ФЭРЭСОТИНЭ ПИJЭМЕРД

ФӘРӘСОТИНӘ  ПИЈӘМЕРД

Нәғыл Сепоәдижә Мирзәҹон Һәбиби зоә вотәше

бо Б.В. Миллери

            Гыләј һестбе, гыләј ныбе, ғәрәјз Хыдо дынјо димисә һички ныбе. Гыләј пијәмерд һестбе. Әв косиббе.

            Ружи чы ружон пијәмерди пегәтыше һәшт гылә зомсони, бардыше бо подшо. Подшо гәтыше чәвәдә чо гыләш вығанде бо вәзири. Вәзиријән бо һар зомсони бәј доше чоса тымән, вығандыше чы подшо тонику. Подшо ыштәнән чоса тымәныш дој бә пијәмерди. Пијәмерди әвоныш екарде бәштә хырҹин, бә подшош ходаһафиз воте, хырҹиныш ној ыштә һәј сәпе, пеныште бә һәј дәро гыније.

            Вәзир омәј чы подшо тонику, бәјыш воте:

-Подшо-аләм сәғ быбу, ты әнә ғызылы бә пијәмерди бочи дој? Аз бәшем бәстем ә ғызыли пијәмердику.

            Подшо вотыше:

-Ты ә ғызылон де сыхани быстән. Еһанә де зуј быстәнош, аз ышты гиј бәдом жәј.

            Вәзир пеныште бәштә асби, шеј дәрәсәј бә пијәмерди, вотыше:

-Пијәмерд, аз ыштыку се гылә кәлимә хәбә бәстем. Еһанә ҹәвоб дој нызнәј, ә ғызылон бәстем ыштыку.

            Пијәмерд рози бе.

            Вәзири вотыше:

-Ышты мандә вырә чы дынјо кон вырәј?

            Пијәмерди вотыше:

-Чымы һәј мандә вырә чы дынјо мијоне. Шәкы һестебу, быпами.

            Вәзири дијәш карде ки, ын де памје бә сә омә ко ни. Әве дыминә сыволош дој:

-Пијәмерд, осмонәдә чанәдә астовә һесте?

            Пијәмерди вотыше:

-Чымы һәј андомәдә бә мујон башмард, бәвәдә бәзнеш ки, осмонәдә чанәдә астовә һесте.

            Вәзир беәлоҹ манде, воте, пијәмерд, и гылә мәсәлым манде! Пијәмерд огарде вотыше:

-Чы житоно бә пе сыхан әвотнин. Ты ево чы асбисә, пенышт бәчымы һәј, аз пеныштым бәшты асби, ышты ә сыволи ҹәвобијән быдәм.

            Вәзир евоәј, пијәмерд пеныште бә асби, вотыше, есә чымы хырҹини дәбаст бәчымы тәрги. Вәзири дәбастыше. Пијәмерд воте, ты пенышт бәчымы һәј. Вәзир пеныште бә һәј. Есә чич воте пијејдә, бывот.

            Вәзир дамә бе:

-Пијәмерд, чәрхигәрдонәдә чич нывыштә бә?

            Пијәмерди ҹәвобыш дој:

-Чәрхигәрдонәдә нывыштә бә ки, вәзир бәпе бә пијәмерди һәј пенышто, пијәмердән бә вәзири асби пенышто.

            Жәше ғырмоҹ бә асби, ше.

            Подшо кәноку ымони һәммәј сејр кардејдәбе. Мәсәләш жығо винде, бә ғошуниш әмр карде ки, вәзири де һәј иврәдә пегәтән бијән бәчымы мәҹлис.

            Вәзиршон варде бә подшо мәҹлис. Подшо вотыше:

-Бәтыным нывоте, мәши? Чы ғызылы думо шәбиш, асбән дој, омәјш.