БЫВОТЫМ JА НЫВОТЫМ?

БЫВОТЫМ ЈА НЫВОТЫМ?

ӘЛИ НАСИР

Јурдымон дасто шә, һич бә ҹо мәһолон дыләдә,

Зывонән дасто шедә ым “овәлә”, “зылзыләдә”,

Мәвужи пыл бедәмон гардыши бы пыл-пыләдә.

Тоно бедин, тоно “мулла”, бывотым ја нывотым?

Һәни си бәм, симәвалла, бывотым ја нывотым?

Чы әҹәб виндәнишон, ружбәружән жи бедәмон,

Чы бы жапә чы бә жапә, дијәкән, ки бедәмон?

Бә зәмин ов чоко ныштә, жәгоән ни бедәмон,

Бы шәјтонон әузу билла бывотым ја нывотым,

Һәни си бәм, симәвалла, бывотым ја нывотым?

Евәмон жә сәон, әзбәс бәнә пу гардедәмон,

Чыбәнав боштә жијә һар кәси ту кардедәмон,

Омә нәслон ки нывинде әмә зу кардедәмон,

Бәмәнән ту бәка, валла, бывотым ја нывотым?

Һәни си бәм, симәвалла, бывотым ја нывотым?

Сыханым бәшмәне, һа хариҹәдә ныштә зоон,

Кали һич сәрф-нәзәр кардәнишон ыштә коон?

Шымәнән зу рәседә жәј-жәјәдә бәштә боон,

Вәсе Надја, вәсе Алла, бывотым ја нывотым?

Һәни си бәм, симәвалла, бывотым ја нывотым?

Сәһе бызнән, бәмә чы ҹо кәсику һај нибәбе,

Уруси, тырки, ијән молтәнику дај нибәбе,

И быно зу быжәно, милләти һәх зај нибәбе!

Һа Толыш, бәшт сәпо, “Јалла!” бывотым ја нывотым?

Һәни си бәм, симәвалла, бывотым ја нывотым?