ХЫДО РЭhМЭТ БЫКЭ ТЫНИ, МЭШЭДИ ИБАД!

ХЫДО РӘҺМӘТ БЫКӘ ТЫНИ, МӘШӘДИ ИБАД!

Амјәзо

Бәты вотәмбе, һа Биләм!

            Чәмә билон гыләјни вотејдә ки, Зә, ым чы ханихәробәтије, ым чы фаҹионин омејдән бә Озорбојҹони сә? Охо чәмә бебәхтә хәлғи фылон ғәдәрән һәлә ки мәҹбуре жимон быкә бы хәробә мәмләкәтәдә! Ты быби ағылманд, сәросын мыни, чы просесон шејдән есә Озорбојҹонәдә?
            Һар чијсә бәнав бәчымы ағыл омәкәс Мәшәди Ибад бе! Вотем, чымы Билә, пијејдәбу ҹәвоб пәјдо быкәј бәштә бы парси, бәштә јод бијә Мәшәди Ибади!   
            Воте, Зә, аз нывотыме ки, ты бә ләғ бынә мыни! Аз дардику вотејдәм, ты пардику!
            Вотем, һа Биләма, чымы вотәјән һежо ышты вотә дарде, де пардим ко ни! Гуш быдә бәмы, бымәс ыштә ҹәвоби. Бәштә јод бијә ә сәһнә ки, Мәшәди Ибади јәғын кардыше ки, кинә бәј дој фикәдә нин, әј бә даст дәнојдән! Чич бе чәј бәпештә? Гыләј “лоти” омәј, воте, Мәшәди, 50 мәнот быдә бәмы, бәшем и гуллә бәжем бә Рустәм бәги кәллә! Ә гыләјни омәј ки, 25 мәнот быдә бәмы, рысво быкәм боты Рустәм бәги ыштә ружномәдә! Есә Озорбојҹон, иминә нубәдә чәј президент Илһам Әлијев мандә чә Мәшәди Ибади вырәдә! Чок-чоки огәт ыштә јодәдә: Чымибәчәтон ки бо бә Озорбојҹон, чы тәклиф быко бә Илһам Әлијеви, бызын, ә хонәхо хәбәш һесте ки, чы довләти фатиһә доә быә! Әве, омәкәсон һәммәј мәғсәд кырыжи бынәдә мандә пулон берохнијеје! Ым просес шејдә Озорбојҹонәдә, ыми сәрәсејро чич һесте ки? Пијејдә, һәнијән һырд быкәм боты ыштә вотәјон:
            Мәсәлән, бы ружонәдә Боку информасијә ресурсон хәбәшон дој ки, Илһам Әлијеви сәло жәше бә дынјо чандә гылә довләти ки, әвон мытәхәссисон бывғандын, әвонән план тәртиб быкән бо мәмләкәти боһрано бекардејро! Әвонән омән, ныштән, мәслоһатышон кардә, бә Илһам Әлијеви хош омә “Полшә модел”.  Бочи Полшә модел? Нәзни карде, мәсәлән, Сингапури модели пегәты? Әзни, һәлбәттә, әзни! Интаси Сингапури модели иминә шәрт бә коррупсијә вәјнә мыборизә бардеје. Еһанә ә моделыш пегәтәбәј, бәвәдә Илһам Әлијев ыштән һәммәјсә бәнав гырдә кардәнинбе ыштә шәлә-кулә, шәнинбе! Чумчыко Озорбојҹони ән јолә коррупсионер, ән јолә рышвәхор, ән јолә дызд әв ыштәне! Әве пегәтәше Полшә модел. Ты ыштән чок зынејдәш ки, Полшә че Авропә ән коррупсијәјнә довләте. Әве чәј модел Илһам Әлијеви лап дылику быә! Интаси ымән һесте ки, ә полјаконән чок зынејдән ки, бә коррупсијә вәјнә мыборизә ныбош, мәмләкәти боһрано перохније мымкун ныбыә које! Бәвотеш, бәс бочи полјакон рози быән ки, план һозы быкән боәј! Пијо вотымехо Мәшәди Ибадику! Ә полјакон чә Мәшәди Ибади лотијон тисбирәдән. Әвон чок зынејдән ки, ым довләти де плани-фылони зымрыхо бекардеј бәнә осмоно астовә чынијеј гыләј мәсәләје. Вотымехо, әвон лотин, бәстен ыштә пули, чәјоән бәвотен ки, чичымон дасто омәј, әвымонән карде, һәни чич быкәмон? Ым жыго!
            Гыләјән мисал: Чандә ружонбин, Илһам Әлијеви Администрасијә информасијә ресурсон бә јаһубин ки, һичмәсә, Авропә парламент бы ружонәдә ғәтномә ғәбул бәкарде, Ермәнистони ғәтымкор елон бәкарде! Кам мандәбе, соф-ошко бынывыштын ки, ај мәхлоғ, пулон доә быән, әвонән сыханышон доә, гушонсә бымандән, ғәтномә ғәбул бәбе!
            Чич бе чыми охој? Ношоне ә нахшә бә сәдо, Озорбојҹон мәғлуб бе! Пулонән ки шин! Чиче чыми мәно? Әве ки, ә сыхан доәкәсон лап сыфтәо зынејдәбин ки, һич гылә ғәтномә ғәбул әбыни. Әмма ыштә пулышон сәј, вотышоне, Мәшәди Илһам, быши ыштә музон бычовын!
            Һәлә ым дарди и нимәје! Парсе бәзнеш ки, бәс ә нимәш коме? Әве ки, бә Озорбојҹони ҹәми 4 кәси сәдо рәсәни ки, ғалиб бо. Есә бој, фик быдәмон ки, ки чокнә сәдош доә? Ҹо довләтон бынәмон бә кәно, нәзәр сәғандәмон бә Озорбојҹони тыркон “быјә” вотә Тыркијә тыркон доә сәдо. Тыркијә Авропә парламентәдә быә 16 депутати 12 гыләјни сәдош доә бә Озорбојҹони леһ, 4 кәс мандә бетәрәф! Јәне, гирәм ә чо кәсијән сәдош доәбәј, есә вәјәвандбе Озорбојҹонәдә!
            Чичым вотеј пијејдә деми? И тәрәфо чандә милјон доллар ше дәдә хәјәдә, чы тәрәфоән мәлум бе ки, Анәдоли тыркон быјәти охој жыгојебән, јәне быјә номерд беше! 
            Ым Илһам Әлијеви сијосәт! Чы фәрғыш һесте чы сијосәти Мәшәди Ибади сәргозәштику? Һич фәрғыш ни! Әвон дыјнәнән һежо и ағыләдән! Әве нә Мәшәди Ибади нызнәше ҹывонә кинә ыштә дастәдә огәте, нәәнки Илһам Әлијев огәте әзыни ым довләти!
            Есә зынәј, бочи рәһмәт вотејдәм бә Мәшәди Ибади?!