АСПО БЭБЕ КЕJНЭ КОСИБ?

АСПО БӘБЕ КЕЈНӘ КОСИБ?
(Бәһри-тәвил)

Ханәли Толыш

            Чы милләти Дыждәкәсон, пентонәдә ныштәкәсон, һа руж тәлә рыштәкәсон, де ијәнды һоштәкәсон, һәх бывоти турмонәдә кыштәкәсон, бә нати пешт бастәкәсон, пули бә дыл һастәкәсон, сәјку-бәпо сахтә кәсон, бәнкон выло кардәкәсон, әнгон выло кардәкәсон, бә пули сә кардәкәсон һардышоне, гәвбәпури бардышоне, тәјлә вағон вардышоне, чы кишвәро гырд бешәбе, кә ежәшбе Парисәдә, Лондонәдә, чан тонәдә, дутә ныбе бын тонәдә – Сәлјонәдә, Ланконәдә, Ширвонәдә. Веј вотә бе  “аз-азимон”, әнгонәдә веј созимон, чы мәһоли ғаз-вазимон, конҹо пул һесте, әјо әмә лозимимон.
            Зәмин-фылон каштә ныбе, һички бә ко ваштә ныбе, бо чәтинә пешнә ружон запас-мапас һаштә ныбе, зәвод-фабрик ежә ныбе, бә хошә руж бешә ныбе, һич әзијјәт кәшә ныбе, фабрик бә дәб дәшә ныбе, һиччи ијо һозы ныбе, тәвә, тишә һозы ныбе, оләт, по-ғаб, мәшә ныбе, һиҹо жыго ғәзо ныбе, чичмон пијәј, кәноку вардымоне, һардымоне, де һички ым ғәзо ныбе, нат бе ержон, гырд емарде, дынјо гарде, зил омарде, зынәмоне ым чы дарде, мәнот еше, ысәт һәни мардә леше, дасто беше, че ғәзәби ғәзән пеше, бәс һукумәт бә коврә ше?
            Бы чан сори һич бе косиб, ко кардеку пуч бе косиб, јолон вәдә леш бе косиб, ови сәпе кәз бе косиб, гыләј лолә пәс бе косиб!

Чәшкә кејнә тасбе косиб,
Рост бе ружи, ғасбу, косиб,
Бовә мәкә, һынәш быбу,
Пенышты бә аспи косиб!
Кејнә бәбе аспо косиб,
Аспо бәбе, аспо косиб?!