КОРПЭ ЭFЫЛИJЭН ЭБЫНИ ШОДОJ !

Разделы

Архив

Пн Вт Ср Чт Пт Сб Вс
123
45678910
11121314151617
18192021222324
25262728293031

Рассылка

Подписаться на рассылку:


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Оцените содержание статьи?

(всего 24 голосов)
Изменить размер шрифта Decrease font Enlarge font
image

 


КОРПӘ ӘҒЫЛИЈӘН ӘБЫНИ ШОДОЈ!

Амјәзо

Бәты вотәмбе, һа Биләм!


            Дештә Билә гәп жәј фикәдәм охонә ружонәдә чәмә хәлғи ијән һәрәкоти тарыхәдә вағе быә дыглә овандинә һодисә һәхәдә. Чымон гыләјни чәмә Толышә ҹывонон сохтемони “Вечернјаја Москва” телеканаләдә нишо доә бәрномәје, ә гыләјнијән чәмә ҹо гыләј дастә ҹывонон Бокујәдә “Һыркон ТВ” бә дәрһәл вардеје.
            Феврали 10-дә шанговони чәмә хосә билон гыләјни зангыш карде бәмы.
Дум жәјдәбе, до певатејдәбе! Вотем, зә, чич быә, коврә хәробә мандә?

            -Дијә карде бә Вечернјаја Москва?
-Быбахш, хәбәм быәни. Зынејдәбим ки, бы ружонәдә быәнине ым ко, әмма дырыстә вахтику хәбәм ныбе.
            -Дијәм карде бәчәмә ҹывонон сохтемони бәрномә, хуным гырд сијо бе!
-Бочи сијо бе ышты ә рангрисинә хун? Чичышон воте?
            -Чыбызным, Валлаһ, бә тарифбин ки, һичмәсә, Озорбојҹони һукмәти бә вәјштыш огордынијә Толыш!
-Һежо жәгоән вотышоне?
            -Һәни вотымејәни!
-Зә, әзыни бе жәго чиј! Охо чәмә ҹывонон аз чок зынејдәм, хысусән Вуғарә билә, әвон жәго сәһв әзынин карде!
            -Тынишәни, һежо Вуғари һәвари кәшејдәш, бә додиш ки, әв чокә зоәје, чокә толыше!
-Зә, ты бој дәмәгижын чымы ағыли, әзыни бе бы јоли рысвојәти!
            -Ыштән бәзнеш, аз вотыме бәты!
-Јутубәдә ни ки, аз ыштән дијә быкәм? Чанә дијәм кардәни, дештә чәшоным виндәни, дештә гушоным мәсәни, һичи әзыним воте!
            -Һәлә ноәшонни бә Јутуб.
            Демијән сәмон карде ыштә гәп. Сыхани рости, әһволым гырд хәроб бе. Ыштән-боштә дәмандим бо малхулјо карде, һа но-пегәтым карде, гыләј нәтиҹәм нызнәј бекарде.
Тосә маштә һа егорд-пегордым карде јонгоәдә, һан номәј бәчымы чәш. Де тәһәри ружым карде шәв.
           
Машки шанго чәмә гыләј Билә омәј чымы тоно. Чәјку зынәме ки, әвән быә телевизијәдә. Парсәјм чәјку, ғәссәмыш һарде ки, Озорбојҹони довләти сијосәти һәхәдә һич гәпыш жәни!
            Пашонә ружи Вуғар ыштән омәј. Әјән дод-әмоныш карде ки, быәни жәго сыхан!
            Мылхәс, бәрномәшон ној бә Јутуб, ныштим, де дығғәти дијәм карде. Дијә карде-карде әһволым чок бе, лап ләзәтыш дој бәмы! Чәмә билон һәммәј веј сәғ быбун ки, де жыго гыләј јолә һәвәси ијән хышм
әти гәп жәјдәбин чәмә хәлғи, чәј тарыхи, зывони, адәт-әнәнон ијән милли хорәкон һәхәдә! Росте, ҹывонин, кали адәтон камил зынејдәнин, әмма мәсәлә бымәдә ни. Ым һәвәс ки бәвонку һесте, Хыдованди, убәмутен ыштә нызнә чијонән!
            Әве, вотыме бәчәмә Билә: Аз һич сәнырәсәјм, охо, чич бәшты хош номәј бы бәрномәдә? Охо, һарчи веј хосе, әҹәбе бы бәрномәдә!
            Сыхани рости, детобә ымружнә ружи һич ҹәвобышән доәни бәмы, азән һәни жијәм дәныној бы сыхани сә!
            Ијо нимәдә огәтым ыштә сыхани, гәп быжәным “Һыркон ТВ” һәхәдә, чәјо ыштә ғәрори бәнывыштем.


            Зинә дијәм карде бә “Һыркон ТВ” иминә бәрномә. Чы әҹәб ки, дијәм карде! Дыглә кәшым ныбе, быпәрым! Әһсән, ижән әһсән! Һәм бы ТВ ҹәми офәјевонә коллективи, бы кој бә дәрһәл вардејәдә камәдә-вејәдә зәһмәт кәшәкәсон, һәмән бәрномәдә сыхан вотәкәсон! Һәммәјсә јолә әһсәнән егынејдә бәчәмә балә Конули! Хысусән дығғәтым дој бә гыләј мәсәлә: Фик дојдәбим ки, де чокнә ғәјғу ијән еһтироми ебејдә бәчәмә зывони. Ым чәјку хәбә дојдә ки, Конул бы чандә вахтон гырд мыкәммәл һозы быә бы кој!
             Ымијән бывотым ки, дијә кардәкәсон һәммәј иглә рајәдән, һәммәј рози мандән! Росте, бәрномәдә һестыбин кали нырәсәјон, нохсанон. Интаси нырәсәј әјо бејдәни ки, әјо һич ко виндејдәнин, әнҹәх чыми-чәј кардә коон һәхәдә гәп жәјдән јаанки, һәнијән бевәҹ, ғыјбәт кардејдән! Ә кој ки инсон гәтејдә, нырәсәј быәнине әјо! Әмма ијо әсос мәсәлә ә нохсанон нин. Ә һәвәс ки аз виндыме Һыркони офәјевонә коллективәдә, ым уму дојдә ки, иншаллаһ, омә бәрномонәдә сәрост бәкарден әвони, һәнијән камил бәкарден чәмә тожә ТВ! Әве, ым сыханон ки есә аз бәнывыштем ијо, һисоб быкән ки, ымон чәмә хәлғи вејни сыхане, чәвон розијәти әломәте! Ымән мыни веј шо кардејдә!  
            Ыштә чәшрушни нынывыштә, пијејдәме гыләј мәслоһат быдәм бәчәмә билон ијән һовон: Ләгәнәдә ки дәншандејдән корпә әғыли, чәј бәпештә шодојдән бә со мандә чыркови! Жыго мәкәмон ки, корпә әғылијән шодоәмон де чыркови бә иҹо! Бәзне бе ки, гыләј толыши хошыш ныво ҹо гыләјнику. Әмма бә гәп жә, ко виндә одәми ыштәни не, бәчәј вотә гәпи, виндә кој фик дој лозиме! Әмәл чокебу, бәј чокән вотеј лозиме! Әнҹәх жыгонә бә нав бәзне ше, обәзавзије чәмә хәлғ!
            Охојәдә пијејдәме чәшрушни быдәм бәчәмә хәлғи де ым дыглә һодисә мыносибәти! Боән һәммәјәво тәбрик быкәмон чәмә ҹывонон, “Хыдо хыванди быкә шымәни бочәмә хәлғи!” бывотәмон бәвон һәммәј, орзувони быбәмон ки, мандә толышон һәммәј дастәк быбун бәвон бы хәјмандә коәдә!


  • email Отправить другу
  • print Версия для печати
  • Add to your del.icio.us del.icio.us
  • Digg this story Digg this

Добавить коментарий comment Комментарии (0 добавлено)

Главные новости

|