ОХО ЧАНЭ ТАМ БЫЖЭНЫМ?

ОХО ЧАНӘ ТАМ БЫЖӘНЫМ?

Баләддин Вешо
 

Һер фәләки тәрсә које,
бәмыш доә руж телә зоје,
беовандә умри роје.
По-пијодә кәм быжәным –
Охо чанә там быжәным?!

Ружгори һич ныбу мило?
дылдә һежо ғәм быгыло,
гити чәшо арс пегыло.
Бәнә зығә нәм быжәным –
Охо чанә там быжәным?!

Жыго бызын, шој вәшон сә,
фахт гин бедә дард-дожонсә,
екәм хоки бә ружон сә.
Бә умури чәм быжәным –
Охо чанә там быжәным?!

Ым мандә, бә ҹони ғәсдкәм,
дасти-почә һәдәр пусткәм,
бо ҹојонро сәрај росткәм.
Аз боштәро ләм быжәным?
Охо чанә там быжәным?!

Орзу кәшон арыштә бә,
уму сутә, гамыштә бә,
бәхтым һа пер нывыштә бә.
Әј бә Хыдо дим быжәным?
Охо чанә там быжәным?!

Бәнә кәсы ланге бә ром,
сутә кәш-пор, чич быпәрым,
Вәтәнәдә жије һәром?
Бо куч кај фик-фам быжәным –
Охо чанә там быжәным?!