ЧЫМЫ ЛЭЛЭ ДжЫНДО БЫЭ!

ЧЫМЫ ЛӘЛӘ ҸЫНДО БЫӘ!

Толыш Рәмәзон

Ыштәни зындәни барде,
Чымы Ләлә ҹындо быә!
Валлаһ, ым лап јолә дарде,
Чымы Ләлә ҹындо быә!

Валлаһ, һәни омәм бә зар,
Ләлә дасто быәм безар!
Чәмә нәслыш кардәше хар,
Чымы Ләлә ҹындо быә!

Интернети умутејку
Жыбзын, быми доәше зу!
Чымы димдә мандәни лу,
Чымы Ләлә ҹындо быә!

Пәјдош карде фејсбуки ро,
Бәнә әғли әв быә шо!
Нышдә әјо шәв-руж беко,
Чымы Ләлә ҹындо быә!

Де ҹывонон гәтедә тык,
Статуссику кардә рык!
Валлаһ, бәболе ым јазығ,
Чымы Ләлә ҹындо быә!

Профилдәш сијосәте,
Милләткорәти рош гәте!
Демәғоғәтиш сәнәте,
Чымы Ләлә ҹындо быә!

Толыш, толыш вотдәш, вәсе!
Ләлә, ышты милләт ләсе!
Нечи вәдә гыләј пәсе!
Чымы Ләлә ҹындо быә!

И руж нојдә әјо шикил,
Һәши жинтон дыјо шикил.
И руж нојдә хыјо шикил,
Чымы Ләлә ҹындо быә!

Мәһәррәмдә Әләми шикил,
Статусдә кәләми шикил!
И руж ноә шәлеми шикил,
Чымы Ләлә ҹындо быә!

Гаһ диндорә мәло бедә,
Фитво дојдә, бәло бедә!
Додо дардику выло бедә,
Чымы Ләлә ҹындо быә!

Синыш шестику дәвардә,
Де ҹывонон тасыб кардә!
Однокласникәдә гардә,
Чымы Ләлә ҹындо быә!

Ләлә, Ләлә, Шинә Ләлә!
Мәбә чы мәхлоғи зәһлә!
Бәты лозиме ын шәлә?
Чымы Ләлә ҹындо быә