Разделы
Архив
Пн | Вт | Ср | Чт | Пт | Сб | Вс | |||||||
---|---|---|---|---|---|---|---|---|---|---|---|---|---|
1 | 2 | 3 | |||||||||||
4 | 5 | 6 | 7 | 8 | 9 | 10 | |||||||
11 | 12 | 13 | 14 | 15 | 16 | 17 | |||||||
18 | 19 | 20 | 21 | 22 | 23 | 24 | |||||||
25 | 26 | 27 | 28 | 29 | 30 | 31 |
Рассылка
Оцените содержание статьи?
ЫМРУЖ БӘ ФАЈӘ РӘСӘЈ ТОЛЫШИ МИЛЛИ ТЕЛЕВИЗИЈӘ!
Фәхрәддин Әбосзодә
Ымруж дијәм карде бәчәмә Милли телевизијә иминә бәрномә. Һич зынејдәним, де кон сыхани бывотым, дечи мығојисә быкәм ыштә шојво? Жыбызын, и гулә шәлемовышон вардәбе чәмә бандо, ныштим де ләзәти һардыме әв! Чымы зынәјку, бы дијәроә мәһоләдә жијә һар гылә бандыж чок сәбәрәсе чымы ын мығојисә. Чумчыко бочәвон һар гыләјни шәлемов гыләј тәбәрыке ијо! Һисоб быкән, бә жәго гыләј тәбәрыким дијә карде! Әһсән быбу ым кој бә фајә роснијәкәсон! Әһсән быбу бә ТМВ иминә бәрномәдә ыштә дыли сыхани вотә толышә мердон ијән мојнон! Сәд әһсән!
Ангыштәм бә ғыч гәте! Быпарсән, бочи? Чәмә лап лестыә билон гыләјни дијә кардәшбе бә ТМВ. Зангыш карде бәмы, Хыдо бәрһәхе одәми сәјсә, хәјли тарифыш карде! Әмма охојәдә гыләј сыханышән воте: -“Тикәј веј гәп жәјдән, әв оғандејдә одәми”. Сыханым није, һар кәси ыштә хышмәтыш һесте, чәј ыштә хош омә чијоныш һесте. Интаси жәго гәпи жәкәс бәпе ләзи фик быкә ки, әмә һәммәј бешәмон Озорбојҹоно. Чә мәһоло ки, чәврәј телевизијәдә шәв-руж и кәс бә гәпе: сыфтә чә икәсә пыәбе, есән чәј зоә. Чәвон номијән гәтејдәним, чумчыко һандәкәсон әлбәһол дәбәрәсен, чичонән ә икәсон, һәмән пијејдәмни мырдоли быжәным бәштә нывыштәј. Ғәләм беәдә, һостонбе чәмәһон ко, жәләвони номи мәҹбурән нывыште бәпештә, әлбәһол шејдәбимон, ғусл дојдәбимон бә ғәләми, чәјо идомә кардејдәбимон ыштә нывыштәј. Есә компјутере, бә шоғәрибијән ғусл дој әбыни ки! Конҹој ә бахтәвәрәти ки, һаруж компјутер быһырәмон?
Мылхәс, Озорбојҹонәдә мәхлоғ шәв-руж гуш дојдә бә икәсә монологи, бемәно-бемәно, ду-дујә, ду-тәлбисә гәпон, сыстән бејдәни! Әмма чокнә ки гыләј толыш ыштә чәши сијо-сипи, игләлијә телевизијәдә кәлимәј зијод вотејдәбу, әв әлбәһол бә чәш чијејдә, һәмән дард бымәдәј ки, бә толышон чәш чијејдә! Әмон, һа Хыдо!
Азән сәрәсејдәм ки, чәмә толышон максималистин. Јәне һарчишон пијејдә быбу, һәмән икәрәдәмәдә быбу! Жәгоән бејдәнихо! Чокнә бәвотен, һәзо сыпә астә-кујә кошәше, гыләј телевизијәмон бә дәрһәл омә, имкон быдән, быдә ә фәғырон тикәј бысывнын ыштә жә гәпи, вотә сыхани! Һәмән, Хыдованди, вахт боме, вәдә дабәме, толыши бәбеше чандә гылә телевизијә канал, чәвон һар гыләјни гыләј бәрномә бәдо, һар толышән дијә бәкарде бәштә пијә бәрномә! Әве сәбр кардеј лозиме, мәхлоғи кәш-пори арыштеј лозим ни, хәј-дыво дој фикәдә ныбәкәсән һич ныбу там быжәны, бевәҹи нывоты! Бешымәнән Озорбојҹонәдә әбәди јасе есә, тәзијәј, һа мәрсијә вотејдән, синә жәјдән боштә марде-мардеәдә быә ләнәтулла довләтиһа! Жыго гыләј ружәдә гыләј толыш чәмә ТМВ гыләј нырәсә ҹәһәти бә чәш дәфырсынеәдә, һисоб быкән ки, јасо бекардејдә әвони, шо кардејдә әвони! Зә, кәхәлизи балон, имкон быдән, мәхлоғ быдә ыштә јасәдә быбу, бочи сыровнејдәшон әвони, шо кардејдәшон әвони? Кејнә быә ки, әвонән шо быкән гыләј толыши? Һежо жәшоне ғаппоз бә толыши сә, сәшоне чәј дасто хәлғи һесте-быәјон һәммәј! Чәјоән вотәшоне, гиже толыш! Коон ныбу, һа быдә синә быжәнын! Чәвон ғәзәнҹ һежо синә жәј бәбе иншаллаһ!
Чы мәсәлә һестыше гыләј ҹо тәрәфән. Фикым ошко быбу бошмә вотәјнә, мәсәл бијәм бошмә Шых Сәдику. Шыхи кинә бә пәвәндбе. Ружи Шых ныможисә беәдә, чәј кинә пәвәнди омејдә бәчәвон кә. Дыкәси ныштејдән кәј гыләј кычәдә, шин-шини гәп жәјдән дејәнды. Зоә ше бәпештә Шых вотејдә бәштә кинә: - Чымы балә, охо аз де Хыдо бә гәпбим, бочи шымә ғәләғулә кардејдәбишон, мане бејдәбишон бәмы? Кинә (бәчәј ағыли һејран!) вотејдә: -Дәдәле, ты чокнә де Хыдо гәп жәјдәбиш ки, чәмә гәпон мәсејдәбиш?
Есә Шых Сәди мәсәл ныбу, һар гылә толыш бәпе ыштә чандә сорон, сасорон орзујон бәвинди бә телевизијәдә! Бәпе бәвинди чәмә ғәбо бешә хәлғи, бәјжи быә хәлғи! Жыго чијон виндәкәс чокнә нырәсәј бәзне винде әјо?
Чымы ым сыханон һәлә чәмә лестыә зоон һәхәдән. Бәштә синә мәжәнәмон ки, номердон, лупештон, мијонгәзон, беимонон, беғырјәтон һич нин толышон дыләдә! Һәлбәттә, һестин!
...Һар гылә тожә омә нәсыл жыго зынејдә ки, әв һәнијән ағылманде, чоке ыштә дәдә-бобонсә. Валлаһи-биллаһи, жәго ни! Чәмәһон һич гыләјни һичијәдә баш ни ыштә дәдә-бобонсә! Де зынәјым ком ни. Һәлбәттә, чәмә дәдә-бобон чы бәзнин, компјутер чиче, телевизијә чиче? Интаси мәсәлә мојә бымонәдә ни! Мәсәлә ғырјәтәдәј! Һа баһанд, сәводы быбу, зынәјы быбу, әмма ғырјәты ныбу, имоны ныбу, ыштә хәлғи ғырјәти мәкәш, бәки лозиме ышты ә сәвод, зынәј?
Бы мәноәдә, есә жијә һар гылә толыш ыштә дәдә-бобо ғырјәти, имони идомә кардејдә, бә мијон нојдә! Әве толыш вотејдә ки, до ыштә рәғисә пебәрәсе! Чики рәғ чич быәбу, әв ыштәнән һежо чәј тоје! Әве дијә быкән бә бәднијәтә толышон ки, әвонән де тыркон бә иҹо јас гәтејдән ымруж толыши телевизијә бә фајә рәсејку, фырсәт зынејдән боштә ки, ды-се кәлимә до-дымжон, тәһғир бынывыштын бә толышә балон унвон ки, быдә тыркон шо быбун, сәғби бывотын бә жәләвонә номердон! Әве вотејдәм ки, чәвон дәдә-бобон чич быәбунбу, әвонән чәвон рој шејдән. Чики дәдә-бобо шәғол быәбу, әвән ымруж жәго гыләј шәғоле! Бәвәдән толышон ләнәт вотәшоне бә һәмонә шәғолон, есән әмә вотејдәмон: -Хыдо ләнәт быбу бә жәләвонон! Амин, ја Рәббил-Аләмин!
Чәшоны рушин быбу, Толышыстон, чәшонон рушин быбун, һа толышона! Хыдо хәј быдә бәчәмә Милли телевизијә!
Дијәкән бә ТМВ : Толышстони Миллијә Виндәсәдо / Национальное Телевидение Талышистона