КУЛЭ ШЭВОН, НЭВУЗЭ ИДОН МЫБОРЭКЕ, ЧЭМЭ FУРБИНЭ ХЭЛF!

КУЛӘ ШӘВОН, НӘВУЗӘ ИДОН МЫБОРӘКЕ, ЧӘМӘ ҒУРБИНӘ ХӘЛҒ!

         Гирәм чәмә шинә-шәкә толышә хәлғи ыштә вејһәзојнә тарыхәдә ҹо һичишән быәнәбәј, иглә Кулә шәв де Нәвузә ид вәс әкәј ки, чәмәһон һар гыләјни фәхр быкә дештә толыш бе! Чумчыко ым Ид  бәшәри Хыдо тәрәфо хәлғ кардә ружи нышонәје, чәј нышонәје ки, чәмә толышә хәлғи де бәшәри һәмсин бејку хәбә дојдә! Әве чәмә хәлғи ыштә вејһәзојнә тарыхәдә веј овандон, һар гылә толыши сәј һар кәси навәдә барз кардә һәзо-һәзо чокә чокә коон дыләдә чы Иди ыштә вырәш һесте: тарыхон дәгиш быән, кишвәрон омән шән, ҹаһангирон омән бә дынјо, шән, толышон машышон кардә, диригышон кардә, фәрһәнгышон сохтә, әғылшон певатә, кинәшон доә, кинәшон сә, шојәдә быән, јасәдә быән, чандә гылә бәлон омән бәчәмә хәлғи сә, чандә гылә тиранон пијәшоне бекән чы Иди меһиббәти толышон дыло, әмма чәмә хәлғи јодо бекардәшни Кулә шәв ијән Нәвуз, нығо доәше ым ид Хыдо ән азизә әмонәти ғәзинә! Һәлә ым чиче ки, еһанә әмә де дығғәти нәзәр сәғандомон, бәвәдә бәвиндемон ки, һәзо-һәзо сорон дыләдә толышон жимон әнҹәх иглә тарыхи гырдо-кәно довраныш кардә: һар гылә толыши де шоткомә, де вәјәванди дәро кардәше Кулә шәв ијән Нәвуз, чәјоән интизорәдә быә омә Кулә шәви ијән Нәвузи! Бы мәноәдә, толыши жимони, чәј умри гирәм де иглә кәломи ифодә кардеј лозим быбо, ым кәлом Нәвузе! Чыми гыләјән мәно ыме ки, һар гылә толыши, чәмә ҹәми хәлғи мојә Нәвузи ијән Кули хосә әломәт – Сәмәније! Чәмә хәлғи де Сәмәни жиш гәтә, деәјән жијејдә! Тикәјән нығыл-нығыли фикир быкомон, толышон жимонәдә Нәвузи вырәј мығојисә карде бәзнемон де Имом Һусејни (ә) Кәрбәло мысибәти! Чумчыко чәмә хәлғи дышменон, әј мәһв кардејро даст-почә быәкәсон һәммәј нә де тәвә, нәән де таштә зу оме зынәнин бә толышон! Әвон һәммәј пијәшоне ки, Нәвузи ијән Имом Һусејни (ә) меһиббәти бекән чы хәлғи дыло! Әмма чәмә бахтәвәрәти, Хәлләғи-Аләми нәзәрәдә толышә хәлғи ғыјмәт бымәдәј ки, детобә ымружнә ружи чы дыглә тарыхи һодисә меһиббәти толышон дыло бекарде ғысмәт быәни бә һич гылә дышмени! Әве Хыдо огәтәше ым хәлғ, хыванди быә бәј, нығош доә чәмә хәлғ! Нәвузи һәзо-һәзо сорон дыләдә умуш доә бәчәмә хәлғи, Имом Һусејнијән (ә) сәдош кардә чәмә хәлғ бә озоди ҹанг, бә шәһодәт, бә имон! Чанә толышә хәлғи дыләдә ым меһиббәт һесте, чанә әв умдәвоје ки, омә Нәвуз озоди бәварде боәј, Имом Һусејни роәдә чәј екардә һар тылә чәшәарс һәнијән нез бәкарде әј бәчәј озоди, чәмә хәлғ анә бәжије, һејве бәбе, обәзавзије!
         Әве, бы азәзә ружәдә әмә чәшрушни дојдәмон бә ҹәми толышон, тәбрик кардејдәмон әвони де Кулә шәви ијән Нәвузи мыносибәти, бахтәвәрәти, һәрәбахтәти, хәшәҹони орзу кардејдәмон бо һар гылә толыши, де Имом Һусејни (с) номи сәдо кардејдәмон ыштә хәлғи бә озоди ҹанг! Мыборәк быбу шымә Кулә шәв, шымә Нәвузә ид, чәмә ғурбинә хәлғ!

Толыши Овҹи һәрәкот                                            Толышпресс