БОJАТИОН

БОЈАТИОН

Бәхтијар Рушин

Ҹоным, һа хосә мәһол,
Омедәм ысә, мәһол!
Бәнәвем чимәнондә,
Бәшем де бә сә, мәһол!

Ҹоным Толыши мәһол,
Беты һич ниме ғәрол!
Виндеме чәмә бандон,
Рушин бе чымы әһвол!

Ҹоным, һа чәмә мәһол,
Вылзаре һәмә мәһол!
Ыштыку диәро егним,
Чокнәј бәбе чымы һол?

Ҹоным, һа чәмә вишон,
Бә кам ныбу вәнәшон!
Пәре-пәре бомем аз,
Обәкам ыштә кәшон!

Ҹоным, һа чәмә былбыл,
Чы речине ышты выл!
И гәв бомоно баһанд,
Дәбәшем аз бәшты дыл!

Ҹоным чәмә сәсинә,
Сә ранге ышты синә!
Бә Толыши ве бандим,
Азән ышты ғәзинә!

Ҹоным, чимәнон зизә,
Зындәм аз шымә ризә!
Бәчынем шымәни аз,
Бәкам боштә гијозә!

Ҹоным, һа чәмә дыјо,
Ышты кәном дыштә јо!
Вејән диәро әшыним,
Ружгар дәвардә ијо!

Ҹоным, һа чәмә марзә,
Кәфшәни кардә һавзә!
Тыни бу карде-карде,
Дылым дыты бә нозә!

Ҹоным, һа чәмә марзә,
Кәфшәни кардә һавзә!
Дыты бе чымы хәши,
Мәлһәме ышты зизә!

Ҹоным, һа чәмә һони,
Рәседәм, чәшкә мыни!
Һәни тәшнә ҹиғәрим,
Сәринкә чымы ҹони!

Ҹоным, һа чәмә һони,
Ҹоным шымәку ҹо ни!
Вырондә һони веје,
Һич гылә шымә то ни!

Ҹоным, һа чәмә кәфшән,
Кинон бә сејрон бешән!
Чәшым чанә новнеме,
Бәнем, һа тоны вылшән!

Ҹоным, былбыл бә ванге,
Һа зизә гыләј ранге!
Боәнән, ыштән бывиндән,
Чәмә мәһол ғәшәнғе!

Ҹоным, һа чәмә бандон,
Дырозә, кәмә бандон!
Әмәни ноғо быдән,
Пешт быбән бәмә, бандон!

Ҹоным, һа чәмә бандон,
Быбәнән дәмә, бандон!
Фәләк бәшмә ныгыно,
Былбылон шо баһандон!

Ҹоным, һа чәмә бандон,
Авәку нәмә бандон!
Дылым отәш бәгәте,
Шымә ғәмин бымандон.

Ҹоным, һа чәмә бандон,
Ғәшәнғин һәмә бандон!
Шымәку диәро егним,
Чәшоном бәмә, бандон!

Ҹоным, һа чәмә бандон,
Быбәнән дәмә, бандон!
И руж азән әбыним,
Бәбејон шымә, бандон!

Ҹоным, һа чәмә бандон,
Быбәнән дәмә, бандон!
Шымәку ғәриб егним,
Чәшә арс емә, бандон!