ЧЭМЭ ЧЭШРУШНИ

ЧӘМӘ ЧӘШРУШНИ!

Ризван - 27  
Игбал - 25

             Сыхани рости, чәмә Редактор бәмы вотеәдә ки, ымруж чәмә дыглә хосә ҹывони мовардә руже, бој гыләј тәбрик быкәмон әвони, сыфтә вотыме, Зә, бә пучи бемәкә ҹывонон, һәлә рәје әвони тәбрик кардеј! Хәјли дәварде чәмә гәпику, ныштим ды-се кәрә гушым дој бә ТМВ-дә доә быә Тати маһне, ғәрибәти зу омәј бәмы. Шим бә думот, ыштән-бәштә фикирым карде ки, инсоф ни, дыглә субајә нујәҹывонымон перәсә де Хыдо комәги, һар дыкәсијән шәв-руж бә дастпочән Толыши роәдә, быдә тәбрик быкәмон әвони. Әве Толышпреси номо нывыштыме ым чәшрушни бәчәвон дыкәси! Һәлбәттә, әзним карде ки, тәбрикон ҹо-ҹо бынывыштым. Интаси фикирым карде ки, Хыдо ныкардә чәвон гыләјни һәхәдә тикәј веј, чә гыләјни һәхәдә кам бәнывыштем, ја гыләјни тикәј веј тариф бәкам, ә гыләјни кам (пијәмердимәни, чич быкәм, бе бејәни!), жыго гыләј азизә ружәдә хол егынә бәзне бәчәвон гыләјни дыли. Әве бә ғәрор омәјм ки, де иглә чәшрушни дылисыхт тәбрик быкәм әвони дыкәсијән. Гыләј шаири нывыштә жыго гыләј и бәнд шер омәј бәчымы јод ијо:

Мердон бәмејдәнин мерд мардеәдә,

Мерд кырди әвотни, сијо тан әкәни.

Гони бахш беәдә, дард бахш беәдә

Кам бе ја веј бе, һички ғуддә кардәни!

            Чымы тәбрики мојән бымәдәј ки, Хыдованди-Аләм һич вахти дарди, чәтини, шәлә, бој бахш кардеј ғысмәт ныкә бәчәмә бы дыглә ҹывонә балә! Чумчыко әвон һар дыкәси беәјән веј гыләј гонә шәлә кырнејдән ыштә душисә – Толыши шәлә! Орзу быкәмон ки, детобә охој де сәбарзәти быкырнын ын гонә шәлә! Шәхси жимонәдә есә бој орзум әве ки, бәмы бы оһилә вахтәдә Хыдо ғысмәт быкә чәвон һар дыкәси вәјәдә сиҹони рахс карде! Хыдо шымәни бахтәвәр быкә, чымы азизгирамијә балон! Мовардә ружон мыборәк быбу!

Де јолә меһиббәти Фәрмони Фәхрәддин Әбосзодә

         Чәмә хосә толышон! Ымруж чәмә Ризванә билә 27 син дамејдә, Игбалә билән 25 син! Чы бахтәвәрә ә хәлғ ки, жыго дыглә шинә-шәкә баләш һесте! Һәм хосјәтәдә, һәм сәнәтәдә, һәм чандә гылә ҹо ҹәһәтонәдә әвон ҹо одәм быбонән, иглә мәсәләдә әвон дыкәсән жыбызын иглә ҹонин. Ымән чәмә хәлғи еғвол, чәмә хәлғи ымружнә зылләтинә руж, жыго гыләј вәзјәто толышон перохне роәдә чәмә һәммәј иҹо бардә мыборизәје! Росте, чәвон һар гыләјни ыштә ро-ријәш һесте чәмә бы мыборизәдә, әмма мәғсәдышон ије: Толышә хәлғи озоди, Толышыстони озоди! Бы роәдә Хыдо хәј быдә бәвон (дејәмә бә иҹо)!

         Ризван сәнәткоје, һәмән ыштә дасты-хәттыш, ном-сандыш быә гыләј сәнәтко! Чымы һич шәкым ни ки, есә кам толыш бәбе ки, нызны әј. Чыми и сәбәбән әве ки, һежо, чәмә билә Забили вотәјнә, “Овәјнәдәј” (телевизијә екранәдәј)! Чандә соронин шәв-руж бә дастпочәје ки, гыләј мывзу пәјдо быкә, дастәј толыши гырдә быкә бә иврә, быкәшы әвони, бынә бә Интернет ки, мандә толышонән де ләзәти дијә быкән бәвон! Чандә кәрә һежо аз ыштән бә роликонәдә бә ҹывонимардә Вәлишаһи, Хилғәти ијән Толыши ҹо шаирә зоон һандә шерон, ғәзәлон гуш дојәдә бәмәм бәнә корпә әғыли! Шәкым ни ки, чандә гылә ҹо толышонән ғурбәтәдә бәвон гуш дојәдә жәгоән бәмән! Интаси бы бәме вәјнә һежо сәғби вотәме бә Ризвани, вотәме: Хыдо тыни һејве быкә, чәмә азизә Билә!

         Есә бој Игбал кам-кам бешејдә бә “Овәјнә”. Чумчыко әв алиме. Ым сыхани де мәсулијәти вотејдәм: Камил гыләј алиме! Алими руж дәбәварде де тәдғығот барде, китоб, мәғалә нывыште. Алими кардә коон кам одәм бәвинде. Интаси мәһз Игбали нывыштә чандә гылә китобон ијән мәғалон Толыши номышон певыло кардә бә дынјо һар тәрәфи. Һәмән бә Игбали һисоб есә че дынјо веј јолә алимон ијән сијосәткорон зынејдән, кије Толыш, чичышон пијејдә толышон, чиче чәвон бардә мыборизә мәғсәд ијән чокнә бәбе чәј нәтиҹә! Чәј нәшр быә һар гылә мәғалә шәхсән бомы гыләј јолә вәјәванде! Жыго зыооныш быә хәлғ һәни нибәмарде! Жыго ҹывонә алимон иншаллаһ пебәрохнен чәмә хәлғи!

         Чич орзу быкәм бәты, чымы азизә балә? Вәјәдә рахс карде вотыме. Ым вәбастәје ышты ыштәнику. Чанә рә вәјә быкош, анән чымы бә вәјәдә рахс карде шансым веј бәбе! Хыдо бәмы ғысмәт быкә ышты вәјә! Хыдо тыни бахтәвәр быкә! Һәлол быбу ышты моә шыт бәты! Һәлол быбу ышты пыә доә тәрбијә бәты!

         Ризван ијән Игбал! Ымруж чәмәһон һар гыләјни гыләј ҹо мәһоләдә быбомонән, јәғын бызынән ки, һәм Толышыстони ыштәнәдә, һәмән ҹо мәмләкәтонәдә жијә чандә кәс толыш де ешаеши ғејд бәкарден шымә мовардә ружи! Әве чәмә ҹәми толышон номо ижән чәшрушни дојдәмон бәшмә, мыборәк быбу шымә мовардә руж вотејдәмон! Чыми әвәзијән Ризванику тожә сәнәти әсәрон, Игбаликујән тожә китобон ијән мәғалон бә чәшимон! Һа бәшмә чәши һејран!

Фәрмони Фәхрәддин Әбосзодә

Каһин Мирзәлизодә

Толыши Овҹи һәрәкот                                      Толышпресс