ЫМ СЫПЭКУТЛЭ ШОРСУЛУЖОН hАШТЕJДЭНИН...

ЫМ СЫПӘКУТЛӘ ШОРСУЛУЖОН ҺАШТЕЈДӘНИН...

Симурғ

            Һа, дәвардә әсри 60-нә соронбин. Мәһәррәмә мангбе. Бә Ашурә 1-2 руж мандәбе. Шорсулу диндоронән һозыәти бардејдәбин бо шәбеһ бекарде. Әмма одәм пәјдо карде зынејдәныбин бә Шумри рол. Һич кәс рози бејдәныбе ки, бәчәј әғылон пешо "Шумри балә" бывотын мәктәбәдә.
            Һа, һежо бы вахти гыләј малакани рош гәтәбе, шејдәбе Пришибо бә Боку. Шорсулу чајхонәдә сипиришон гыләј чајә гонәғәти бәј дојдән вә хаһиш кардејдән ки, 1-2 руж быманды, меһмон быбу бәвон, пулән бәдон бәј. Малакан вотејдә, чич лозиме кардеј. Бәј изоһ кардејдән ки, бәс тан бәкардеш гыләј либос (хәләт), дыглә чујә шымши бәдомон бәты, бәмандеш һони вәдә, ки ыштыку овыш быпијо, бәтожнеш. Малакан вотејдә, һа ҹындоә бусурман, пулән бәдош? “Һаје һа!”, вотејдән бәј сипиришон.
            Һа, жыгонә малакан рози бејдә. Танкардејдән бәчәј тан Шумри хәләти, дыглә чујә шымши дојдән бәчәј даст. Дыглән пезәвәнгә "ҹонхыванд" нојдән чәј тоно, вотејдән бәј:
 -Ыштән дијә быкә, еһанә бә гыләј хонәхо ов быдош, ышты ҹәзо бәдомон, рәхе әзыниш чәмә дасто, пулијән ки бәстәнемон ыштыку.
            Һа, де минволи шәбеһ шејдә ыштә ғајдәдә. Пијәмердон, пијәженон омејдән бә һони, ловә кардејдән бә малакани ки, һа Шумр, овымон пијејдә, чәмә ҹигәр сутејдә тәшику, быдә и ғурт ов пешомәмон. Шумр (јәне, малакан) вотејдә ки, әдәним ки әдәним! Һа омејдән кинон, женон, ловә кардејдән, әмма әв ов дојдәни. Омејдән јарәжә сәрбозон, дәзоны омејдән чәј вәдә, марджејдә чәј жипоәдә, әмма малакан ов дојдәни бәвонән. Охој-охојәдә сипиришон гәдә әғылон дојдән бә нав. 3-4 сининә корпә әғәлон омејдән, дәвәнго гәтејдән  малакани лынги, ловә кардејдән ки, “Шумрә маму, тәшику сутејдәмон, ов быдә!” Ым малаканијән һәни пегәтәше шәбеһи образ, лап огардә бә Шумр! Мысылмонән ныбо, бәсә дәшејдә чы шәбеһи молјәти. Әмма охојәдә бә әғылон бәме тов вардејдәни, ыштәнән дәмандејдә бо бәме, налә кәшејдә:
            - Валлаһ, биллаһ, аз бәшмә ов дојым пијејдә, әмма ым сыпәкутлә шорсулужон һаштејдәнин...