Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
әвон бә тыркон бә шу шән!
Амјәзо
-Јалла, Амјәзо!
-Јалла! Јалла, хосә Амјәзо!
-Чы әҹәб, жыго рәбәдә әштәш, ижән кындә шодојдәш бә ҹәһәнными отәшхонә? Ты ки бы вахти һытејдәш. Чич быә?
-Мәвот, шинә быјәм! Чандә руже, фикир-фикир имкон дојдә ки, роһат-роһати быһытым?
-Чич быә ки, жыго нороһатиш?
-Ты ыштән фик дојдәниш бә әјоми гардыши? Номхыдо, и тәрәфо толыши коон бә банд шејдән, әмма чә тәрәфоән дышменән һәнијән шигирд бејдә, бәрмалә ҹангыш елон кардә бәмә…
-Һым!.. Дышмене тыни нороһат кардәкәс? Кејнәку ты нороһат бејдәш дышмени әмәлонку?
-Не, Хыдо ныкә! Дышмени әмәлонку нороһат ним. Чымы нороһатәти чәмә кали толышонкује.
-Һа, ым ҹо мәсәлә! Һежо азән шәв-руж бә фикир-хыјолим чә толышон әмәлон һәхәдә. Дышмен шигирд быә, ыми сәрәсе бејдә, әвән боштә ҹони бә һәрәкәте. Бәс бә кали толышон чич быә, кон меши тыкнијәше әвон?
-Ты јолә мердишхо, ноши ниш бы коәдә. Чок-чоки фик быдош, есә "меши тыкнијә" һәмон толышон “ҹо толышонин”.
-Чиче, чәвон шох һесте?
-Дард бымәдәј ки, һестышонејәни! Чок-чоки фик быдош, бәвиндеш чәвон “шохон”.
-Лап чымы һовсәлә тангы карде. Һәлә бывот, бунум, ым чы мәсәләје?
-Чымы Билә! Бы сәфә бә толыши бә һыҹум дәвардә толышон чок-чоки нәзәро дәвонош, бәвиндеш ки, чәвон дыләдә ән веј ыштәни бә ови-отәши жәкәсон мандә толышонку фәрғинә гыләј нышонәшон һесте.
-Чичехо ә әломәт?
-Тангһовсәлә мәби. Чокиш әве, ты ҹәвоб быдә бәчымы гыләј парси: Кон һолонәдә одәм дәгиш кардејдә ыштә фәмили?
-Ғајдә жыгоје ки, кинә тојфә бә шу шеәдә, дәгиш кардејдә ыштә фәмили. Кали хәлғонку жыго дәб һесте ки, кали мердон кә бе бәпештә, пегәтејдән ыштә жени фәмили, веј вахти ыштә фәмилијән огәтејдән, жени фәмили “ангыл кардејдән” бәј, демијән бејдән дыглә фәмилин. Вотыме, һа чич быбу? Чыми бәчәмә сыхани чы аидәти?
-Һа бәшты ағыли ғыбон! Чокы воте, афәрин! Есә бој, гуш быдә бәмы. Ты чок-чоки фик быдош, бәвиндеш ки, есә “хышм кардә” толышон вејни фәмили һич гылә аидијотыш ни бә толыши. Чәвон фәмилон сә бејдән де “…оғлу”, “…-лы/…-ли”, кали гылонән лап бә кәлләчәх бешән, фәмилышон пегәтә де “…-сој”. Бомынән веј мәрағин ымбе ки, жыго бывотәмон, “навконә” “хышм кардәкәсон” бә нијони, жидасти ҹум әкәшин бә толыши. Жыго әкәјн ки, толышон сәнырәсын ки, ымон кин: дустин ја дышмен? Әмма есәтнәнијон чәши ви кардејдән, гәви окардејдән, чич бәчәвон гәв омејдә, жәгоән вотејдән бә толыши унвон! Јәне пусты-лу бејдән ки, бә тыркон хош бон! Бочи, бәзнеш воте?
-Һәни ты вотејдәшәни…
-Һа Хыдо рәһмәт быкә ышты ә мыборәкә пыә! Веј но-пегәтым карде, бә шәв әнәһыт мандим, охој пәјдо кардыме чы парси ҹәвоб: Мадәм ки, ым "толышон" жыго веј пијејдәшоне хош бон бә тыркон, чыми сәбәб, чымы зынәјку, әве ки, ым номешә “мердон” бә тыркон бә шу шән!
-Зә, кәхәлизи балә, ајбе, рысвоје, жәго мәвот…
-Бомы бочи ајб бејдә ки? Аз әвоным бә шу доәни ки! Әвон ыштән пегәтәшоне тыркә фәмилијә, јәне ыштән дештә хоши бә шу шән. Жыго быәнәбәј, бәвәдә бочи бәпе әвон ыштә хос-хосинә толышә фәмилијонышон шодоә, пегәтәшоне тырки фәмилијә? Сәбәб бымәдәј, чымы Амјәзо! Есән ә номешон ыштә хыртә дырнејдән ки, чиче, чиче, хош бон бәштә “шујон”! Чыми ҹо номышән һесте ки?
-Сыхани рости, бәты сыханым карде, әмма чок-чоки фикир кардеәдә, бәмынән һежо жәго омејдә. Чыми ҹо номыш ни.
-Ты һәлә тади мәгәт. Сыхан деми сә бејдәни. Чәвон ыштә дыләдән ҹо-ҹо номешон һестин, әвон һәммәј и нин.
-Мәсәлән!
-Мәсәлән, чәмә Аллаһверди миәллими тәрҹумә кардәше бә толыши дастон “Дәдә-Горгуд”. Чич бәбе, кардәшејәни, бымәдә чы јавә ҹәһәт һесте ки? Әмма гыләј “…ханоғлу” “шәфкәш” нывыштә бәчәј тәрҹумә. Бә гәдә “шәфкәдә” хонәхо лап бәнә корпә һырдәни шојво кардејдә ки, “Дәдәмиз талыш дилиндә данышыр!”. Есә ты бывот бәмы, кејнәку тыркә Дәдә Горгуд чә толыши “Дәдә” быә? Есә винде, аз рости вотејдәм? Әнҹәх чә хонәхо “вәју” бәј “Дәдә” бәзне вотејәни!
-Вај пым вај, вај мом вај! Ым чы бәлобе, әмә егынимон?
-Бәло јоли ијо ни. Гушы бәмыку быбу. Жыләвонон кардәјон бә толыши "нијонијә" зәрбәје. Ән јолә зыпи жәгәс ҹо номешонин.
-Зә, шәхсән бәмы ымән вәс кардејдә, дылым тәкәј, бәлкәм огәти ијо?
-Һич жәго чиј ни. Ты бино кардә ын гәп. Аз ныштәбим ыштә компутери кутәдә, гәдә-гәдә боштә бә кобим. Гуш быдә!
-Чорәм чиче? Бывот, Хыдо овдонә быкә ышты кәј!
-Ты зынејдәш, ән гурә зиккә жәкәсон, һәммәјсә веј бә тырки хош оме пијәкәсон комонин?
-Бывоте, бывот, пәшимон бим бо Деғыжи гәви окарде…
-Чымы Билә, веј вахтику бә “шу шә” толышон ки, һестин, әвон чок-бевәҹ, ружгор кардејдән. Әве, әвон вејән жәј-кује кардејдәнин дештә. Дод чә номешон дасто ки, әвон һәлә бә “шу нышә” боштә пегәтәшоне тыркә фәмил! Чәвон гәвон мандејдән бә сыләһуј, јәне чы до-дымжон һестебу, әвони дојдән бә толышон ки, “зоәсојб” ныгарды ыштә фикрику, бә пешо оныгырдыны чәвон «нышонә»!
-Охо фәмили дәгиш кардеј пеш вәјә бејдә.
-Зә, дард һежо бымәдәјәни! Ым одәмчон анә веј ашығин бә тыркон ки, һовсәләшон рәсејдәни вәјә чәш быкән, бышун бә пардә дәшун, кәбин быкән, чәјо дәгиш быкән ыштә фәмили. “Зоәсојби” кәо гыләј гәдә “сигнал” оменҹән, ымон дәростәшоне ыштән бәнә вәју, витән шән бә “зәгс” рәјрә дәгиш кардәшоне ыштә фәмил. Чиче чыми мәно, осәмејдәш?
-Зә, аз керахт быәм, һолы огәте бәмыку ки,жычиј осәмомән? Бывот, сә быкә ыштә гәпи.
-Чыми мәно ыме ки, ым ҹывонә һырдәнон һәлә бә “шу нышә”, чәвон “зоәти” дасто шә! Әве әвон ҹар кәшејдән бә аләми ки, “әмә тырконымон бәнә ыштә ғәзинә пијејдәмоне”. Ыми ду вотејдән! "Ыштә ғәзинә" пијејдәшонни, ыштәсән вејышон пијејдә! Әве һәлә мәлум ни ки, хонәхо бәсте әј ја не, әвон бәнә ҹингәнә егынијән бә мәјдон, һа тәһғир кардејдән толышон. Нә јол зынејдәнин, нә рук, нә сипириш зынејдәнин, нә сијориш, һеј бә до-дымжонин.
Әве, чымы Билә, чәмә толышон сәрвахт быәнинин, дусти-дышмени фәрғи зынәнинин ки, зијон ныгыны бәчәмә хәлғи озоди мыборизә! Толышон зынәнинин ки, бә жәләвони сәлом дојән гыноје, деәј даст гәтејән мырдоле, чәј тоно ныштејән бә мерди дамә ко ни, чәвон нәвә зәминисә нәвејән беғурбәти вардејдә бо одәми. Иглә рош ыме ки, дијәро быби жәләвонику, чумчыко әвон бә тыркон бә шу шән! Мојнә бәбәјн, гынош нәби, охо чымон пыә-моә зоәш вардә бә дынјо. Ым фәғырә пыә-моә чич быкә ки, чәј зоә бә шу шә?.. Хыдо сијо быкә жәләвонә фәрзәнди дими!