БЭJ ШЕДЭМОН ЭМЭ ЖОFО ?

БӘЈ  ШЕДӘМОН  ӘМӘ  ЖОҒО ?

Јадулла Сајад

Һич зындәним, чич бә бәмә,

Бә кон вырәј ромон чәмә.

Лынг оғәтән, һәмрон, шымә,-

Бәј шедәмон әмә жоғо ?

Зындәнимон бәди, чоки,

Зындәнимон јоли, руки,

Ве-ве сыррон бәмә токи,-

Бәј шедәмон әмә жоғо ? 

Һәх пемедә, дәгардедә,

Дылмон бә сығ огардедә.

Девран тәркәску гардедә,-

Бәј шедәмон әмә жоғо ?

Сәһв кардәмон шәвән, ружән,

Һәјомон ни чәмә ижән,

Һәлол де һәроми умжән,-

Бәј шедәмон әмә жоғо ? 

Бә ноһәхи ро дојдәмон,

Бә шәјтони зу дојдәмон,

Ве шеј кути едојдәмон,-

Бәј шедәмон әмә жоғо ?

Ве вахт роси вотемон ни,

Шәр ғандеку витемон ни.

Рыжнедәмон, дутемон ни,-

Бәј шедәмон әмә жоғо ?

Дынјо гыләј ғарзә выжор,

Хәроб бедәмон сорбәсор.

Чәшонмон ку, гушонмон кор,-

Бәј шедәмон әмә жоғо ? 

Дојдәнимон һич кәшбәкәш,

Ијәндику жәјдәмон чәш,

Чәмә вәдә гыләј отәш,-

Бәј жедәмон әмә жоғо ?!