Азад Талышоглу – 92

            Азад Толыши зоә моәку быә Толышә вәтәни мәһол Масалони ди Годмонәдә. Чандә сорон ко кардәше һуғуғ-мыһофизә органонәдә јолә вәзифонәдә. Хәјли вахт рәис быә че Озорбојҹони ССР Дылә Коон Вәзарәти кадрон идорә. Жыго гыләј мәсулә вәзифәдәә ко карде-карде чапыш кардә чанд гылә шерә китоб де “Талышоғлу” тәхәллуси.Толышә мәһоли тәрәннум әсос лејтмотив быә чәј бә тырки нывыштә шерон. Хәјли шероныш һәср кардә бә Толышә бандон, Толышә вишон ијән тәбиәти. “Толышә бандон” номәдә шерә китобышән мәсул вәзифәдә ко кардә соронәдә чапо бешә. 
            И кәрә чәј мовардә ружи аз де Забил Мәдожи шимон бә Азади моәку быә ди Годмон. Хаһишым карде чәјку, ҹәвоб быдә бәчымы чандә гылә парсон. Парсон гыләјни чәј тәхәллуси һәхәдәбе. Әј вотыше ки, вәзифәдә ко кардә вахти чандә кәрә сәдошон кардә әв “бә пе”, вотәшоне ки, чап ныкә ыштә шерон де ын тәхәллуси, чумчыко “әв республикә әһмијәтинә мәсул вәзифәдә ко кардејдә”. Әмма Азад рози быәни, вотәше ки, “мымкун быә ко ни ым”.  
            Парсәјм чәјку ки, бочи бә толыши шер нывыштејдәни? Вотыше ки, “чымы бә Толыши меһиббәт анә веје ки, боштә тәхәллусым пегәтә ым ном. Әмма де һәјфи ки, чымы илһам бә Толыши омејдәни, чанә ҹәһд быкомән, тәбым омәни”. Вотыше, “ “Толыши сәдо” ружномә чап беәдә, чымыку хаһиш кардышоне ки, бә толыши шер бынывыштым. Бәвәдә гыләј кыртә шерым нывыште бә толыши”.
            Азад Толыши зоә бәштә милләти быә меһиббәти һыҹубәтәдә әј кали толышә шаирон шерон ијән поемоныш – З. Әһмәдзодә “Дәвардә ружон” ијән  “Толышә жимон” поемоныш пегордынијә бә тырки. Һәмон дыглә поемә макинәо бекардә вариантыш китоби һоләдә бә ҹилдыш гәтәбе. Бә вахти Һилал миәллими доәшбе бәмы ә китобон ки, имкон беәдә әвони чап быдәм карде. Де һәјфи ки, детобә ымружнә ружи аз кардем зынәни һәмон ко.
            Хыдо рәһмәт быкә Азад Толыши зоә!