ШИНЭ-ТЕЛЭ ДЫНJО

ШИНӘ-ТЕЛӘ ДЫНЈО

Илјаси Һабил

Боғсәы дој, боғы ныдој,
Гылоы дој, лоғы ныдој,
Лупәы дој, тоғы ныдој,
Бә сипи жәј зарды, чијо,

Ды чәшы дој, бәвы ныдој,
Зывоны дој, гәвы ныдој,
Мардем пијәј, ғәвы ныдој,
Ҹоны бә гыјы дәгынјо,
Шинә дынјо, телә дынјо.

Астовә дој, шәвы ныдој,
Мангылы дој, зәвы ныдој,
Һушәы дој, ҹәвы ныдој,
Ныдывә кај хәмән ијо,
Шинә дынјо, телә дынјо.

Дәвләты дој, молы ныдој,
Кам-камы дој, болы ныдој,
Хычәы дој, холы ныдој,
Ныдој бә зизә егынјо,
Шинә дынјо, телә дынјо.

Чәшмәы дој, һони ныдој,
Бә тоны дој, тони ныдој,
Вони әкәј вони ныдој,
Һәмә тәнхон карде нијо,
Шинә дынјо, телә дынјо.

Һәләы дој, дарзы ныдој,
Бә нағды дој, ғарзы ныдој,
Нызымы дој, барзы ныдој,
Улгу бә улгу пегынјо,
Шинә дынјо, телә дынјо.

Отәшы дој, овы ныдој,
Һоғәты дој, товы ныдој,
Бә ноһәхи ловы ныдој,
Мутә бәшбән ты бе бынјо,
Шинә дынјо, телә дынјо.