hАРКИ БЭШТЭ РО

ҺАРКИ БӘШТӘ РО

Бәһмән Салеһ

            Номыш Кәлбинарбе, ыштәнарәдә бәј “Кәлби” әвотин. Бә ро әши бәнә ваштәнә. Әтыли, әвашти-пејәвашти, рә-рә әпој, сыхани колвығыл әвоти. Бә вотәј де сә-ҹони әтыли, рә бә вырә әросни. Ве әпишоне чәј хото, вотәмәс бе горәнә. Мерзо Нәсиријән хошыш әвој чәј.

            Ружи Кәлби дәвардејдәбе Мерзо Нәсири сој вәо, шејдәбе де ҹадә. Мерзо Нәсири ванг кардыше әв:

            -Кәлби, бој меһмон быби бәмы!

             Кәлби лынгыш огәтыше:

            -Сәломәлејкум, мерзо дај, меһмоны азиз быбу! Бә почт шејдәм, де Мәсковә гәп бәжәнем, һырдәни сифориш доәше. Нише мысл шымә чоли ови, һәм сәрине – бәнә бијәј, һәмән тәмине бәнә һуштули, һәм сывыке бәнә пашмә, һәмән рушине бәнә рушнәсо, авшуми!..

            Мерзо Нәсири рангы-руф рушин бе чы гәпику, әјвоно евоәј бә со, гәмыш ғандыше ки, бышу окә побә:

            -Бој, бој, побә окәм, бој, чанә пидә ов пешом!

            -Мерзо дај, зәһмәт мәкәш, побә чичонәј, һежо сеткәо дәбәшем.

            Дыдасти дәчыкәј, рост кардыше сеткә, енәмәј дәше бә со, вадоше сеткә.

            -Ымән аз! – Кәлби бәнә ангыштә пемәј Мерзо Нәсири вәдә, ғандыше даст бә гәлосконә, пегәтыше ведрә, ежәнәше бә чол. – Охәј, ови әтрәбу омејдә. Хыдо ышты мардәјон рәһмәт быкә, Мерзо дај! Ын ичол, ын ов бәшты бәхт омә, хыдо боты немәт вығандәше…

            Мерзо Нәсир һут быәбе мандәбе. Кәлби бә со дәше, ыштәни жыго барде хоштномәј бәј:

            -Кәлби, һасте бы јәкә бәлет, парчини быно, сеткә жијо дәшиш бә со. Ым чы һәрәкәте? Аз тыни одәм зынејдәбим! Һәјф, сәһв кардәме ышты барәдә! Һарки бәштә ројебән, аз зынәмни!