АЗ ЧОКО ШО БЫБУМ?

АЗ ЧОКО ШО БЫБУМ?

Бә Баләддин Вешо бојли

Ҹамал Ләләзоә

Аз чоко шо быбум, һа Вешо бојли?
Дард-ғәми дыјоәдә тәседәм ҹојли!

Пештым ни, кие мыни бә сә дәшәкәс?
Ни дардон демыно дыло кәшәкәс!

Бывә, јолә дарде ошко нодон бе,
Де һәзо зурјәти ижән бесон бе!

Һарки һар тәрәфо еккуедә бә сә,
Тарс-ларзи милләтыш кардә пәспәсә!

Выло быә, талан быә толышә зывон,
Нуниро нокә быән ҹонбозә зоон!

Кардыше офәјә бобон бо јади,
Әвони бахш быкәј балон бо јади?

Нәғылән, дастонән ов бе, бардә бе,
Че хәлхон мол-давләт һостон һардә бе!

Һа руж гиј быредә че ғанунон гир,
Милләти даст-почә жә быә бә зинҹир!

Ноһәхи дастәдә ғылынҹ, тожнедә,
Нәведә бо бырне ғыбон, выжнедә!

Милләти ном-нышон бедә ғәдәғә,
Чан һәзо беғырјәт шедә сәдәғә!

Ым хәлғи пулгирон, мәнсәбпәрәстон
Һәватедән һостон, һыредән һостон!

Аз чоко шо быбум, һа Вешо бојли?
Дард-ғәми дыләдә тәседәм ҹојли!