ТАРСЕДЭМ

ТАРСЕДӘМ

ӘБДУЛРЗА ӘҺМӘДОВ

Ај чымы шинә пы, дәдә, тарседәм,

Ружи нимәјжони кәдә тарседәм.

Корпә әғыл быәм, тарсым быәни,

Аз ысәт ыштә со-бәдә тарседәм.

Һырдә синон ружбәруж алкаш бедән,

Алкаши виндәм кучәдә, тарседәм.

Мыфтәхорон һәммә пекырјән бә пе,

Ныштән һәмә пенә сәдә, тарседәм.

Тарс дојдә жен, вотдә, бәкыштем тыни,

Бемы и гәмән шодојдә, тарседәм.

Дызд бәмы тарс дојдә, бекардә чәху,

Вотдә, бәжем ышты гәдә, тарседәм.

Ғәјшәдә виндәм ҹифә телфон һесте,

Кејнә ки виндәм чәвәдә, тарседәм.

Лол-лоли мандәм, дамә бе зындәним,

Сыхани һаштәм гәвәдә, тарседәм.

Конҹо бымәсом ды кәси пыч-пычи,

Пыч-пычику аз навәдә тарседәм.

Ки бомы һуштәј быко, витдәм чәјо,

Лап чы одәмон дыләдән тарседәм.

Тарсику и кәлмә сыхан кардәним,

Думтоно, пештоно, вәдә тарседәм.

Бәштә вотедәм ки, нытарсым һәни,

Һәх-ноһәх һа руж дәмәдә тарседәм.

Һәни чы тарсику орәхәм, сә бәм,

Чич быкәм аз, һич-пучәдә тарседәм.

Жен бәмы дымжон додә, кардә ныфин,

Тарсику һытдәм кумәдә, тарседәм.

Кәј дызди гәтдәм, вадојдәм тарсику,

Һај бәмы вотдән вамәдә, тарседәм.

Һич де и кәси сыханән кардәним,

Дышмени виндәм побәдә, тарседәм.

Рој кәно виндәм ды кәси ҹангәдән,

Тарсику мардәм бәвәдә, тарседәм.

Аз һәни бә дукнәвә кам-кам шедәм,

Мандедәним дукнәвәдә, тарседәм.

Навко нәтарсим, есәт аз тарсо бәм,

Бә ружән, бә шәвән – һежо тарседәм.

Мандә вырәдә гыроным ларзедән,

Веј кәси виндәм шәрәдә, тарседәм.