Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
һич ныбо ыштә номи мәнән бә ҹо кәсон!
Фәхрәддин Әбосзодә
Хәјли вахте ым һәсбәһс шејдә. Һәрәкотәдә һәсбәһси бе, сыхани рости, чочинә мәсәлә ни. Һәлбәттә, бо дәрәсәкәси. Бо ә шәхси ки, әв зынејдә, чиче һәрәкот, чокнә бејдә ки, әв озавзијејдә, бә нав шејдә, чичонән быәнинин ки, әв бә пешы бышу, тәнәззул быкә, мијоно бешу. Һәрәкот бәгәм инкубаторе ки, чәј “певатә” кижон, чәј узвон һәммәј и рангәдә, и ағыләдә, и сәводәдә, ән воҹибишән ыме ки, и әғидәдә быбун? Охо ым гыләј ҹонинә организме, һәмән марде-мардејәдә быә гыләј хәлғи “организме” ки, чәј һәмә органон и ғајдәдә ко әзынин карде, фәолијәт нишо дој әзынин! Ыми зыне жәго јәне гыләј чәтинә које? Бәмы омандо, һәлбәттә, чәтинә ко ни. Әмма чымы ыштәни ағылманд, сәводин зынә кали одәмон нывыштәјон, чәвон парсон һандеәдә, ангыштә бә ғыч гәтејдәм! Шымәнән жыго?
Ән веј доә быә парсән ыме ки, “чич беје ибердәмә аләм бәјәнды гыније? Бочи чандә соронбин вотејдәбин бә хәлғи ки, толышон бардә мыборизә охон мәғсәд мухтаријәте, есә вотејдән ки, не, мухтаријәт ни, мыстәғиләтије?”.
Чанә бәбе вотеј ки, хәлғи мыборизә мәғсәди мыәјјән кардеј һәләбәсә ко ни ки, чики кефи чокнә пијејдәше, жәгоән быкә! Охо охонә шәш сори дыләдә шәв-руж нывыштәмоне, изоһымон кардә ки, бочи әмә мыстәғилә Толышыстони тәблиғ кардејдәмон, мыборизә бардејдәмон бо ын идејә вәомәдә бә жимон дәвонејро. Есә әмә быныштәмон ижән сәнибәтон тикрор быкәмон әвони һәммәј ијо, чиче, чиче, фылонкәс һәлән дәрәсејдәни ки, чичику шејдә сыхан?! Охо мәғсәд жыго гыләј чије ки, чәј дәгиш бе хосјәтыш һесте. Мәсәлән, детобә зинә ружи “әҹнәби балононәдә бешејдәбе бә сејр, әмма әмә һич бә автомобилијән пеныштејдәныбимон”, есә, һаружән ныбо, ружбәмијон пеныштејдәмон бә ыштәнәпәри, шејдәмон, мәсәлән, бә Лондон! Һәлә бә космос переј фикыәдәмон! Чыми мәно ыме ки, һар гылә мәғсәди бә мәјдон бешејро лозиме мыәјјән шәроит. Әв ки һозы бејдә, јаанки һозы бе әрәфәдә бејдә, бәшәр мыәјјән мәғсәдон нојдә ыштә навәдә. Бәмә чич быә чән? Әмә бәшәр нимон? Һежо дәчыкәнинимон иглә мәғсәди? Шәроит омәј рәсәј, әмәнән дәгиш кардымоне ыштә мәғсәд, иншаллаһ, бәрәсемонән бәј! Быдә һички шәкыш ныбу быми!
Бы вырәдә, дешмә мысоидә, ым сыхани ијоән огәтејдәм (тикәј бәпештә идомә бәкардем әј), пијејдәме гәп быжәным гыләј ҹо мәсәлә һәхәдә. Ымән сосиал шәбәконәдә шә кали гәвәтасыбонин. Кали толышон ки, жыбызын, корә кәжәлә мазгышон һардә, шәв-руж һәпәрој нывыштејдән, вәшышон гәтә, сутејдән, аләмышон һу карде пијејдә бәштә ыштә сә. Пијејдәме бәчәвон кали фикрон гыләј тәтимә нәзәр сәғандым ки, чәмә һандәкәсон һоли быбун вәзјәти чы вырәдә бејку.
Сыфтә ды-се кәлимә ыштә һәхәдә бынывыштым. Һички быдә фикир ныкә ки, ыштәни тариф кардеј фикәдәм. Әстәғфуруллаһ! Ләнәт быбу бә шәхси ки, ыштәни тариф бәкарде! Амин! Интаси һар гылә одәм мыәјјән принсипоныш быәнине ки, ыштә жимон сохте бызны чәвон сәпе. Ыштәни фамә вахтонку чымы һәммәјсә веј зәһлә шә чиј ДУ быә! Бәштә әғылијән, ов-авлодијән, дуст-танышијән һежо иглә тәләбым быә: Ду мәвот! Гирәм воте зынејдәнишбу, мәвот, лол быби бынышт, әмма ду мәвот! Әве дујәвож чымы чәши дышмене!
Бочи ым “ду” бәчымы јод омәј? Чумчыко фик дојдәм бә кали толышон вотә гәпон, һандејдәм чәвон нывыштәјон, ыштән бәштә мот-мәтәл мандејдәм: Јәне бәштә мерд вотәкәс анә ду бәзне воте? Мерд бәке, ду бәке?
Ым чымы нәзәре. Есән боән тикәјән һырд быкәмон ым фикири.
Детобә ымружнә ружи чымы нәзәрәдә Толыши һәрәкотәдә бәсә Әләкрәмисә веј ду вотәкәсым виндәмныбе. Чы одәми гәво иглән ростә сыхан бенибәше. Бәштә мәғсәди рәсејро әв һар ҹурә ду-тәлбис песохтејдә ыштәку.
Һәшјә: Быдә ҹәми толышон бызнын ки, ијо чымы мәғсәд һич кәси чәшо еғандеј ни, бә һич кәсијән шәр ғандеј ни! Еһанә Әләкрәми ном ангыл быәнәбәј де Толыши һәрәкоти, са сорән нәгәтим чәј номи. Интаси мадәм ки әвән бы һәрәкотәдәј, вотәниним ымони. Чумчыко детобә ымружнә ружи һәмон ә “дујон” веј јолә бәлонышон вардә бәчәмә хәлғи сә!
Әмма һәлә Әләкрәми нојдәм бә и кәно. Есә ки һандејдәм Заһирәддин Ибраһими нывыштәјон, виндејдәм ки, кәхәлизи балә Әләкрәм бә вәјә шәнинебән чәј тоно! Сини бы вахтәдә одәм ыштәни анә бочи ехроҹ әкәјбән!
Быдә сыфтә кали ҹо мәтләбон изһор быкәм, иншаллаһ, бомем бебәшем Заһирәддини сәпе. Бы сәфә бино кардејдәм пејо, гәдә-гәдә ешејдәм сәбәсару.
Есән идомә кардејдәм ыштә бә пијо нывыштә фикири. Иглә мәсәлә һесте ки, мәҹбурим әј тикәјән нығыл-нығыли изоһ быкәм ки, ғасбу парсәкәсон кам бин. Ым мәсәлә әве ки, “ибердәмәдә бино быә ым һәрај-һәшир ја не”?
Толышыстони Милли Телевизијә екрано и кәрә изһорым кардәбе ки, есәтнә һәсбәһси вәсә шејдә бешејдә бә тәғрибән ды сор чыми бәнави. Тикәјән дырыст бывотом, бә Әләкрәми бә Јереван шә вахти. Бочи мәһз бә вахти? Детобә ымружнә ружи толышон јолә әксәријәт һәлән детобә охој сәрәсе зынејдәни ки, чоко-чоко бе ки, әв ше бә Јереван? Һәмән бочи ше, мәғсәдыш чичбе, чичоныш воте әјо?
Бә вахти и кәрә пијәме чәвон ә Сипиришон шурә ки вотејдән, чәј гыләј узвику умутым ки, һич ныбо әвон зынејдән чы парсон ҹәвоби ја не? Вотем, Зә, Әләкрәм бә Јереван нышә мызокирәш кардәбе дешмә ым мәсәлә? Воте, не! Вотем, огарде бәпештә һич ныбо мәрузәш карде бошмә ки, бочи шәбе, чичоныш воте, чичоныш карде әјо, чокнә сә бе ым сәфә, хәјыш бе бә Толыши ја не? Воте, не! Вотем, охо шымә ыштән бә дынјо ҹар кәшејдәшон ки, гуја сијоси тәшкилотишон. Быбәне, быбән, сыханым ни! Әмма тәшкилот бәпе мызокирә быкәхо жыго коон. Бәс шымә дечи мышғолишон әјо? Воте, жыгоәни, һај тикәј гәп жәјдәмон чыјо-чәјо, демијән сә бејдә чәмә “мызокирә”!
Чок, бывотәмон ки, ым чәвон ыштә “дылә које”. Бәс хәлғ? Һәлә бә Јереван нышә вотејдәним, оме бәпештә бәлкәм конҹосә ды кәлимәш нывыште, бәјоныш карде бәштә хәлғи ки, бочи шәбе? Јәне анә нијонијә мәтләбон һестыбин чәј бә сәфәдә ки, әвони вотеј нәби һәтто бәштә хәлғијән? Һич ныбо, халә хото нымандо вотәјнә, әвоти ки, һа чымы хәлғ, бәс жыго гыләј ком карде, һәмә сырон әзыним воте, быбахшән, әмма һол-ғәзијә жыго бе! Ныкардыше ки! Бочи? Чумчыко жәләвонон чәшәдә хәлғ гыләј пучә визе. Һар сәфә гыләј дәј бынәдә пырт бәкан, бебәшен бәнә гобәләки, бәвотен ки, ымеһа, омәмон! Бәвәдән хәлғ ыштә нывенҹәнә тыки нишо бәдо, кут бәкује бәше, әвонән бәманден бәштә сәј кује-кује!
Есә боән, аз ҹәвоб быдәм бә парсон. Ымијән бывотым ки, һәлә чәј нышә чә парсон һәммәјән ныбо, мыәјјән ғәдәри ҹәвоби зынејдәбим. Бә чәшбим ки, бунәмон әв ыштән чич бәвоте. Нывотыше, азән ныштим, чәшым карде ки, бунум чокнә сә бејдән ын коон. Есә, шык бә Хыдо, чок-чоки зынејдәм чә парсон һәммәј ҹәвоби, әве вотејдәм бәшмә. Есә бәлкәм сәрәсын ә пијо парс доә толышон ки, бочи есә бино быә чәмә һәсбәһс. Чумчыко чәш әбыни кардеј ки, һәми пеш быбу локәо!
Әләкрәм шәбе бә Јереван бо толышон дарди чорә пәјдо кардејро не, чәј дард ыштә дардбе! Бәс ки вығандәшбе әв бә Јереван? Һәлбәттә, Озорбојҹони һукмәти! Интаси бә мәноәдә не ки, Бокујо омәбин, вотәшонбе ки, бој ты быши бә Јереван, чәјоән быши бә Степанакерт, бывот бә Артсахи президент Бако Саакјани ки, әв рози быбу бә Хәрәбоғи бә Озорбојҹони тәркиб дәше. Бә Әләкрәми ым сыхани вотәкәс, әј бә ро сәбәро кардәкәс кали авропәвыжонбин ки, чәвон гыләјни һежо дечәј ыштәни бә иврә шәбе бә Јереван. Ым шәхсән чә Тәмсилныбыә Милләтон Тәшкилоти узве. Бәс чә тәшкилоти, чә одәмон ләвә дож чичәдәбе ки, әвон рози быәбин жыго гыләј ко быкән, һәлә кали ҹо коонән быкән бо Озорбојҹони? Охо чә сәфә бәпештә Брусселәдә Авропарламенти биноәдә Иминә конфранс бе. Сори бәпештә дыминә конфрансән бе. Һәлә гыләјән быәнине, гушбәванг бымандән.
Ымружнә ружи дырыст мәлуме ки, Озорбојҹони һукмәти 2 (ды) милјон аврош бә гиј гәтәјбән бә һәмон тәшкилоти ки, әв тәшкил быкә ә сәфә, һәмән ә сеглә конфранси дәвоны (доәше ә пул ја не, хәбәм ни). Ым мәлумотән бәмы һич гылә довләти хысуси хыдмәти идорон доәшонни. Шык бә Хыдо, чә сәфә ијән конфрансон тәшкил кардәкәсон гыләјни шәхсән вотәше бәчәмә гыләј Билә!
Әләкрәмән ше бә Јереван, вотыше ки, “аз Бако Саакјанику хаһиш кардәниним ки, әв рози быбу бә Хәрәбоғи бә Озорбојҹони тәркиб огарде”. Ермәнијонән чәшон бешин бә кәллә ки, зә, нәнәмардәј зоә, ты толышә хәлғи номо омәш, ыштә хәлғи һәхәдә гәп быжән, бәты чы таты-сардыш һесте, Хәрәбоғ обәгарде ја не?
Парсе бәзнешон ки, бәс ым сыханон ки вотәше бәмы? Һички вотәшни, ыштән дештә чәши дијә кардәме бә видеонывыштәј, мәсәме дештә гушон!
Омәјмон бешимон иминә конфранси сәпе. ТМВ бәрномәдә вотәмбе чәј һәхәдә кали чијон. Сыхани кырти ыме ки, Әләкрәм ыштән рози быәбе ки, мәрузә мәтн чәмә быбу, чәј һандәкәсән Каһин Мирзәлизодә быбу. Вотәшбе “чәш”! Әмма вахт-вәдә рәсеәдә Әләкрәми жыгош вотәбе: “Конфранси тәшкил кардәкәсон, јәне УНПО рәһбәрон һәкәм мандән ки, мәрузә Президент (Ә. Һуммәтзодә) кардәнине”. Ым фәғырә Каһинән вотәшбе, һа чич бәбе, ты быкә. Нәтиҹән ым бе ки, Әләкрәми ыштән имзо кардәшбе чәмә нывыштә мәтнон ингилиси, уруси ијән тырки зывонәдә, жәгоән чәмә һырдәнон певыло кардәшонбе әвон Интернетәдә, әј мәҹбур кардәкәс быәныбе! Бы јоли тымбытырахи бәпештән, мәрузә мәтныш ној ыштә навәдә, әмма ҹо гәпоныш жәј. Ижән Хәрәбоғи һәхәдә, чәј бә Озорбојҹони тәркиб огарде һәхәдә, чыбызным, һәни чичон һәхәдә. Толыши һәхәдә и кәлимәшән нывоте!
Бәвотешон, аз ыштән быәним әјо, бәс чыконҹо зынејдәм? Әһсән! Ижән дијәм кардә бә видеонывыштәј, виндәме дештә чәшон, мәсәме дештә гушон! Ки нывыштәшбе бә видео, чокнәш нывыштәбе, бәмы әв чыконҹо омәј рәсәј, ым һәни ҹо мәсәләј. Һәғиғәт ыме ки, конфранси шангонәј чымы мизи сәпебе ә видеонывыштәј!
Вотејдән, ду по бәгәте, нибәпыје! Әлкәрәми ым дујән жыго ныпыјәј! Бы незони мәлум бе ки, УНПО рәһбәрон жәго сыхан вотәшонни бә Әләкрәми, әј душ вотә бә Каһини! Чыконҹо мәлум быә? Шык бә Хыдо, чә һәмон УНПО ә конфранси тәшкил кардә кәсон гыләјни шәхсән вотәше. Бәки вотәше, ижән ҹо мәсәләје. Гирәм еһтоҹи быбо, чәј номи вотејән һич чәтин ни боәмә! Жыго зынејдәм, бо ымружнә ружи мәсәлә ым ҹәһәт анән воҹиб ни. Воҹиб әве ки, бочи жәго гыләј душ вотәбе Әләкрәми? Чыми сәбәбән мәлуме: Чумчыко Әләкрәми еһдәмоныш пегәтәбе бәштә гиј ки, мәһз һәмон ә сыханон бәвоте конфрансәдә. Вотышејән!
Мылхәс, чич бынәмон жыго һәрәкәтон, әмәлон номи? Аз ном быном, ижән аләми бәјәнды бәжен. Чокиш әве, шымә ыштән ғыјмәт быдән бы жыго әмәлон! Аз ыми бәзнем воте ки, бы охонә ды сорәдә чәј зыне-зыне ја әнәзынәтику, фәрғыш ни, кардә коон һәммәј сәпејәнды егынејдән де Озорбојҹони һукмәти нијәтон, әв ыштәни лу-пуст кардејдә ки, де тәһәри перохны Озорбојҹони довләти! Ә довләти ки, бо толышон һич гылә рушт ни әјо! Ымони чанә рә бызнон толышон, анән чок бәбе бочәвон ыштәни!
Есә шымәни Хыдо, һа чәмә ғурбинә толышона, ым шәхс һежо жыго ду воте-вте бышу, әмәнән хыјә быкәмон, һичи мәвотәмон? Чәш быкәмон ки, кејнә бәбарде чәмә хәлғи ебәғанде бә чыл гәз нығыли чоли бын? Охо бәвәдә шымә һәммәј бә и гәв дымжони һәмән бәмә бәдошон ки, бочи шымә зыне-зыне ымони, вахтәдә овон пегәтәбе бә гәв? Бәвотешонхо, аз чок зынејдәм шымәни! Чокнә ки бә 1993-нә сори ғәзијон горәнә дымжони јолә гылон бәмәнән дојдәшон! Әве, әмә һежо ымруж “бевәҹ” кардејдәмон ыштәни ки, быдә хәмәнисә бә јабәҹанг бенышәмон дештә хәлғи!
Есән сыхани камиши сәбәро быкәмон ҹо һәвәндисә. Бы чандә вахти ки аз нывыштејдәм, вотејдәм чымон һәхәдә, ә “корә кәжәлә мазги һардәкәсон” һич вырәдә нывыштејдәнин ки, чичи ду вотејдәмон, ком чиј шәре, быһтоне? Охо вотејән нибәзнен! Чумчыко чок зынејдән ки, чәвон сыхани навәдә вотејро сыханымон һәлә веје. Гырд гуҹили бәкамон әвони, чәјоән гылов пебәшандемон, пош бәкардемон әвони бәнә гофемелы! Бовә быкән бәмы ки, бәкардемон! Һәмән әвон чок зынејдән ыми, чумчыко әмәли сојб әвон ыштәнин, ҹо кәс ни!
Есән мәјдонәдә һәммәјсә веј асп тожнијә, лап бә тәвәнә бызанг огардә һәмон ә Заһирәддин Ибраһими һәхәдә!
Чич вотејдә әв, чичон нывыштејдә?
З.И.: “Ки бә Әликрами әлејһ бешејдәбу, әв бә толышә хәлғи әлејһ бешејдә!”. Чокнә бәвотен, жәше лап ыштә чәшыш бекарде! Чымы зынәјку, ым фикир веј таныш быәнине бәчәмә ғурбинә һандәкәсон. Охо Озорбојҹонәдә һукмәти “нывыштә дастон”, “вотә гәвон” шәв-руж бә дод-әмонин ки, “ки бә Илһам Әлијеви әлејһ бешејдәбу, бызын, әв бә Озорбојҹони хәлғи, бәчәј довләти әлејһ бешејдә!”. Хәј быбу, бочи Заһирәддин Ибраһими бәнә тујә кижә тикрор кардејдә чәвон сыхани? Охо ым че тоталитар тәфәккори тәзоһуре ки, бә довләти јоли ја хәлғи лидери анә пәрәстиш тәрбијә кардејдән ки, охојәдә чәј фылон вырә шавлоо бешејдә, дәмандејдә бо һар ҹурә камсәрәтијон карде, ҹурбәҹурә дарды-бәлон вардејдә боштә хәлғи! Заһирәддини пијәј әве ки, Илһам Әлијеви дәгиш быкәмон һежо бә жәго гыләј Әләкрәми? Һич мәсәоне ки, ӘИШ-дә гыләј хонәхо бывоты ки, Обамә тәнғыд кардәкәс бә Әмерикә довләти әлејһ бешејдә? Вәсе һәни, анә бә мәсғәрә мәнән бы јоли хәлғи!
Охонә ружон әј веј нывыштәше, вотәше жыго камсәрә сыханон, фикирон, чәвон һәммәј пеһандеј фикәдә ним. Гыләјнијән бынывыштым, жыго зынејдәм, вәс бәкарде.
З.И.: “идет бойкая торговля, на этом поприще желаю тебе удачи!!!” (“рәвоҹә тиҹорәт шејдә, овандон орзу кардејдәм бәты бы коәдә”).
Һа, ым чокә гәпе, ыми тикәјән һырд кардеј бевәҹ әбыни! Һәмән чәј ыштә вотәјон нывыштејдәм ки, быдә ижән нывоты ки, гуја шәр ғандејдәмон “бәвон”, тәһғир кардејдәмон “әвони”.
Заһирәддин Ибраһими: “Се милјон авро омәнине боәмә, әј бә чәшимон. Пул оме бәпештә бәвиндешон, чичон бәбен!”.
Бәки вотәше ым сыханон, ыштән чок зынејдә! Әмма гирәм тәсдығ тәләб быко, ым мәјдон, ымән шәјтон, аз һозым!
Һәлә әј вотејдәним ки, есә де хәлғи еғволи сә-выжор кардәкәс кије? Иглә әпиме ки бызным: Шымә чы фикир кардејдәшон, һа чәмә хосә һандәкәсон? Кије бәвон ым пули доәкәс? Бочи дојдән бәвон анә пули? Чичон кардәнинин әвон чы пули мығобиләдә?
Есә бовәон карде ки, чәвон дард хәлғи дард ни, лузи дарде? Чәмә ки комон ни дешмә лузон, интаси ыштә номи мәнән бә ҹо кәсон!
Парсон веј бешејдән бә мәјдон, әмма һежо бымон ҹәвоб бызношон пәјдо карде, жыго зынејдәм, вәс бәкарде.
Охојәдә гыләјән мәсәлә һәхәдә нывыштеј воҹиб зынејдәм. Чы бәдбәхтон номердәтијон демон сә бејдәнин. Һежо чокнә ки виндејдән һәво гузәке, дәмандејдән бо ијәнды һәвате. Бы незони гыләј вағеә быәбе, чәј һәхәдә гәп жәј фикәдә ним. Иглә ыми бывотым ки, Заһирәддинику чә вағеә һәхәдә хәбә сәјәдә, әлбәһол чичон быән, һәммәјыш вотә. Һәмчинин әвыш вотә ки, “Чымы веј вахтику жыго шәкым һестбе ки, фылонкәс ко кардејдә бә Озорбојҹони һукмәти. Аз Москвәдә беәдә әј мыныш меһмон бардәбе бәштә кә. Бәмы ыштә кәдә вотыше ки, пијејдәме, тыни таныш быкәм де Озорбојҹони Москвәдә быә сәфарәтәдә ко карде и кәси”.
Ки быә есә јол-јоли мердәтику, хәјонәтику гәп жә Заһирәддин Ибраһими меһмон бардәкәс, ә сыхани бәј вотәкәс, ымони аз чок зынејдәм. Әвән охон вахтонәдә сосиал шәбәконәдә веј евашт-певашт кардәкәсон гыләјније, һа бә һәрәкәте ки, ыштә тәјә чәнәхи быжәны бә јолә мердон пурә чәнәхи, әмма жычиј бешејдәни, бенибәшејән. Әв һәмон шәхсе ки, сијосәти номи гәтејку тарсејдә, демијән жыго, ваште-ваште шәбе бә Бруссели конфранс. Бочи, бәзнешон парсе? Есә мәлум быә ки, мәһз һәмон одәм һәкәм мандә ки, Әләкрәм мәрузә быкә, јәне бә Озорбојҹони һукмәти хәј быә сыханон әв бывоты, чумчыко Каһин мәрузә быко, ҹо гәпон бәже.
Есә шымә бәзнешон бәмы воте ки, һәмон ә “сәфарәтәдә ко кардә одәми” вығандәшбе ә толыш бә Бруссел ја не? Ихтијор шымәнкије, һар ҹурә нәтиҹә бәзнешон бекарде, һа чәмә хосә һандәкәсон!