ЛУТИ ТОБJЭ БИЈЭ БЭ JОД!

ЛУТИ ТОБЈӘ БИЈӘ БӘ ЈОД!

Амјәзо

            -Зә, нәнәмардәј зоә, Амјәзо!
-Јалла, хосә Амјәзо!

            -Зә, конҹо мандәш? Аләм гынијә бәјәнды...
-Чич быә ижән?

            -Зә, бә “шәјтонтәпәдә” ижән зингәвулә сәдо омејдә.
-“Шәјтонтәпә” коврәје?

            -Зә, фесбуки вотејдәмәни!
-Һа, сәрәсәјм. Вахтым быәни гәшти быкәм бә вырон.

            -Чокејәни, ышты вахти ни, дышменән бә које!
-Чичышон нывыштә әјо ижән?

            -Зә, кәхәлизи зоә, мәғалон мызокирә кардејдәнәни! Интаси ијо гыләј мәсәлә һесте.
-Чиче әв?

            -Бә јоды омејдә, чич вотејдәбе Пејғәмбәр сәлаватуллаһ?
-Коми вотејдәш?

            -Пејғәмбәр (с) ружи вотыше, кејнә ки деләвузә сыпә бәманде, чәј ләвәо тожә бешә кутилоныш дәбәрывен, бызын, охонзәмон омә рәсә!
-Ымым зынәј. Ыштә мәтләби бывот.

            - Һежо азән боәј бә һәрәкәтим ки, ты чок-чоки сәрәси чымы мәтләби. Һа, мәғалон бешән, “сыпон” ыштән мандән и кәно, чәшәвәно кардејдән, кутилон озывон омән! Чы мырдолон һич дәрывә һолышонән ни, әве зингәвулә кардејдән!
- Чы зингәвуләјехо?

            -Зә, тыркон ијән кырдон мандән бә кәно, кали толышон бә зингәвулән. Гыләј чијән чочин омәј бәмы. Ғајдәје, сыпә тәкеәдә, камику 6-7 гылә кутиләш бејдә. Әмма ијо зингәвулә кардә кутилон ҹәми дыглән!
-Мәғсәдышон, вотәјышон чичехо?

            -Зә, чич бәбе? Бә дод-әмонин ки, мәвотбән аз тәһғирым кардә чәвон довләти јолон! Чыбызным “бә рушинфики данымә” сыханоным нывыштә...
-Ты жәго чијы нывыштәнихо!

            -Азән һежо әј вотејдәмәни. Чымы нывыштәјон һәммәј конкрет фактонин, быә вағеонин. Дард бымәдәј ки, иглә ым толышон осәмән ки, мәвотбән, тәһғир һесте әјо! Пемужијәнхо, бә мәмләкәтәдә детобә ымружнә ружи һукмәти сәдә ныштәкәсон бевәҹи, чәвон сәһвон, нырәсәјон, номердәтијон вотәкәс-нывыштәкәс быәни. Һежо тарифышон кардә әвон. Есә ки аз нывыштәме чәвон кали гылон, озо дәшә бы толышон ҹон, ыштәни муорынд кардејдән ки, вај дәдә, чәмә президентышон тәһғир кардә!
-Ты бочи чәвон сәјку шејдәш, папе бејдәш бәчәвон зингәвулә?

            -Ымән чокә сыхане! Кејнә виндә ки, аз папе быбум бәчәвон вотәјон. Интаси ҹәми ды руж чыми бәнав һежо чәвон гәвисәшон жәј ки, бә јоли Шаири јубилеј дештә пулијән ид кардеј әзыни һич гылә толыш! Аз вотем, мәвужи, бо жыләвононән пандәномә бәбе ым мәсәлә. Есә дијә кардејдәм, һәғиғәтән дәрыве ғәдәғән кардеј әбыни бә сыпә! Һај дәрывејдәнһа!
-Һа быдә дәрывын! Толышон һәни дәрәсәјн ки, ә довләт дуст әзыни бе боәмә! Чәмә Шаири ехроҹ кардеј пијә довләти Хыдо ыштән ехроҹ бәкарде! Лути тобјә бә јоды ни? Чымонән охој жәгоән бәбе иншаллаһ! Чәвон ым зингәвулә һәғиғәтән иглә песохтә кишвәри чарчивәдә охонзәмони оме әломәте, әмма әвон ыштән ыми дәрәсејдәнин!

            -Ај бәшты ағыли һејран! Вотејдәш ки, жәләвонә толышонән дејәвон бә иврә бәсутен, мынҹыр бәбен?
-Һич шәкы ныбу!