ДЫНЈО ДАРД

ДЫНЈО  ДАРД

Јадулла Сајад

Пидәме бысәним азән бә ғәләм
Чы дынјо хывәти, чы дынјо дарди.
Валлаһ, чымы дылдә әбыни һич ғәм,
Овашдим аз әгәр ын јолә парди.

Шаирон, мызәммәт мәкәнән мыни,
Ын дарди нывыштә ве јолә һынә.
Тов вардә зындәни бы дарди гони,
Дасәдәм ғәләмон бә дывәлинә.

Чы дарди дыләдә тәседә дынјо,
Дынјо егнијә чол чандә нығыле!
Бәмедә инсони дасәдә дынјо,
Бәмедә, жыбызын, корпә әғыле!

Де зылми жидә әв, де зылми гардә,
Роһәтән бедәни и руж, и дәғә.
Ын дынјо бәмәно бә ләп огардә,-
Һар шәкәс-омәкәс пекудә ләғә.

Дынјомон һәни лап гынјә чы вәҹи,
Дынјо чан вырәдә риз-риз кардә бә.
Пај-бәхш бә ды чан са подшо ғылынҹи,
Әв бәнә зомсони куз-куз кардә бә.

Һәлә ки ҹәллодон ве мәјдон һандән,
Ды тарси, ды ларзи жидә ын дынјо.
Рәкетон лап әчәј сәјку пемандән,
Нә һытдә, нә мижә кудә ын дынјо.

Инсонон, әмәнән быбәмон оғо,
Һич кәсмон нығәто ыштә сәј бәжи.
Быдәмон дасбәдас, быдәмон ноғо
Чәмә кәј- чы дынјо машкинә ружи.

Бынәмон ын дынјо ыштә чәшисә,
Быдәмон дасбәдас, әмоне, әмон!
Быгардо һа дәғә әв бә һәши сә,
Әмәнән бә дынјо сә быгардәмон!