ТАРСЕДЭМ

ТАРСЕДӘМ

Ханәли Толыш

(Сабири ғәзинә)

Һәх, әдоләт дасто шедә, тарседәм,

Ноһәх һәхе, ноһәх жәјдә, тарседәм.

Һежо бәмы ҹон вотедә гәвәдә,

Морон виндәм чәј чәшәдә, тарседәм.

И ружәдә һыкым доә фырсәтон,

Бә нодонон даст дәшәдә, тарседәм.

Веј бешедәм нәвејо бә кәфшәнон,

Ләкә виндәм вәнәшәдә, тарседәм.

Шедәм гыләј сеф бычыным боштәно,

Виндәм морон дој бәшәдә, тарседәм.

Вотдән бывот "бәле, бәле", рост быби,

Умур быкәм ҹо кәшәдә, тарседәм.

Бо лузи не, бо милләти зу жәјдәм,

Дасти дарди дыл дәжедә, тарседәм.

И нывото рәһбәр дештә мәхлоғи,

Бәнә моғнә әј чәшәдә тарсејдәм.

Тарседәним, зындәм Хыдо һәхе, һәх,

Дәчәј пијәј бәбе зәлил, шыл ноһәх.

Һәмә милләт ыштә вырәј бәгәте,

Обәгарде бәштә ришә, бәштә рәғ!