БАЛЭ ЧЭМЭ БАЛЭ, НОМЫШ ТЫРКЭ НОМ?!

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 110 голосов)
Изменить размер шрифта Decrease font Enlarge font
image

 


БАЛӘ ЧӘМӘ БАЛӘ, НОМЫШ ТЫРКӘ НОМ?!

Амјәзо

 

            Зә, ым меҹузә које, валлаһ! Зинә толышә вәјә һәхәдә нывыштәмбе. Ымружән толышон һәхәдә гыләј ҹо мәсәлә беше бә мәјдон.

            Чандә сорон чыми бәнав чәмә һовә Самирә нывыштәшбе жыго гыләј номәдә шер: Балә чәмә балә, номыш тыркә ном. Һежо чәј номикујән бејдә виндеј ки, шаирә бә шикатбе ки, бочи бәпе чәмә толышә моон толышә балә бијән бә дынјо, әмма чәмә јолон бәвон һәммәј тыркә ном бынән?! Мылхәс, мәғсәдым чә шери һәхәдә гәп жәј ни. Мәслоһат бызношон, ыштән пәјдо бәкашон, баһандешон әј.

            Бы ружонәдә чәмә гыләј толышә ҹывони зангыш кардәбе бәмы гыләј ҹо мәмләкәто. Иминә кәрәбе виндејдәбим әј. Тикәјән дырыст бывотом, омәбе чәмә гылә ҹо Билә тоно, чәјо зынгыш карде бәмы. Таныш бимон, һол-әһволымон карде дејәнды. Воте, хосә маму, гыләј мәслоһатым пијејдә дешмә карде. Вотем, гушым бәтыкује:

            -Шинә маму, быбахш мыни, беәдәбәти кардејдәм, бы ружонәдә иминә әғылым омә бә дынјо. Кинәје.

            -Чәшоны рушин! Бахтәвәр јол быбу!

            -Веј сәғби, мамуле! Әмма гыләј ишкилым бешә бә мијон. Чәмә ијо быә Бојли мәслоһатыш зынәј ки, бәшмә овардәмон.

            -Һозым ышты хыдмәтәдә!

            -Сыхан омәј рәсәј бә мәғоми ки, ком номи бынәмон бә әғыли? Аз вотем ки, толышә ном бынәмон.

            -Ком ном хош омејдә бәты?

            -Аз вотем, әғыли номи бынәмон ја Рушнә јаанки Рушнијә.

            -Лап әҹәб! Дыјнәнән хосә номин! Ишкил чән чичәдәј?

            -Чәмә кали авлодон вотејдән ки, бәбардеш әғыли бә ди, мәхлоғ ләғләғә бәкарде ки, ым чы номе ноә бә кинә?

            -Бәс әвон ком номи тәклиф кардејдән?

            -Әвон вотејдән, ја Ајтән, ја Ајтаҹ, чыбызным, жыго тыркә номон…

            -Һа, есә сәрәсәјм тыни! Де бәболи бочәмә хәлғи! Буни әмә бә чы руж мандәмон ки, толышон ајбышон омејдә чәмә толышә номонку!

            -Мамуле, дечәвон вотеј ни, аз рози әбыним ки, чымы кинә ном тыркә ном быбу!

            -Әһсән, чымы балә!

            -Интаси пијејдәме умутым шымә нәзәри. Јәне һәғиғәтән толышә ном ајб бәбе бочымы корпә?

            -Зә, быши бывот, ғәләт бәка ә одәм ки, ләғ бәкарде бошты әғыли номи! Әғыли пыә тыниш, әвон кин? Тәки бәшты хош бо чәј ном? Әмма тикәјән бә нығыли бышомон, бызын ки, чәмә толышонку ғајдә жыгоје ки, әғыли номи чәј дәдә ја нәнә бәно, бә пыә һич нубә әрәсни. Есә вәзјәт жыгоје ки, дәдә-нәнон мандән Толышстонәдә, дәбонән тикәј дәгиш быән. Чымијән јолә ајбыш ни, зәмонә жыгоје. Әве, ком номы пијејдә, әјән бынә!

            -Чок, розим! Шымә чы мәслоһат зынејдәшон, бә пе чымы вотә номон ком гыләјни быбо, чок бәбе?

            -Бәмы омандо, кинә номи Рушнә бынә, Хыдованди, чәј быјәш боме бә дынјо, чәј номијән Рушин бәнош. Бәбе әла!

            Сәғбиш воте бәмы, беше ше. Әмма ым сыхан сә ныбе. Ымруж ижән зангыш кардәбе. Вотыше ки, әғыли номышон Рушнијә ноә! Чәјоән вотыше ки, бә мәмләкәтәдә бо әғыли сини коғәзи пегәтеәдән кали ишкилон бешәнбән бә мәјдон.   Чәјо умутыме ки, әғыли миллијәти толыш әзынимон нывыште, чумчыко чәмә ғанун ро дојдәни! Чандә вахти һәсбәһс карде бәпештә, әғыли пыә вотәше ки, бәвәдә чәј миллијәти һич мәнывыштән бә сини коғәз! Жыгоән рози быән!

            Ијо дыглә мәсәлә һәхәдән гәп жәј чок әби. Гыләјни әве ки, чәмә ыштә довләти ныбе гыләј нәтиҹән ыме ки, дынјо веј выронәдә ыштә толыш бе сыбут зынејдәнимон карде! Довләт быбо, бәвәдә ым ишкил ыштән-боштә мијоно бебәше.  Гыләјнијән ыме ки, жыго мәлум бејдә ки, чанә веј толыш чанә вејә мәмләкәтонәдә ыштә әғылон, ыштән ыштәни толыш быдо нывыште, әһоли бә сијоһи гәтејәдә ыштә миллијәти толыш быдо нывыште, бәвәдә дынјо анә рә бәзне чәмә ки бе, жәго ишкилонән бенибәшен бә мијон. Әве, ыштә сыхани охојәдә пијејдәме ижән әһсән бывотым бәчәмә бо Билә ки, тосә охој ыштә хәлғи ғырјәти кәшејдә! Ижән пијејдәме овардым бәчәмә ҹывонон ки, ыштән толышин, бәштә балонән толышә ном бынән. Быдә жыго ныбу ки, ижән Самирә һовә бынывышты ки, балә чәмә баләј, номыш тыркә ном!


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|