ҺАНДӘНИМ, А МИӘЛЛИМ

Ханәли Толыш

Һәни бәшты сыхани мандәним, а миәллим,

Ыштә дыли мәдожын, һандәним а миәллим.

Вотејдәж ки, кобыкә сәбарз бәбеј,

Ко ныкардә одәми нуны-немык ғарз бәбеј.

Хәлғи тоно сәбәјжи, дыләдәшән тарс бәбеј,

Мәсејдәм ын нәғылон, кындә ним, а миәллим.

Вотејдәж ды һәлоли дәдә-нәнә шо быкә,

Елми омут, боштәно зылмоти рој чо быкә.

Һа зәһмәтә дәрсәдә бәмы вотдәж ко быкә,

Де бор-пәли зәмини кандәним, а миәллим.

Ко кардәни, чок жидә бәсә тынән чан кәсон,

Чы һиј димыж виндәни фылонкәси вәрәсон.

Ко ныкарде-ныкарде пејнә сәдән веј пәсон,

Гәпым һәхей, шәр-фылон ғандәним, а миәллим.

Сипи кардә ыштә сә, сины пенҹо ни һәлә,

Ышты нимәј нызнәкәс јолеј бә чан диј һәлә.

Азән жого рост бәбејм, ҹо ҹурә ро ниј һәлә,

Мәгәр азән чы Хыдо бәндә ним, а миәллим?

Ајбе, охо, быныштым бәнә хәлхи партәсә,

Ыштә чәши мајф быкәм даскә сәпе, картәсә.

Әвиндыни ын ружон, валлаһ, бабон мардә сә,

Ботыно тәвә-тишә, рандә ним, а миәллим.

Чан нәфәри һандәни, милјонереј диәдә,

Сәждә жәјдән һәммәј бәј, “Мерседесыж” жиәдә.

Гарди жәјдә, ыштыку ваз дәвардә пиәдә,

Дешты шонә ыштә сәј рандәним, а миәллим.

Бә вәзифә рост бејдә, веј пулинә дыждә сә,

Сәводинон огардән бә нодонон мыштәсә.

Аз әвони виндејдәм, гиным кардә ыштә сә,

Һәх детынеј, ја дәвон, зындәним, а миәллим.