hАР РУЖЫМОН АШУРЭJЕ!

ҺАР РУЖЫМОН АШУРӘЈЕ!

            Ымруж Мәһәррәмә манг дамејдә

            Чәмә хосә хәлғ!

            Ымруж Ислами һиҹри-ғәмәри тәғвими Мәһәррәмә манги 1-је. Чыми мәно ыме ки, ымруж де мысылмонә тәғвими һисоби бино бејдә Нујә сор (толышон “Ғәтыл”, “Ғәтылә манг” вотејдән бы манги номи). Интаси чы манги ғыјмәт иглә чәј тәғвими иминә манг беәдә ни. Һич гылә мыболиғә ныкардә, бәзнемон воте ки, бәшәри тарыхәдә ыштә мәхсуси вырәш һесте чы манги.  Фик быдәмон: 1) Мәһәррәм Нујә сори вәсәје; 2) Ым манг һәлә Исламисән веј-веј бәнав чоглә һәромә манги (Зилғәдә, Зилһиҹҹә, Мәһәррәм ијән Рәҹәб) гыләјни быә. Ислами мыборәкә Пејғәмбәри (сәәс) сыхане ки, бы мангәдә ҹанг кардеј, хун екардеј ҺӘРОМЕ! Мығәддәсә Ғырони-Кәрими “Тобә” Сурә 36-нә ајә жыго һамјејдә: “Һәғиғәтән, Аллаһи  тоно, Аллаһи китобәдә мангон ашмард Чәј осмонон ијән зәмини офәјә ружику донзә манге. Чәвон чоглә һәроме. Ым ајин сабит ијән ғојме. Бы мангонәдә де ҹанги, хун екарде ситәм мәкән бәштә. Мушрикон ки иҹо ҹанг кардејдән дешмә, шымәнән һәммәјәво ҹанг быкән де мышрикон. Бызынән ки, Аллаһ де Чәјку дәрәмәкәсоне”; 3) Чы манги 16-дә мығәддәсә шәһр Ғудс елон кардә быә мысылмонон иминә ғыбилә; 4) Чы манги 25-дә шәһид быә покә Имом Зејналабидин (ә).

            Әмма Мәһәррәмә манги ән јолә меҹузә чәј 10-нә руже, јәне Ашурәје. Дијәкән, чичон, кон һодисон быән бы ружәдә: а) Бы ружи тобә кардәше Адәм әлејһиссәломи; б) Пејғәмбәр Нуһи (ә) гәми омә бешә бә банд Ҹуди; в) Ибраһим пејғәмбәр (ә) шодоә быә бә отәш, әмма сутәни, Хыдо меҹузә һымһымбәдә перәхә; г) Чандә сорон дәкәшә һәсрәти бәпештә бә пејғәмбәр Јағуби (ә) ғысмәт быә ыштә зоә Јусиф (ә) виндеј; Хыдо бы ружәдә перохнијәше Муса пејғәмбәр (ә) дечәј хәлғи бә иҹо Фирони ләшғәри чанго. Сывој ымон, гирәм бә веј нығыли бышомон, мәлум бәбе ки, чандә гылә јол-јолә алимон, руһанијон бә дынјо омән бы ружәдә. Әмма чәмә мәғсәд ијо чәвон һәхәдә гәп жәј ни. Чәмә мәғсәд Ашурә ружи ән јолә меҹузә һәхәдә сыхан окардеје.  

            Бә Хыдо меҹузә дијә быкән ки, мәһз бы мыборәкә Мәһәррәмә мангәдә, бә мангәдә ки, Хыдо Ғырон бәвәдә ғәдәғән кардејдә, һәром зынејдә ҹанги, хун екардеј, Ислами Пејғәмбәри (сәәс) шинә-шәкә нәвә, Чәј мыборәкә вәдә перәсә, Чәј азизгирамијә кинә Һәзрәт Фатимә (ә) ијән ҹәми моминон Әмир Һәзрәт Әли Әбу Талиби (ә) зоә Имом Һусејни (ә) ијән Әһли-Бејти 72 кәс шуһәда бә шәһодәт рәсә! Мәһз ыме Мәһәррәмә манги, Ашурә ружи ән јолә меҹузә! Чумчыко чы ружи мојәдә һесте ғыјом, усјон! Чумчыко Хыдо Ғырон бы мангәдә ҹанги, хун екарде һәром быһамијоән, ејни зәмонәдә вотејдә ки, һәроми мәно ым ни ки, гирәм дышмен тәҹовузән быко бәшмә, бәпе табе быбән бәј, ғат быбән зылми жијәдә. Не! Хыдо Ғырон һамјејдә ки, еһанә бы һәромә мангонәдән дышмен тәҹовуз, һыҹум быко бә мысылмонон, һар гылә мысылмони һәхыш һесте ки, ыштәни, ыштә Вәтәни, ыштә хыјзони, ыштә ов-авлоди, ыштә хәлғи мыдофиә быкә! Һәмән ым әнҹәх гыләј һәх ни, воҹиботе! Гирәм мысылмон әмәл ныко бы воҹиботи, бызын, имкон дојдә бә дышмени ки, әв суи-истифодә быкә чәј дини мығәддәсонку ијән фигһи һыкмонку! Әве Ғырон һамјејдә ки, бы мангонәдә дышмен тәҹовуз быко бәшмә, чәј тәҹовузи услубәдән ҹәвоб доәнинишон бәј. Ымијән һамјејдә ки, ғәләбә тәғва һымһымбәдә бә даст вардеј бејдә, јәне воҹиботи бә вырә роснијеј ыштән тәғваје!

            Бочи ымони нывыштејдәм? Чумчыко быдә һандәкәсон чок-чоки сәрәсын ки, Имом Һусејни (ә) дештә тәрәфдорон иҹо де куфәвыжон дәвәти бә Кәрбәло оме, әјо чәвон шәһид бе иминә мыно ыме ки, Имом (ә) чок зынејдәбе ки, бә дышмени тәҹовузи де ғыјоми ҹәвоб дој ыштән гыләј воҹибә әмәле! Дышменән ки, иглә һәмон ружи тәҹовузәдә ныбе. Заһирән һәмон ружонәдә ҹанг ныбе һич! Әмма дығғәт быдомон, бәвиндемон ки, Мавјә Хилофәтәдә һакимијәти зәбт кардә ружику тәҹовуз һестбе һәм бә Әһли-Бејти, һәмән бә ҹәми Ислами! Чәјоән әј ки доше һакимијәт бәштә зоә Јәзид мәлуни, ым зылми, тәҹовузи шиддәтбе! Бы зылми табе беј, бә Јәзид мәлуни бејәт вардеј имони бә вој дој әби. Әве, Имом (ә) ашиш ныныште, бә ғыјом рост бе. Бы ғыјомәдә ыштән ијән чәј тәрәфдорон ҹисмән шәһид быбонән, мәнән, руфән ғалиб омәјн. Ыме әсыл ШӘҺОДӘТ, ыме әсыл ҸИҺОД, ыме һәғиғи  МЫСЫЛМОНӘТИ, ыме МОМИНӘТИ! Ислами гыләј барзә банди ғәзинә бәштә чәши вә бијомон, чә банди БӘШЕ Имом Һусејн (ә), имони БӘШЕ чәј шәһодәт, чәј шуҹоәт! Чәј һымһымбәдә и һәзо чоса сорисән веје ки, Ислам һесте, мысылмонәти һесте, имон һесте! Ыме че Ашурә мәно ијән молјәт! Ыме сәбәб ки, бы чандә сасорон дыләдә дынјо һар вырәдә жијә шиә-мысылмонон матәм гәтејдән бо 72 кәс шуһәда, әзодорәти кардејдән, еһсанон дојдән, синә жәјдән, хун екардејдән бы һәромә Мәһәррәмә мангәдә, демијән әмәл кардејдән бәштә воҹиботи, бә вырә роснејдән Хыдо һузурәдә ыштә ғарзи, нишо дојдән ыштә имони ијән тәғва!

            Ијо гыләј мәсәлән ғејд кардеј веј воҹиб зынејдәмон. Бы и һәзо чоса сори дыләдә ым мәсәлә һежо мијонәдәј, һежо мысылмонон парсејдән әј, пијејдәшоне нығыл-нығыли сәрәсын әј. Чиче ым мәсәлә? Әве ки, әнҹәх әзодорәти кардеј, еһсан дој, синә жәј, мәрсијә, розә һандеј ијән ҹо чијон нин Кәрбәло фаҹиә воҹибә әмәлон! Ијо һәммәјсә воҹиб быә мәғом чы фаҹиә фәлсәфә ијән мәнтығи зыне, сәрәсеје. Ым фәлсәфә ијән мәнтығән әве ки, бә золыми, зылми табе беј, тов вардеј, һәлә ыврәш каме вотәјнә, бә золыми, мыстәбиди мәдһијон нывыштеј, боәвон дыво кардеј, Хыдоку боәвон рәһмәт пијеј имонику хәбә дојдәни, әксинә, инсони беимонәтику хәбә дојдә. Кәрбәло фаҹиә фәлсәфә ијән мәнтығ ҸИҺОДЕ, Хыдо, чәј мығәддәсә дин Ислами, инсонон ыштә имони роәдә һар вахти һозы быә ҸИҺОДЕ! Мысылмон, шиә ки һозы ни бо ҸИҺОДИ, һозы ни бә зылми ијән золыми әкс бә ҒЫЈОМИ, бызын, һич мәно ијән молјәтыш ни чәј кардә әзодорәти, чәј доә еһсанон ијән жә синон, ру кардә хунон! Әнҹәх де бәме, синә жәј Хыдо һәх бәрғәрор әбыни зәмини димәдә!  Мысылмон мәнән, руфән, ҹисмән озод ныбо, бызын, зылм ијән зылмкор һаким бәбе зәмини димисә! Мысылмон ки бәштә ејнән сәјдәни ымружнә ружәдә Ирағәдә, Суријәдә ијән чандә гылә ҹо мәһолонәдә ноһәх кыштә быә шион, мысылмонон хуни, ыштә сәдо рост кардејдәни бә зылмкори, дештә моли, мылки, тәнхо, дештә ҹони һозы ни бы роәдә бо ҹиһод кардеј, бызын, әв һич мысылмон ни!

            Әве, ымружнә азизә ружәдә әмә ҹәми мысылмонон, чәмә ҹәми хәлғи номо рәһмәт вотејдәмон бә Имом Һусејни (ә) ијән бә 72 кәс шуһәда, сәбәсәломәти орзу кардејдәмон бә ҹәми мысылмонон! Һәмән әмә сәдо кардејдәмон ҹәми мысылмонон ки, әвон и быбун, вәһдәтәдә быбун, һәммәјәво рост быкән ыштә етирози сәдо бә зылми ијән зылмкори вәјнә!

            Хыдо рәһмәт быкә бә Кәрбәло шуһәдон! Хыдо сәбәсәломәти быдә бә ҹәми шион ијән мысылмонон! Хыдо сәбәсәломәти быдә бәчәмә мысылмонә толышә хәлғи! Имом сәвоб быдә бәшмә, хосә толышон! Хыдо ғәбул быкә шымә доә еһсанон, шымә вотә ныможон, шымә кардә дывон! Хыдо озод быкә чәмә хәлғи зылмику ијән әсорәтику! Чанә ки чәмә хәлғ зылми жијәдәј, һар ружымон Ашурә, һар жимон кардә вырәмон Кәрбәло быәнине, чәмә хосә хәлғ!

            Охојәдә гыләјән сыхан бынывыштым: Һар гылә толыш, һар гылә шиә бы азизә Мәһәррәмә мангәдә дылисыхт ибодәт кардәнине, әзодорәти кардәнине, еһсан доәнине, синә жәнине ијән ҹо әмәлон бә вырә роснијәнине. “Шаһ Һусејн, вај Һусејн!” воте-воте синә быжәнән, быбәмән бо шәһид Имом Һусејни ијән Кәрбәло шуһәдон, хосә толышон! Интаси јодәдә огәтән ки, Имоми һич еһтијоҹыш ни нә бәчәмә доә еһсанон, нә бәчәмә һандә мәрсијон, нәән бәчәмә ру кардә чәшәарсон! Имом беымонән Имоме! Чәмә ыштәни, чәмә хәлғи еһтијоҹыш һесте бымон һәммәј! Боштә ыштәни, боштә хәлғи руж быбәмәмон, хосә толышон! Ловә быкәмон бә Хыдо ки, бә шәһид Һусејни (ә) хото, бә Кәрбәло шәһидон хото рәһм быкә бәчәмә мәзлумә хәлғи, озод быкә чәмә хәлғи! Амин, ја Рәббил-Аләмин!