БАhАНД, БЫЛБЫЛ!

БАҺАНД, БЫЛБЫЛ!

Баләддин Вешо

Баһанд, уму роон софкә,
Баһанд, чангәј дарди овкә,
Баһанд, ғәми ружи шәвкә!
Ым бәхти дим чы ве куре?
Баһанд, былбыл, дылмон пуре!

Ружон сәјку тарс бәшкырә...
Ком ружику форс бәшкырә?
Һа мижәку арс бәшкырә!
Арси гылә и охуре,
Баһанд, былбыл, дылмон пуре!

Банди бә дим  вырәје һест,
Вәјо рушт һест, сырәје һест,
Чы бинәку гырәје һест!
Выјо виндәј чашмәмуре,
Баһанд, былбыл, дылмон пуре!

Бәхти бино кардә сард кај,
Сардә һәво вылон зард кај,
Ғәм дәманде бо огард кај!
Әв бә пышкмон ве дәһуре,
Баһанд, былбыл, дылмон пуре!

Умури рој бә рушт быгәт,
Ғәми дими бә дашт быгәт,
Софә ешғи бәрдашт быгәт!
Хыдо доәј чашмәш гуре,
Баһанд, былбыл, дылмон пуре!

Гымон пучә вонәјебән,
Орзуән бәј пинәјебән,
Дынјо хори лонәјебән!
Сығдыл, һәддо пеш ношкуре,
Баһанд, былбыл, дылмон пуре!

Бәлелә до бәмедәни,
Сијо сиҹим рәмедәни,
Ым жи бәмә дамедәни!
Рости ројсә бешә уре,
Баһанд, былбыл, дылмон пуре!

Кам бо дарди һәмуш быби,
Кам бо һәмро сырпуш быби,
Һәхи хәбә Сәруш быби!
Әв ком руже, хәј аһуре?
Баһанд, былбыл, дылмон пуре!