гылә ыштәку вотә толышә мердон “Чәш!” вотәшоне! Бәлкәм жәго ни?

            -Һа, Хыдо һесте одәми сәјсә, жәгоје ки һесте!

            -Әве, аз вотеәдә “мандә сорон”, ыми нәзәрәдә гәтејдәм ки, чәмә милләт жыгошә чанә веј сәдо быдо бәштә Јолә Шаири, әв анән веј бәжије!

            -Һа, ым бе чәшрушни!

            -Һәлә тади мәгәт! Гыләјән мәсәлә бывотым бәты. 60 синәдә мерди тәбрик кардәкәсон һәммәј де и дыли әкәнин ыми. Чумчыко Әли Насир һәләбәсә мерд ни ки, һежо шинә зывоныш быбу, бә һар кәси сәјән даст дәсујы! Чандә одәмон һестин ки, тәвәнән боәј! Әве, әмә бынывыштомон “Әли Насири и син дамејдә”, бәвәдә јолы-рук, дуст ја бәд, һәмәкәс әј дылисыхт тәбрик бәка, чәшрушни бәдо бәј! Чумчыко и синәдә әғыл фириштәје, поке, мәсуме, әј жәгоән тәбрик бәкан! Жыго дылисыхт вотә чәшрушнијон чанә веј быбон, анән Шаир дырозәжи бәбе!

            -Һич сыханым ныманде! Бынывышт!

            -Һәни чич бынывыштым? Һәммәјым вотејәни бәты. Чымисә јолә чәшрушни, тәбрикномә?

            -Һич ныбо, Насири гыләј шерику ды-се кәлимә бынывышт.

            -Чәш! Понә чәшрушни доме бә Насири, бәј вотыме ки, “Толыши Дәдәш ты!”. Дәвардә сорәдә бо веј толышон бәрмалә бе ки, һәғиғәтән әв ДӘДӘЈЕ! Ымсор чандә кәрә дастпочә быәм ки, пегордыным чәј кали шерон бә толыши. Кардәмејән! Интаси һәлә әвони бә дим бекардеј фикәдә ним. Бы вырәдә ыштә чәшрушни нывыштејдәм, ыштә сыханијән сә кардејдәм де Насири нывыштә иглә бәнди: И сины мыборәк быбу, Шаир! Ғәдәмоны мыборәк быбун! Бәты һич ҹо орзумон ни, һич әжомон ни, һичимон пијејдәни ыштыку, ғәрәјз иглә чиј: Быжи, хәш быжи, веј быжи, дырозәжи быби! Дештә хәлғи иҹо быби, јолјәти быкә бочәмә хәлғи, ыштә мәслоһатон, пандон кам мәкә чәмә хәлғику! Чумчыко чәмә хәлғи еһтијоҹыш һесте бәты! Ҹәми толышонкујән әжом һежо ыме ки, һәммәјәво дыво быкәмон бочәмә ОЗОДИ ШАИРИ!

Зәрдусти ә һандә дыво,

Әли Насири “Гиләво”!

Исраили шинә сәдо

Бы Толышә зәминәдәј,

Чәмә Толышстонәдәј!

Быжијы Толышстон! Быжијы Әли Насир!