Гыно ты карде, эмма...

Гыно ты карде, әмма...

Бәхтијар Рушин

Гыно ты карде, әмма гынокор аз бим,

Речәдә ном бекарде, рысво-хар аз бим. 

Бәдном бим дешты ешғи, гуја дивонәм,

Дә номи, золым, бә аләми ҹар аз бим.

Гыләј ғәмхар пәјдо ныбе бәчмы дарди,

Дештә дылим кәше, боштә ғәмхар аз бим.

Беәлоҹ, бечорә бим ышты ешғәдә,

Әлоҹым манде бә ловә, начар аз бим.

Бој бывинд, огардәм бә кыләшә чангә,

Ышты дардон кәшеку һәм бимар аз бәм.
 

Руј овән һытәбе, ты шинә һандәбиш,

Астовон оғобин, ижән бидар азбим.

Озод, фәрхәндә нәведәш дылон сәдә,

Бә дами-ешғи, әмма гирифтар аз бим.

Рушиним, гыләј бебәфо ешғәдә сутим,

Тобә, тобә, әвотним Бәхтијар азбим!

Изоһон:

Начар (фарс.) – ночор, бечорә

Бимар (фарс.) – нохәш

Бидар (фарс.) – оғо, әнәһыт